فوتو: سەناتتىڭ ءباسپاسوز قىزمەتى
ماۋلەن اشىمباەۆ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ Big Data بويىنشا سەمينار وتكىزۋ سەناتتىڭ تالداۋ مەكتەبى مەن جاس ساراپشىلار كلۋبى شەڭبەرىندەگى جۇمىستاردىڭ لايىقتى جالعاسى ەكەنىن اتاپ ءوتتى. مۇنداي جوبالار جاس مامانداردىڭ تالداۋ داعدىلارىن جەتىلدىرۋدى, كاسىبي ساراپتامالىق قاۋىمداستىقتاردى بىرىكتىرۋدى جانە سول ارقىلى قازاقستانداعى تالدامالىق جۇمىستىڭ ساپاسىن ارتتىرۋدى كوزدەيدى.
ايتا كەتسەك, قازىرگى ۋاقىتتا سەناتتىڭ ساراپتامالىق الاڭدارىنا قاتىسۋشىلار 200 ادامنان اسادى. ولار – ءتۇرلى سالادا ەڭبەك ەتىپ جۇرگەن جاس ماماندار.
«بۇگىندە ساپالى اناليتيكا جاساۋ ءۇشىن Big Data قاجەتتى شارتتاردىڭ بىرىنە اينالىپ وتىر. الايدا, ساراپشىلاردىڭ ءبارى بىردەي مەملەكەتتىك دەرەككوزدەردىڭ ناقتى مۇمكىندىكتەرىن جانە جاساندى ينتەللەكتتىڭ زەرتتەۋگە تيگىزەتىن ۇلكەن ىقپالىن بىلە بەرمەۋى مۇمكىن. سونداي-اق قازىرگى كەزدە اۋقىمدى دەرەكتەر بازاسىمەن ءتيىمدى جۇمىس ىستەي الاتىن مامانداردىڭ دا تاپشى ەكەنىن كورىپ وتىرمىز. سوندىقتان ءبىزدىڭ باستى مىندەتىمىز – ساراپشىلارعا وسى دەرەكتەرمەن جۇمىس ىستەۋدى ۇيرەتۋ, پراكتيكالىق شەشىمدەر قابىلداۋ ءۇشىن Big Data-نى قورىتۋدىڭ جاڭا, يننوۆاتسيالىق تاسىلدەرىن تابۋ جانە اتالعان مۇمكىندىكتەردى پايدالانىپ, ەلدىڭ دامۋىنا ارنالعان زەرتتەۋلەر جۇرگىزۋ», دەدى ماۋلەن اشىمباەۆ.
ءىس-شارادا الداعى دارىستەر شەڭبەرىندە Smart Data Ukimet ۇلكەن دەرەكتەر پلاتفورماسىن يگەرۋ بويىنشا پراكتيكۋم وتكىزىلەتىنى ايتىلدى. بۇل جۇيە 90-نان استام مەملەكەتتىك ورگاننىڭ اقپاراتتىق جۇيەلەرىنەن الىنعان دەرەكتەردى بىرىكتىرەدى جانە ۇلتتىق جي پلاتفورماسى سانالادى.
سەمينارعا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, جاساندى ينتەللەكت تەحنولوگيالارىن دامىتۋ جونىندەگى ساراپشىلار جانە مەملەكەتتىك دەرەكتەر بازاسىنىڭ جۇمىسىن قامتاماسىز ەتەتىن كومپانيالاردىڭ وكىلدەرى قاتىستى.
