سەنات توراعاسى تۇسىندىرگەندەي, ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى زاڭ اتا-انا قۇقىعىنان ايىرۋدى كوزدەمەيدى. قۇجات ەرەجەلەرى ايەلدەر مەن بالالاردىڭ قاۋىپسىزدىگىن ارتتىرۋ ماقساتىندا ازىرلەندى.
ماۋلەن اشىمباەۆ تۇسىندىرگەندەي, ەگەر اتا-انا ءوزىنىڭ بالاسىنا زيان كەلتىرگەن بولسا, تيىسىنشە جاۋاپقا تارتىلادى.
«ەگەر اتا-انا بالاسىنا قاتىگەزدىكپەن قاراپ, زورلىق-زومبىلىق ارەكەتتەرىنە بارسا, ءتيىستى ورگاندار قولدانىستاعى زاڭناماعا سايكەس اتا-انانى قۇقىقتارىنان ايىرۋ تۋرالى ماسەلەنى كوتەرە الادى. مۇنداي ماسەلەلەردى مەملەكەتتىك ورگاندار قارايدى, ودان ءارى سوتتا قارالادى جانە تەك سوت شەشىم قابىلداي الادى. ال سوت بالانىڭ مۇددەسىنە نەگىزدەلىپ شەشىم قابىلدايدى», دەدى م.اشىمباەۆ.
ەسكە سالايىق, بۇگىن سەناتورلار پالاتا وتىرىسىندا «قر-نىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى جانە وعان ىلەسپە «قر-نىڭ اكىمشىلىك قۇقىق بۇزۋشىلىق تۋرالى كودەكسىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا ماقۇلدادى.
