سۋرەتتى تۇسىرگەن زامير عابدراحمانوۆ
ءساۋىردىڭ 9-ى كۇنى كەشكىسىن گۋمانيتارلىق كومەك تيەلگەن 4 جۇك كولىگى ورال قالاسىنا كەلىپ توقتادى. ايتا كەتەيىك, الاتوودان اقجايىققا بەت العان بەس كولىكتىڭ ءبىرى جولدا اقاۋلى بولىپ, ارال ماڭىندا قالىپتى. بىراق جوندەلىپ, جولعا تۇسكەن سوڭ ول دا دىتتەگەن جەرىنە جەتپەك.
ايىر قالپاقتى اعايىندى ورال حالقى جيىلىپ, قوشەمەتپەن قارسى الدى. باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ 3000 شاقىرىمنان استام جولدى ارتقا تاستاپ, قىرعىز ەلىنىڭ اماناتىن جەتكىزگەن اعايىنعا العىس ايتتى.
«جاردەم قولىن سوزعان قىرعىز ەلىنەن حالىقارالىق گۋمانيتارلىق كومەك اقجايىق وڭىرىنە جەتتى. قيىن كەزدە قولۇشىن سوزعان اعايىننىڭ بۇل جاقسىلىعىن قازاق ەلى ەش ۋاقىتتا ۇمىتپايدى. التى الاشتىڭ ۇلدارى باۋىرلاستىعىن الەمگە تاعى ءبىر مارتە پاش ەتتى. ءتىلىمىز ءبىر, ءدىلىمىز ءبىر, ءدىنىمىز ءبىر قىرعىز اعايىنعا قازاق ەلى اتىنان ايتار العىسىمىز شەكسىز», دەدى باقىتجان نارىمبەتوۆ.
ودان سوڭ باقىتجان حابەر ۇلى قىرعىز كوشىن باستاپ كەلگەن زاميربەك نارچاەۆقا «قىرعىز ەلىنە باتىس قازاقستان حالقىنىڭ اتىنان مىڭ العىس» دەگەن جازۋى بار دومبىرانى سىيعا تارتتى.
«ماسەلە بۇل كەلگەن جۇكتىڭ كولەمىندە ەمەس. قازاق حالقىنىڭ باسىنا كۇن تۋعاندا ەڭ الدىمەن كومەك قولىن سوزعان قىرعىز اعايىننىڭ ىقىلاس-نيەتىنە ريزامىز!», دەيدى ءماجىلىس دەپۋتاتى ابزال قۇسپان.
باۋىرلاس ەلدەن كەلگەن توپتىڭ باسشىسى, قىرعىز رەسپۋبليكاسى توتەنشە جاعدايلار مينيسترلىگىنىڭ وكىلى, پودپولكوۆنيك زاميربەك نارچاەۆ ورال قالاسىنا 28 ادام كەلگەنىن, سونىڭ 8-ءى قۇتقارۋشى ەكەنىن جەتكىزدى.
«پرەزيدەنتىمىزدىڭ تاپسىرماسىنا سايكەس, قىرعىزستان ەلىنەن جەتكىزىلگەن 300 توننادان استام گۋمانيتارلىق كومەك قازاقستاننىڭ ءتورت وبلىسىنا ءبولىندى. ورال قالاسىنا سونىڭ 80 تونناسىن جەتكىزدىك. مۇندا ازىق-ت ۇلىك, توسەك-ورىن, تۇرمىسقا ەڭ قاجەتتى بۇيىمدار بار», دەدى زاميربەك نارچاەۆ.
باتىس قازاقستان وبلىسى
