سۋرەتتى تۇسىرگەن – يگور بۋرگاندينوۆ
اشىق اڭگىمە بارىسىندا باسپا ءىسىنىڭ كوپقۇرامدى, كۇردەلى قۇبىلىس ەكەندىگى, سول سەبەپتى وزىنە ەرەكشە كوزقاراستى قاجەت ەتەتىنى باسا ايتىلدى. نەلىكتەن بۇكىل الەمدە دامىعان ەلدەر ءتۇرلى سۋبسيديا مەن پرەفەرەنتسيا ارقىلى باسپا باسىلىمدارىن قولدايدى؟ ويتكەنى گازەتتەر – وقيتىن ۇلتتى تاربيەلەۋدەگى ماڭىزدى ەلەمەنتتەردىڭ ءبىرى.
دۇنيەجۇزىلىك جەلىدە بەلگىلى ءبىر كونتەنتتى ورنالاستىرۋ ءۇشىن ينتەرنەتتىڭ بولۋى, ەڭ قيىن جاعدايلاردا ۆەب-سايتتى ازىرلەۋ جانە سەرۆەردى جالعا الۋ قاجەت بولسا, باسپا بيزنەسى ءبىر-بىرىمەن تىعىز بايلانىستى كاسىپورىنداردىڭ كۇردەلى تىزبەگىنەن – گازەت-جۋرنالداردىڭ رەداكتسيالارى, باسپاحانالار جەلىسى, سونداي-اق پوشتا قىزمەتىنەن تۇرادى. وسى كەزەڭدەردىڭ ارقايسىسىندا كەزدەسەتىن ماسەلەلەر بارلىعىنا ورتاق بولىپ سانالادى.
كەزدەسۋدە گازەت-جۋرنالداردىڭ باسپاحانادان سوڭعى تۇتىنۋشىعا دەيىن جەتكىزىلۋى, قاداعالانۋى ءۇشىن باقىلاۋدى قالاي كۇشەيتۋ كەرەك دەگەن نەگىزگى سۇراققا جاۋاپ ىزدەستىرىلدى. پوشتاشىلاردى ەڭبەككە ىنتالاندىرۋ ءۇشىن قانداي شارالاردى قاراستىرۋ كەرەك؟ مەرزىمدى باسىلىمدارعا جازىلۋ ناۋقانى ءار جولى كەدەرگىلەرگە تاپ بولماس ءۇشىن نە ىستەۋ كەرەك؟ تاراپتار وسى جانە باسقا دا ماسەلەلەرگە قاتىستى ءوزارا پىكىر الماسىپ, بىرلەسكەن جۇمىستى جەتىلدىرۋ, نىعايتۋ جونىندەگى ىقتيمال جوبالاردى تالقىلادى.
كەزدەسۋگە سونداي-اق «قازاق گازەتتەرى» جشس باس ديرەكتورىنىڭ ءبىرىنشى ورىنباسارى ۆلاديمير كۋرياتوۆ, «قازاق گازەتتەرى» جشس جارناما جانە جازىلۋ ءبولىمىنىڭ باسشىسى ولجاس شاريازدانوۆ, «قازپوچتا» اق وكىلدەرى – پوشتا سەرۆيسى جانە مەملەكەتتىك قىزمەت جونىندەگى باسقارۋشى ديرەكتور داۋلەت بەكمانوۆ, الەۋمەتتىك ەڭبەك قاتىناستارى, ەڭبەكتى قورعاۋ جانە قوعاممەن بايلانىس جونىندەگى باسقارۋ ديرەكتورى تالعات عازيزوۆ جانە باسقالار قاتىستى.
