مۇندا جۇمىس بارىنشا جۇيەگە قويىلعان. شتابتىڭ 15 مۇشەسىنىڭ ارقايسىسى وزىنە تيەسىلى مىندەتىن ءبولىسىپ الىپ, شاپقىلاپ ءجۇر. وڭىردە ەڭ العاش تاسقىن سۋدان تەرەكتى اۋدانىنداعى اڭقاتى اۋىلى مەن قاراتوبە اۋدانىنداعى اققوزى اۋىلدارى زارداپ شەكتى. ىلە-شالا دوستىق ۇيىندە اسسامبلەيا جاستارىنىڭ باستاماسىمەن تاسقىننان زارداپ شەككەن تۇرعىندارعا گۋمانيتارلىق كومەك كورسەتۋ ءۇشىن قابىلداۋ پۋنكتى اشىلعان.
«قيىن جاعدايعا دۋشار بولعان جەرلەستەرىمىزگە گۋمانيتارلىق كومەك كورسەتۋ باستاماسىن ەتنومادەني بىرلەستىكتەر, اقساقالدار جانە انالار كەڭەستەرى, وڭىرىمىزگە بەلگىلى كاسىپكەرلەر, ءىرى كومپانيالار, قوعامدىق ۇيىمدار جانە قالا تۇرعىندارى بىردەن قولداپ كەتتى», دەيدى «قوعامدىق كەلىسىم» مەكەمەسىنىڭ باسشىسى ايگۇل تۇركينا. ونىڭ ايتۋىنشا, شتاب قۇرامىنداعى تالعات چۋدوباەۆتىڭ قايىرىمدىلىق اكتسيالارىن ۇيىمداستىرۋدا ونداعان جىلدىق تاجىريبەسى بار.
«شتابتا گۋمانيتارلىق كومەكتى قابىلداۋ جانە ۇيىمداستىرۋ جۇمىسى ءۇشىن «Respublica» پارتياسىنىڭ بقوف رەسمي وكىلى دۋلات ماقاتوۆ جاۋاپتى. اسسامبلەيا جانىنداعى «بىرلىك» ازەربايجان ەتنو-مادەني بىرلەستىگى توراعاسىنىڭ ورىنباسارى, بقو قحا ەرىكتىلەر قوزعالىسى ورتالىعىنىڭ جەتەكشىسى ەلگۋن دجاناليەۆ نەگىزىنەن كومەكتى جيناۋ جانە جەتكىزۋدىڭ لوگيستيكاسىمەن اينالىسىپ جاتىر. ال كەلگەن كومەكتىڭ ەسەبىن جۇرگىزۋ جانە ماقساتتى ءبولۋ ءىسىن وڭىرلىك «اسسامبلەيا جاستارى» توراعا ورىنباسارى ساياسات جاراسوۆ موينىنا العان», دەيدى ايگۇل سەرىكقىزى.
شتاب تابيعي اپاتتان زارداپ شەككەندەرگە كومەك كورسەتۋ جۇمىسىن ۇتىمدى ۇيىمداستىرۋ ءۇشىن وبلىس اكىمى ن.تورەعاليەۆ, وبلىس اكىمىنىڭ ورىنباسارى ب.نارىمبەتوۆ, وبلىستىق توتەنشە جاعدايلار دەپارتامەنتى جانە بارلىق مەملەكەتتىك ۇيىممەن تىعىز بايلانىستا جۇمىس ىستەپ وتىر. «بارلىق وبلىستاعى شتاب كوورديناتورلارىمەن وتە تىعىز بايلانىستامىز. سونىڭ ارقاسىندا قايدا قانداي تاۋار بار, بىزگە قاشان كەلەدى دەگەن سۇراقتاردىڭ ناقتى جاۋابىن ءبىلىپ وتىرامىز. بۇل بىزگە وتە جاقسى كومەكتەسىپ وتىر», دەيدى شتاب باستىعى.
شتاب ارينە, ەڭ الدىمەن, تاسقىننان زارداپ شەگۋشىلەر ورنالاسقان ەۆاكۋاتسيالىق بەكەتتەرمەن تۇراقتى بايلانىس جاساپ, جاعدايدى باقىلاپ وتىر. وڭىردەگى «ۇلتتىق ۆولونتەرلىك جەلى» ۇيىمى, «Biz birgemiz Qazaqstan» قايىرىمدىلىق قورى, «امانات» پارتياسى, «Respublica» پارتياسى بقوف, جاستار رەسۋرستىق ورتالىعى, ازاماتتىق اليانس سياقتى ۇيىمداردىڭ جاستارى, ەرىكتىلەر – ءبارى كۇش بىرىكتىرگەندە, الىنباس اسۋ قالماعان. ەل باسىنا كۇن تۋعان كەزدە ەڭبەكتەگەن بالادان ەڭكەيگەن كارىگە دەيىن يگى ىسكە اتسالىسا كەتكەنى كوڭىلگە قۋانىش ۇيالاتادى.
«قابىلداۋ پۋنكتىمىز اشىلعان ساتتە «Sun City» قۇرىلىس كومپانياسى, «Respublica» پارتياسى, «بيرليك» ازەربايجان ەتنو-مادەني بىرلەستىگى, «بەلەس» كومپانياسى, جەكە كاسىپكەر ازات راشيدوۆ كەلىپ, كومەك قولىن سوزدى. ودان كەيىن بقو ىسكەر ايەلدەر قوعامدىق بىرلەستىگى, «وتدەل ستروي» كومپانياسى, «ەليون» ستوماتولوگيا ەمحاناسى, «New tex» بەلورۋس ورتالىعى, «جەلاەۆ» نان كومبيناتى, «قازاق انالارى داستۇرگە جول» بقو فيليالى, «تاريحي شەجىرە» رەسپۋبليكالىق ۇيىمى, «Artstroy Servis 07» كومپانياسى, «Faberlic» كومپانياسى جالعاستىرىپ, زور ۇلەس قوستى. قالا تۇرعىندارىنىڭ بەلسەندىلىگى دە ەرەكشە. قابىلداۋ پۋنكتى اشىلعان كۇننەن تولاسسىز كەلىپ جاتىر. كۇن سايىن سۋ تاسقىنىنان زارداپ شەككەندەرگە قانداي كومەك قاجەت ەكەنىن سۇراپ كوپ ادام حابارلاسادى. وسىندايدا «ەل ەكەنبىز!» دەپ ەڭسەڭ كوتەرىلەدى», دەيدى ايگۇل سەرىكقىزى.
شتاب جۇمىسىن باستاعالى 28 ناۋرىز بەن 8 ءساۋىر ارالىعىندا جينالعان گۋمانيتارلىق كومەكتىڭ جالپى قۇنى 54 ملن تەڭگەگە جۋىقتاپ قالىپتى. بۇل – ازىق-ت ۇلىك, جەمىس پەن كوكونىس, ءدارى-دارمەك, سانيتارلىق-گيگيەنالىق قۇرالدار, كيىم-كەشەك, تۇرمىستىق زاتتار, قۇرىلىس جانە باسقا دا تاۋارلار. بۇل كومەك سىرىم, قاراتوبە, ءبورلى, تەرەكتى جانە بايتەرەك اۋداندارىنا بىرنەشە قايتارا جونەلتىلگەن.
بۇدان بولەك, اسسامبلەيانىڭ «جۇرەكتەن – جۇرەككە!» ارنايى جوباسى اياسىندا بقو قحا ەرىكتىلەر قوزعالىسى, اسسامبلەيا جاستارى, «دوستىق ءۇيىنىڭ» قىزمەتكەرلەرى دە كومەگىن ءبىر كۇن توقتاتقان ەمەس. قوعامدىق دامۋ باسقارماسىنىڭ «قوعامدىق كەلىسىم» ۇجىمى قىزمەتكەرلەرى ءبىر كۇندىك جالاقىسىن اۋداردى.
ايگۇل سەرىكقىزى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ ۇجىمىنا, جەكە كاسىپكەر ەربولات كەڭەسوۆكە, تاتار مادەني ورتالىعىنا, «ۆايناح» شەشەن-ينگۋش قوعامىنا, ونىڭ توراعاسى دانيلبەك ساراتوۆقا, بقو قحا انالار كەڭەسىنىڭ ءتورايىمى شالقىما قۇرماناليناعا, كەڭەس مۇشەسى كۇلاش احمەتوۆاعا ەرەكشە ريزا.
«Asar-Ume» قايىرىمدىلىق قورىنىڭ نەگىزىن قالاۋشى اسحات نۋرماشەۆ جالپى ەسەبى 9,5 ملن تەڭگە كولەمىندە قارجىلاي كومەك كورسەتكەنىن ەرەكشە اتاپ وتكىمىز كەلەدى. بۇل قاراجاتقا 10 موتورلى قايىق پەن 60 ارنايى شلەمى بار كومبينەزون, 5 موتوسورعى جانە 5 گەنەراتور, رەزەڭكە ەتىكتەر ساتىپ الدىق. «ينۆەست پرودجەكت» جشس سابيلەرگە ارنالعان سانيتارلىق-گيگيەنالىق زاتتار, «ورال ءسۇت زاۋىتى» 20 قوراپ ءسۇت ونىمدەرى مەن 7 جۇپ رەزەڭكە ەتىك, «سۋلەيمەنوۆا» جك كيىم-كەشەك, اياقكيىمدەر, ءسابي جورگەكتەرىن, «SBS GRUP» جك 6 پاكەت جاڭا كيىم-كەشەك, «وتدەل ستروي ارۋوۆا» 4 پاكەت اياقكيىم, كيىم جەتكىزدى. سۋ تاسقىنىنا بايلانىستى اشىلعان «اقجايىق» جەكە قورىنا «Petro-Unit», «Salut Orto KZ» جشس, «حايمات» ورال نەمىس مادەني-اعارتۋ قوعامى» قب توراعاسى گەننادي فرانكتىڭ قولداۋىمەن 600 مىڭ تەڭگە قارجى اۋدارىلدى. «ماسيس» ارميان ەتنومادەني بىرلەستىگى جالپى سوماسى 2 700 000 تەڭگەنى قۇرايتىن كومەك كورسەتتى. ورال قالالىق «Medet Oral» قوعامدىق قورى 700 000 تەڭگە كولەمىندە ازىق-ت ۇلىكپەن كومەكتەستى. اتىراۋ قالاسىنان «AVC Group» كومپانياسى 4 500 000 تەڭگە كولەمىندە ماتەريالدىق كومەگىن تابىستادى. بۇلاردىڭ ءبارىن اتاپ شىعۋ مۇمكىن ەمەس», دەيدى ايگۇل سەرىكقىزى.
«توڭعان جاننىڭ ارقاسىنا شاپان جاپساڭ, جىلۋى سەنى دە جىلىتادى» دەگەن عوي. ەلدىڭ ىقىلاس-مەيىرىن ءوز قولىنان, ءوز جۇرەگىنەن وتكىزىپ جۇرگەن اسسامبلەيا مۇشەلەرى, گۋمانيتارلىق شتاب قىزمەتكەرلەرى كۇنى-ءتۇنى قىزمەت جاساپ جۇرسە دە ەلگەزەك قالپىنان تانباعان, شارشاماعان. مىنە, تاعى دا اسىعىس اتتانىپ بارادى. ويتكەنى ولاردى كۇتكەن ەل بار. ءتىلسىز جاۋ – تاسقىن ءالى باسەڭدەمەي تۇر.
باتىس قازاقستان وبلىسى
