«وڭىردەگى توتەنشە جاعداي ۋاقىتىندا بالالاردىڭ قاۋىپسىزدىگىن قامتاماسىز ەتۋ ماقساتىندا جايىق وزەنىنىڭ جاعالاۋىندا ورنالاسقان اقجايىق, ءبورلى, بايتەرەك, تەرەكتى اۋداندارىنىڭ جانە ورال قالاسىنىڭ ورتا ءبىلىم بەرۋ, كاسىپتىك-تەحنيكالىق جانە قوسىمشا ءبىلىم بەرۋ ۇيىمدارى 15 ساۋىردەن باستاپ وقۋ پروتسەسىن ءتيىستى پلاتفورمالار ارقىلى قاشىقتان ۇيىمداستىرادى», دەلىنگەن وبلىستىق ءبىلىم باسقارماسى تاراتقان ءباسپاسوز حابارىندا.
قازىر ءبىلىم بەرۋ ۇيىمدارىنىڭ باسشىلارى وقۋشىلاردىڭ تەحنيكالىق وقىتۋ قۇرالادىرمەن قامتۋ جۇمىسىن ۇيىمداستىرىپ جاتىر.
ايتا كەتەيىك, جايىق وزەنىنىڭ جوعارى باستاۋىنان كەلە جاتقان مول سۋ 17-ساۋىردە باتىس قازاقستان وبلىسىنىڭ اۋماعىنا جەتەدى دەيدى ماماندار. قازىر سۋعا كەتۋى مۇمكىن ەلدى مەكەندەر مەن ساياجاي اۋماعىنان تۇرعىندار كوشىرىلىپ, ورال قالاسىنىڭ قورعانىس بوگەندەرى نىعايتىلىپ جاتىر.
بيىل سۋ تاسقىنى باستالعالى وڭىردە بارلىعى 1226 تۇرعىن ءۇي مەن 1 905 ساياجاي ءۇيى سۋ استىندا قالدى. 13 159 ادام قاۋىپسىز جەرگە كوشىرىلدى, ونىڭ ىشىندە 5 506-سى – بالا. قازىر وبلىس بويىنشا 17 ەۆاكۋاتسيالىق پۋنكتكە 1701 ادام جەتكىزىلدى. ولارعا قاجەتتى زاتتار مەن ازىق-ت ۇلىك ۋاقتىلى جەتكىزىلەدى.
ورال قالاسى اكىمىنىڭ ورىنباسارى جاندوس دۇيسەنعاليەۆتىڭ ايتۋىنشا, وبلىس ورتالىعىنىڭ ماڭىندا 25 مىڭداي حالىق ساياجاي, باۋ-باقشا سەرىكتەستىكتەرىندە تۇرىپ جاتىر.
بۇگىنگە دەيىن ورال قالاسى بويىنشا 1532 ساياجاي سۋعا كەتتى. سونداي-اق ءبورلى اۋدانىندا – 245, بايتەرەك اۋدانىندا – 112, تەرەكتى اۋدانىندا – 16 ساياجاي ءۇيىن سۋ باسقانى تىركەلگەن.
بۇدان بۇرىن حابارلاعانىمىزداي, باتىس قازاقستان وبلىسىنا ەلىمىزدىڭ ءار وڭىرىنەن گۋمانيتارلىق كومەك تە, ادامدار مەن تەحنيكا دا ۇزدىكسىز كەلىپ جاتىر. ءساۋىردىڭ 14-ءى كۇنى اقتوبە وبلىسىنان – 50, تۇركىستان وبلىسىنان – 49 ارنايى تەحنيكا كەلىپ جەتتى.
«اقتوبە وبلىسىنىڭ اكىمى اسحات شاحاروۆتىڭ ارنايى تاپسىرماسىمەن بۇگىن 50 ارنايى تەحنيكا - «كاماز» جۇك كولىكتەرى, توپىراق قازۋعا, تيەۋگە ارنالعان ءتۇرلى اۋىر تەحنيكا جەتكىزدىك. بۇگىن-ەرتەڭ 20 شاقتى ارنايى تەحنيكا تاعى كەلەدى. بۇل اقتوبە وبلىسىنداعى مەكەمە-كاسىپورىندار مەن كاسىپكەرلەردەن جينالعان. بۇلاردىڭ بارلىعى سۋ تاسقىنى قاۋپى سەيىلگەنشە وسى ايماقتا بولادى», دەيدى اقتوبە وبلىسى اكىمى اپپاراتى باسشىسىنىڭ ورىنباسارى قانىبەك جاقسىعاليەۆ.
«قازىر وبلىس سۋ تاسقىنىنىڭ ەكىنشى كەزەڭىنە دايىندالىپ جاتىر. جاعداي ءالى دە كۇردەلى. سەبەبى, رەسەيدىڭ ورىنبور وبلىسىنان كەلە جاتقان سۋ 17-19 ساۋىردە وبلىسقا جەتەدى دەگەن بولجام بار. بۇگىن جايىق وزەنىندەگى سۋ دەڭگەيى 759 سم بولدى. ياعني, قاۋىپتى دەڭگەيگە جەتىپ قالدى. سۋ دەڭگەيى 850 سم بولسا, جايىق ارناسىنان اسادى. سوندىقتان وزەن بويىنا 80 شاقىرىمعا جۋىق بوگەت تۇرعىزىلىپ, جايىق وزەنىنىڭ جاعاسى بارىنشا نىعايتىلىپ جاتىر. قازىرگى ۋاقىتتا اقجايىق, ءبورلى, بايتەرەك, تەرەكتى اۋداندارى مەن ورال قالاسىن سۋ باسۋ قاۋپى بار», دەدى بقو اكىمى ءباسپاسوز قىزمەتىنىڭ باسشىسى ەرحان تاتكەن.
وڭىردە سۋ تاسقىنىنان زارداپ شەككەن ازاماتتارعا جان-جاقتى كومەك كورسەتىلىپ جاتىر. جەرگىلىكتى بيۋدجەت ەسەبىنەن 677 وتباسىعا بىرجولعى الەۋمەتتىك كومەك رەتىندە 125 ملن تەڭگە قارجى تولەنگەن.
«بۇل جۇمىس جالعاسادى», دەيدى ەرحان تاتكەن.
باتىس قازاقستان وبلىسى
