رەسەيدەن كەلەتىن سۋ 17 ساۋىردە يانۆارتسەۆو اۋىلىنىڭ سۋ قويماسى ارقىلى وتەدى دەيدى ماماندار. سول ساتتەن باستاپ جايىق وزەنىندە سۋ تاسقىنىنىڭ شارىقتاۋ شەگى باستالادى دەپ كۇتىلەدى. 20-21 ساۋىردە ورالعا سۋ كەلەدى دەپ بولجانىپ وتىر. قازىر قۇتقارۋ جۇمىستارىنا 6 533 ادام جۇمىلدىرىلعان. 915 تەحنيكا, 21 سۋ ايداۋ قۇرالى, 32 ءجۇزۋ قۇرالى, 5 اۋە كەمەسى وسى قىزمەتتە ءجۇر.
ورال قالاسىندا جاعالاۋدى نىعايتۋ جۇمىسى ۇزدىكسىز ءجۇرىپ جاتىر. بىرقاتار تۇستا بۇل جۇمىس اياقتالىپ قالدى. قالا بويىنشا جالپى ۇزىندىعى 14,1 شاقىرىم جەردە سۋعا قارسى توسقاۋىل دايىندالعان. بوگەتتەردى بيىكتەتۋ, قۇم سالىنعان قاپشىقتارمەن نىعايتۋ ءۇشىن كۇن سايىن 200-دەن اسا تەحنيكا جانە مىڭعا جۋىق ادام جۇمىلدى. جەرگىلىكتى اتقارۋشى ورگان, توتەنشە جاعداي قىزمەتى, كوممۋنالدىق مەكەمەلەر مەن اسكەري بولىمدەردىڭ قىزمەتكەرلەرى, وزگە وڭىرلەردەن كەلگەن توتەنشەلىكتەر, قالاداعى ۆولونتەرلەر مەن بەلسەندى تۇرعىندار سۋ تاسقىنىنا دايىندىق جۇمىسىنا كۇنى-ءتۇنى ءبىر كىسىدەي اتسالىسىپ جاتىر.
ارينە, تاسقىننان زارداپ شەككەن حالىق بولاشاعىنا الاڭداپ وتىر. وسىعان بايلانىستى وبلىستىق پروكۋراتۋرا جۇيەلى تۇردە اقپاراتتىق-ءتۇسىندىرۋ جۇمىسىن جۇرگىزىپ, حالىققا كومەك كورسەتىپ جاتىر. سۋ تاسقىنى سالدارىنان مۇلكى ب ۇلىنگەن ادامدار مەملەكەت كومەگىن الا الادى. قازىردىڭ وزىندە 600-دەن اسا ازاماتقا 126 ملن تەڭگەدەن اسا بىرجولعى ماتەريالدىق كومەك تولەنگەن.
قازىر وڭىردە ۇيلەرىن سۋ باسقان جانە قاۋىپ تونگەن تۇرعىندار ءۇشىن 20 ەۆاكۋاتسيالىق بەكەت جۇمىس ىستەپ تۇر. مەكتەپتە, سپورت زالدارىندا جانە باسقا دا تۇرۋعا ارنالماعان ءۇي-جايدا ادامدار ءۇشىن قولايلى جاعداي جاساۋ قيىن. سوندىقتان بۇل تۇرعىندار بىرتىندەپ ءارتۇرلى جاتاقحانالارعا اۋىستىرىلىپ جاتىر.
ءساۋىردىڭ 13-ىندە جۇمىس ساپارىمەن باتىس قازاقستان وبلىسىنا كەلگەن دەنساۋلىق ساقتاۋ ءمينيسترى اقمارال ءالنازاروۆا دا ورال قالاسىندا بىرنەشە نىسانعا باردى. سونىڭ ىشىندە «باتىس سۋ ارناسى» جشس-نىڭ سۋ تازالايتىن زەرتحاناسى, جەرگىلىكتى سانيتارلىق-ەپيدەميولوگيالىق باقىلاۋ كوميتەتىنىڭ باكتەريولوگيالىق زەرتحاناسى بار. قوس زەرتحانا ماماندارىنىڭ ايتۋىنشا, تاسقىن سۋ باسۋ كەزەڭىندە وڭىردە اۋىزسۋدىڭ ساپاسى تالاپقا ساي. مينيستر قۇزىرلى مەكەمە باسشىلارىنا اۋىزسۋ ساپاسىن ەرەكشە باقىلاۋعا الۋدى تاپسىردى.
وڭىردە «قازسۋشار» مەكەمەسىنە قاراستى سۋ قويمالارىنا سۋ جيناۋ جۇمىسى دا قارقىندى ءجۇرىپ جاتىر. كەيىنگى مالىمەت بويىنشا, قويمالاردا 391,92 ملن تەكشە مەتر سۋ جينالعان, سۋ قويمالارىنىڭ ورتاشا تولۋى – 77,3%. وبلىستىق فيليال رەسەيدىڭ ورىنبور, ساراتوۆ وبلىستارىنىڭ سۋ شارۋاشىلىعى قىزمەتتەرىمەن كۇندەلىكتى اقپارات الماسىپ وتىر. ساراتوۆ وبلىسىنداعى پريۋزەن سۋ قويماسىنان قاراوزەن مەن سارىوزەنگە بۇگىنگە دەيىن 434,56 ملن تەكشە مەتردەن اسا تاسقىن سۋ قۇيىلعان. بۇل كولتاباندارعا, تابيعي شابىندىقتارعا, سونداي-اق سۋ قويمالارى مەن كولدەردى تولتىرۋعا باعىتتالىپ جاتىر.
قازىر شاعان سۋ قويماسىندا سۋ دەڭگەيى تولىق, 29,70 مەتر بولىپ تۇر. شاعان جانە دەركول وزەندەرى بويىنداعى گيدروبەكەتتەردە سۋ دەڭگەيى تومەندەگەنى بايقالادى. ورىنبور وبلىسىندا ورنالاسقان يرەكلى سۋ قويماسىنان جايىق وزەنىنە سۋ 13 ءساۋىر كۇنى سەكۋندىنا 447 تەكشە مەتر سۋ جىبەرىلىپ جاتىر. بۇل وسىدان بىرنەشە كۇن بۇرىنعى مولشەردەن اجەپتاۋىر تومەن. جايىق وزەنى دەڭگەيى ازىرگە تاۋلىگىنە 10-12 سم ءوسىپ كەلەدى. جالپى سۋ تاسقىنى باستالعالى وزەن دەڭگەيى ورال قالاسى تۇسىندا 6 مەترگە كوتەرىلدى.
توتەنشە جاعداي دەپارتامەنتىنەن كەلگەن سوڭعى مالىمەتكە قاراعاندا, باتىس قازاقستان وبلىسىندا ءالى دە 9 ەلدى مەكەن ورتالىقپەن قاتىناسا الماي وتىر. بۇل – قاراتوبە اۋدانىنداعى قوسباز, اققوزى, قورجىن, اقتايساي, بەسوبا, الاكول, ساۋلە, قاراقامىس اۋىلدارى, شىڭعىرلاۋ اۋدانىنداعى اقتاۋ اۋىلى. وڭىردە 1 905 ساياجايدى سۋ باستى. وسى كەزگە دەيىن 13 193 ادام ەۆاكۋاتسيالاندى, ونىڭ ىشىندە 5 522 بالا, 19 مۇمكىندىگى شەكتەۋلى ادام بار. ەۆاكۋاتسيالىق بەكەتتەردە 1 733 ادام ورنالاسقان, ونىڭ – 780-ءى بالا. 11 460 ادام تۋىستارىندا تۇرىپ جاتىر. سۋ باسقان جەرلەردەن 4 886 مال قاۋىپسىز جەرگە ايدالعان.
باتىس قازاقستان وبلىسى
