ويتكەنى, وبلىس اكىمدىگى مەن «قازاقمىس» اراسىنداعى مەموراندۋمعا سايكەس ەسكەرتكىش تۇرعان الاڭ قايتادان جاڭارتىلۋى ءتيىس ەدى. بۇل جۇمىس وتكەن جىلدىڭ 8 قازانىندا وبلىس اكىمى ب.ابدىعالي ۇلى مەن «قازاقمىس كورپوراتسياسى» جشس باسقارما توراعاسى ن.نۇريەۆتىڭ قاتىسۋىمەن سالتاناتتى جاعدايدا باستالعان ەدى. جالپى اۋماعى 0,7 گەكتاردى قۇرايتىن الاڭنىڭ 5600 شارشى مەترىنە جول جابىنى اۋىستىرىلىپ, 30 شاقتى سيرەن, 40 شاقتى جەمىس اعاشى وتىرعىزىلۋى جانە ت.ب. جۇمىستار اتقارىلىپ, 2023 جىلدىڭ سوڭىنا تامان ءبىتۋى كەرەك ەدى.
سودان بەرى التى اي ۋاقىت ءوتتى. بىراق بىتكەن ەشتەڭە دە جوق. سونىڭ كەسىرىنەن بيىل جەزقازعاندىقتار قالاداعى قانىش ساتباەۆ ەسكەرتكىشىنە تاعزىم ەتۋ, قۇرمەت كورسەتۋ مۇمكىندىگىنەن قاعىلدى. وبلىس باسشىلىعى 12 ءساۋىر - ۇلى عالىمنىڭ 125 جىلدىق مەرەيتويى كۇنى كورشىلەس ساتباەۆ قالاسىنا بارىپ, سول قالاداعى ەسكەرتكىشكە گۇل شوقتارىن قويدى. سالتاناتتى ءىس-شاراعا قاتىسۋشىلار اراسىنان «قازاقمىس» كورپوراتسياسى جشس باسشىلىعى بايقالمادى.
بار-جوعى 0,7 گەكتار تۇراتىن الاڭدى جارتى جىلدان بەرى جوندەي الماي جاتقاندار سوعىس ۋاقىتىندا 38 كۇندە سالىنعان زاۋىتقا باسشىلىق جاساعانداردىڭ ءبىرى بولعان قانىش يمانتاي ۇلى ساتباەۆتىڭ رۋحىنىڭ الدىندا قالاي اقتالار ەكەن؟
جەزقازعان قالاسى
