اكۋشەرلىك – كەز كەلگەن مەملەكەت ءۇشىن انا مەن بالانىنىڭ اماندىعى مەن دەنساۋلىعىنىڭ كەپىلى بولسا, بۇۇ-نىڭ ورنىقتى دامۋ ماقساتتارىنىڭ 17-ءنىڭ التاۋىندا اكۋشەرلەردىڭ ىقپالى اتاپ وتىلەتىنى كەزدەيسوقتىق ەمەس.
«اكۋشەرلەر دەنساۋلىقتى نىعايتىپ, اۋرۋلاردىڭ الدىن الۋدا, انا مەن بالانى ەمدەۋ مەن كۇتۋدە ماڭىزدى ءرول اتقارادى. ددۇ مالىمەتتەرى مەدبيكەلەر مەن اكۋشەرلەر بۇكىل الەمدەگى دەنساۋلىق ساقتاۋ قىزمەتكەرلەرىنىڭ جارتىسىنا جۋىعىن قۇرايتىنىن دايەكتەيدى. اكۋشەرلەردىڭ كوشباسشىلىعىن ىلگەرىلەتىپ, كاسىبي دايارلىق باعدارلامالارىنىڭ كومەگىمەن تەڭ قۇقىلى جانە لايىقتى ەڭبەك جاعدايلارىنا قول جەتكىزۋدە مۇمكىندىكتەرىن كەڭەيتە ءتۇسۋ وتە ماڭىزدى», دەيدى ددۇ-نىڭ قازاقستانداعى ەلدىك كەڭسەسىنىڭ وكىلى سكەندەر سىلا.
ال قازاقستاندا اكۋشەرلىك تاجىريبەنى ودان ءارى دامىتۋ انا مەن بالا ءولىم-ءجىتىمىنىڭ دەڭگەيىن تومەندەتۋمەن قاتار, بىرقاتار وزەكتى مىندەتتەردى شەشۋدى قامتيتىندىقتان, I حالىقارالىق كونگرەسس ەۋروپالىق وداق ەلدەرىنىڭ مىسالىندا اۋىلدىق جەرلەردەن قالاعا دەيىن اكۋشەرلىك قىزمەت كورسەتۋ مودەلدەرىن تالقىلاۋ, جۇكتىلىك پەن بوسانۋ كەزىندە ىشتەگى شارانانىڭ جاعدايىن انىقتاۋ بارىسىنداعى اكۋشەرلەردىڭ ىقپالى, پەريناتالدىق شىعىنداردى سۇيەمەلدەۋدەگى ءرولى, پەرزەنتحانالارداعى ينفەكتسيالىق باقىلاۋعا اسەرى مەن باسقا دا ماڭىزدى كاسىبي ماسەلەلەر سياقتى وزەكتى تاقىرىپتاردى تالقىلاپ وتىر.
كونگرەسكە قاتىسۋشىلارعا ارنالعان قۇتتىقتاۋ سوزىندە قر دەنساۋلىق ساقتاۋ ءمينيسترى اقمارال ءالنازاروۆا: «اكۋشەرلىك كومەك جۇيەسىن ودان ءارى نىعايتۋ ءۇشىن وقىتۋ مەن دايارلىقتى ۇيىمداستىرۋعا ينۆەستيتسيا سالۋ, لايىقتى جالاقى, سونداي-اق قولداۋ مەن قۇرمەت كورسەتىلەتىن قاۋىپسىز ورتادا جۇمىس ىستەۋ مۇمكىندىگى قاجەت. سوندىقتان اكۋشەرلەردى دايىنداۋعا قاراجات سالىپ, ءاربىر ايەلگە ءومىرىنىڭ ەڭ ماڭىزدى ساتتەرىندە قاجەتتى كومەك پەن قولداۋعا قول جەتكىزۋگە مۇمكىندىك بەرەتىن ۋاقىت كەلدى. اكۋشەر ماماندارىن دايىندىق ساپاسى ولاردىڭ بوسانۋ كەزىندە ايەلدەر مەن جاڭا تۋعان نارەستەلەرگە قاۋىپسىز ءارى ءتيىمدى كۇتىم كورسەتۋ ءۇشىن قاجەتتى ءبىلىم, ماشىقتار مەن داعدىلاردىڭ بار-جوعىنا تىكەلەي تاۋەلدى. جۇكتىلىك پەن ايەلدەردىڭ امان-ەسەن بوسانۋى اكۋشەرلەردىڭ تاجىريبەسىنە, ءبىلىمى مەن كاسىبي شەبەرلىگىنە بايلانىستى ەكەنى بەلگىلى. سوندىقتان اكۋشەرلىك كومەك جۇيەسىنە سالىنعان ينۆەستيتسيالار ءاربىر ءسابيدىڭ قالاۋلى, ءاربىر بوسانۋدىڭ قاۋىپسىز بولۋىنا تاعى دا ءبىر قادام جاساۋعا مۇمكىندىك بەرەدى», دەيدى.
نازارباەۆ ۋنيۆەرسيتەتىنىڭ مەديتسينا مەكتەبىنىڭ ۆيتسە-پرەزيدەنتى ءارى دەكانى دوكتور ماسسيمو پينياتەللي: «اكۋشەرلەردىڭ حالىقارالىق كونگرەسى الەمدىك وزىق تاجىريبەلەردى جەرگىلىكتى قاجەتتىلىكتەرمەن بىرىكتىرۋ جولىنداعى ماڭىزدى باستاما. حالىقارالىق ستاندارتتار مەن زەرتتەۋلەردى قوسا العاندا, ءبىز ءاربىر انا مەن بالاعا كورسەتىلەتىن مەديتسينالىق كومەكتىڭ ساپاسىن ارتتىرۋعا ۇمتىلامىز. بۇل كونگرەسس ءبىزدىڭ دەنساۋلىق ساقتاۋ سالاسىنداعى بىلىكتىلىگىمىزدى ىلگەرىلەتۋگە پەيىلدى ەكەنىمىزدى كورسەتەدى جانە بارلىق مۇددەلى تاراپتارعا پايداسىن تيگىزەتىن مۋلتيديسپينارلىق ءتاسىلدى قولدانۋعا ىقپال ەتەدى», دەيدى.
ەكى كۇن بويى وتاندىق جانە حالىقارالىق سپيكەرلەرى العاشقى مەديتسينالىق-سانيتارلىق كومەك مودەلىندە اكۋشەرلىك قىزمەت كورسەتۋدىڭ نەگىزگى تاسىلدەرى تۋرالى بايانداپ, اكۋشەرلىك تاجىريبەدە ناقتى وقيعالارمەن قالاي جۇمىس ىستەيتىنىن, عىلىمعا نەگىزدەلگەن اكۋشەرلىك پراكتيكاداعى شەشۋشى ساتتەردى تالقىلادى.
كونگرەستە بوسانعاننان كەيىنگى قان كەتۋلەردىڭ الدىن الۋدا پنەۆماتيكالىق ەمەس شوكقا قارسى كوستيۋمدەردى (NASG) قولدانۋ, جۇكتى ايەلدەرگە پاتروناجدىق قىزمەت كورسەتۋدىڭ امبەباپ پروگرەسسيۆتى مودەلى مەن اكۋشەرلىك پراكتيكاداعى باسقا دا وزەكتى تاقىرىپتار بويىنشا شەبەرلىك سىنىپتارى وتكىزىلدى.
ءوز كەزەگىندە ءى حالىقارالىق اكۋشەرلەر كونگرەسىنىن ۇيىمداستىرۋعا ۇيىتقى بولعان AYALA قايىرىمدىلىق قورىنىڭ نەگىزىن قالاۋشى ارىپرەزيدەنتى ايدان سۇلەيمەنوۆا: ء«بىزدىڭ قور – 17 جىلدان بەرى قازاقستاننىڭ نەوناتولوگياسى مەن پەريناتولوگياسىن دامىتۋدا مەملەكەتكە جۇيەلى تۇردە كومەك كورسەتىپ كەلە جاتقان جالعىز قور. ءوز جۇمىسىمىزدا مەديتسينا جۇمىسكەرلەرىنىڭ كاسىبي دامۋىن قولداۋعا ەرەكشە كوڭىل بولەمىز. جىل سايىن قور تاياۋ جانە الىس شەت ەلدەردىڭ ۇزدىك پراكتيك ماماندارىنىڭ قاتىسۋىمەن قازاقستاندا تاجىريبەلىك شەبەرلىك سىنىپتارىن وتكىزەدى. سونداي-اق دارىگەرلەردى شەتەلگە وقۋعا, بىلىكتىلىگىن ارتتىرۋعا جىبەرەمىز. ءبىزدىڭ تەگىن بەينە كۋرستارى بار «AYALA ونلاين-اكادەمياسى» پلاتفورماسىندا 1,5 مىڭنان استام نەوناتولوگ جانە نەوناتالدىق مەدبيكە تىركەلگەن. وتكەن جىلى پەريناتالدىق ورتالىقتاردىڭ ورتا مەديتسينا قىزمەتكەرلەرىنىڭ قۇزىرەتتىلىگى مەن ساراپتاماسىن ودان ءارى دامىتۋعا وڭ سەرپىن بەرگەن العاشقى حالىقارالىق نەوناتالدىق مەدبيكەلەر فورۋمىن وتكىزدىك. بيىل قازاقستاندا العاش رەت حالىقارالىق اكۋشەرلەر كونگرەسىن ۇيىمداستىرىپ وتىرمىز. بۇل باستاما قر دەنساۋلىق ساقتاۋ مينيسترلىگى تاراپىنان قولداۋ تاپقانىنا قۋانىشتىمىز. تاقىرىپتار مەن سپيكەرلەردىڭ بارلىق قاتىسۋشىلار ءۇشىن وزەكتى ءارى قىزىقتى ەكەنىن كورىپ وتىرمىز. وسى فورۋمدا بولىسكەن ءبىلىم مەن تاجىريبە ەلىمىزدەگى اكۋشەرلىك تاجىريبەنى جەتىلدىرۋگە جانە ۇلت دەنساۋلىعىن نىعايتۋعا كومەكتەسەدى دەپ ۇمىتتەنەمىز», دەدى.
