فوتو: اتىراۋ وبلىسىنىڭ تج جونىندەگى جەدەل شتاب
قازىرگى ۋاقىتتا اتىراۋ قالاسىنىڭ ماڭىندا ورنالاسقان, جايىق وزەنى مەن كاسپي تەڭىزى اراسىنداعى ماڭىزدى ارتەريا – سوكولوك كانالىن تەرەڭدەتۋ جانە كەڭەيتۋ جۇمىسى قارقىندى جۇرگىزىلىپ جاتىر, ونىڭ ۇزىندىعى – 24 شاقىرىم. ارنا كەڭەيتىلىپ, قالعان توپىراق بوگەتتەردى نىعايتۋعا قولدانىلادى. سونداي-اق, اتالعان كانال جانىنان قوسىمشا كانال سالىنىپ جاتىر. سوكولوك كانالىنان سۋ تاسىپ كەتكەن بولسا, ەكىنشى كانال رەزەرۆتىك گيدروتەحنيكالىق قۇرىلىس قىزمەتىن اتقارادى. قازىر 12 شاقىرىمى اياقتالدى.
اتىراۋ قالاسى بويىنشا عانا جاعالاۋدى نىعايتۋ بوگەتتەرىن سالۋعا 1 مىڭعا جۋىق ارنايى تەحنيكا, 3,2 مىڭ ءتۇرلى مەكەمەلەردىڭ قىزمەتكەرى جانە 3,5 مىڭنان استام ەرىكتى جۇمىلدىرىلدى.
جەرگىلىكتى ءتورت كومپانيانىڭ كۇشىمەن قاراوزەك كانالىنىڭ جاعالاۋىن بەكىتۋ جۇمىستارى جۇرگىزىلىپ جاتىر. ونىڭ ۇزىندىعى 35 شاقىرىمنان استام – اتىراۋ-ورال تاس جولىنان ەركىنقالا اۋىلدىق وكرۋگىنە دەيىن. بۇل كانال جايىقتىڭ ءبىر سالاسى بولعاندىقتان وزەن ءۇشىن ەرەكشە ماڭىزدى. مۇندا بوگەتتەردى نىعايتۋ (قوسىمشا 1,5-2 مەترگە كوتەرىلەدى), ارنانى, كوپىر وتكەلدەرى مەن شليۋزدەردى تازارتۋ جۇمىستارى جۇرگىزىلىپ جاتىر. سونىمەن قاتار, سوڭعى جىلدارى شارۋا قوجالىقتارىنىڭ قوجايىندارى كانال ارقىلى قۇبىرلار مەن توپىراقتان وتكەلدەر جۇرگىزگەن, ولار قازىر سۋدىڭ ءوتۋىن جاقسارتۋ ماقساتىندا اشىلىپ جاتىر.
قاراوزەك كانالىنىڭ جاعالاۋىن بەكىتۋ جۇمىستارىنا ءتورت كومپانيادان 350 ادام, 50-80 جەرگىلىكتى تۇرعىن مەن ەرىكتىلەر, سونداي-اق 70-تەن استام ارنايى تەحنيكا جۇمىلدىرىلعان. وسى تۇستا ايتا كەتسەك, جوسپارلانعان جۇمىستار اياقتالعاننان كەيىن اتالعان كومپانيالار مول سۋدىڭ كەلۋى كەزىندە باقىلاۋدى جالعاستىرادى. ال قاجەت بولعان جاعدايدا قيىن ايماقتارعا تارتىلادى.
جالپى, قالا ىرگەلەس اۋىلدىق وكرۋگتەرىمەن بىرگە 107 ۋچاسكەگە ءبولىنىپ, ارقايسىسىنا جاۋاپتى تۇلعا بەكىتىلىپ, اتقارىلعان جۇمىستار تۋرالى اقپارات كۇن سايىن جاڭارتىلىپ وتىر. سۋ تاسقىنىنا دايىندىق جۇمىستارىنا ىشكى ىستەر مينيسترلىگى مەن قورعانىس مينيسترلىگىنىڭ ۇلتتىق ۇلان بولىمشەلەرى جۇمىلدىرىلدى, باسقا وڭىرلەردەن تەحنيكالار كەلىپ جاتىر, وڭىردەگى ءىرى مۇناي كومپانيالارىنىڭ كۇشتەرى مەن قۇرالدارى دا جۇمىلدىرىلدى. سونىمەن قاتار, مەملەكەت باسشىسىنىڭ تاپسىرمالارىن ورىنداۋ اياسىندا جەرگىلىكتى كاسىپكەرلىك سۋبەكتىلەرى بەلسەندى اتسالىسىپ جاتىر.
