فوتو: ۇكىمەتتىڭ ءباسپاسوز قىزمەتى
ورال قالاسىندا سۋمەن جابدىقتاۋ جۇمىسى 2 ءتۇرلى كوزدەن جۇزەگە اسىرىلادى: جەر استى سۋلارى مەن جايىق وزەنى ارقىلى. قالانىڭ 340 مىڭ حالقىن سۋمەن قامتاماسىز ەتەتىن «باتىس سۋ ارناسى» كوممۋنالدى كاسىپورنى قازىر قالىپتى رەجىمدە جۇمىس ىستەپ تۇر. ماسەلەن, قاجەتتى سۋ مەن ونى تازالاۋعا ارنالعان رەاگەنتتەر قورى جەتكىلىكتى دەڭگەيدە. اپاتقا قارسى بريگادالار, كاسىپورىننىڭ 820 قىزمەتكەرى مەن 82 ارنايى تەحنيكا دايىن تۇر.
«جايىق وزەنى بويىنداعى ستراتەگيالىق نىسانداردى تاسقىننان قورعاۋ ءۇشىن بوگەتتى نىعايتۋ بويىنشا جۇمىستار جۇرگىزىلىپ جاتىر. قالا تۇرعىندارىن سۋمەن قامتاماسىز ەتۋ جۇمىستارى الدىن الا قولعا الىنعان. سۋ تاسيتىن ارنايى كولىك قاراستىرىلعان», دەدى «باتىس سۋ ارناسىنىڭ» باس ينجەنەرى ايان تاسقالي.
«جايىقجىلۋەنەرگوسىنا» 248 شاقىرىمنان استام قالالىق جىلۋ جۇيەسى قارايدى. اتالعان نىسانداردىڭ اۋماعىندا, ونىڭ ىشىندە اسا قاۋىپتى ۋچاسكەلەردە تاسقىنعا قارسى جۇمىس شەڭبەرىندە قۇم-قيىرشىق تاس قوسپاسىمەن تولتىرۋ امالدارى كۇشەيتىلدى. ءتيىستى جۇمىستارعا 180 ادام جانە 15 ارنايى تەحنيكا جۇمىلدىرىلدى.
تۇتاستاي العاندا, باتىس قازاقستاندا بارلىعى 20 مىڭ شاقىرىمنان استام ەلەكتر جەلىسى بار. ءتورت اۋداندا 20-دان استام, سونداي-اق ورال قالاسىندا 16 قوسالقى ستانسا جۇمىس ىستەپ تۇر. ولار قىردا ورنالاسقاندىقتان سۋ باسۋ قاۋپى جوق. بۇعان قوسا پرەۆەنتيۆتى امالدار قولعا الىنىپ, شاھارداعى ەكى قوسالقى ستانسادا قاپ توسەۋ, قورعانىس ءۇيىندىسىن ورناتۋ جۇمىستارى قارقىن الدى. سونىمەن بىرگە اپاتقا قارسى بريگادالار, 1400 قىزمەتكەر جانە 140 ارنايى تەحنيكا دايىن تۇر.
وسى رەتتە جايىق وزەنىندە ورنالاسقان سورعى ستانساسىن قورعاۋ شارالارى دا قابىلدانعان.
«جايىق وزەنىنىڭ جاعاسىندا «جايىقجىلۋەنەرگو» مەكەمەسىن سۋمەن, سونداي-اق قالا حالقىن اۋىز سۋمەن قامتاماسىز ەتەتىن سورعى ستانساسى بار. ودان كۇندەلىكتى شامامەن 60 مىڭ تەكشە مەتر سۋ الامىز. بۇل - ستراتەگيالىق نىسان. سوندىقتان ونىڭ اينالاسىنا قاپ توسەپ جاتىرمىز», دەدى ەنەرگەتيكا جانە تكش باسقارماسى باسشىسى ميراس مۇلكاي.
ەستەرىڭىزگە سالايىق, اتالعان وبلىستا الداعى سۋ تاسقىنىنا دايىندىق شەڭبەرىندە قاجەتتى كۇش جۇمىلدىرىلدى. تاسقىنعا قارسى ءىس-شارالارعا بارلىعى 6,3 مىڭنان استام ادام مەن 1,5 مىڭ تەحنيكا تارتىلدى. تۇرعىن ءۇي الاپتارىن نىعايتۋ بويىنشا شارالار قابىلدانىپ جاتىر.
