ازىرگە رەسپۋبليكالىق لاگەرلەردە سۋ تاسقىنىنان زارداپ شەككەن وتباسىلاردان 185 بالا جولداما الىپ وتىر. ونىڭ 10-ى – ءبورلى اۋدانىنان, 48-ءى – قاراتوبە اۋدانىنان, 32-ءسى – سىرىم اۋدانىنان, 60-ى – تەرەكتى اۋدانىنان, 35-ءى – ورال قالاسىنان.
– بالانىڭ اتى بالا عوي. ەۆاكۋاتسيالىق بەكەتتە ءىشى پىساتىن ەدى. كوڭىلى سەرگىپ, جاقسى دەمالىپ قايتادى دەپ ويلايمىن. ولار كەلگەنشە مىنا تاسقىننىڭ بەتى قايتىپ, قالىپتى تىرلىگىمىزگە ورالارمىز دەپ سەنەمىن. بار جاعدايىمىزدى جاساۋعا تىرىسقانى ءۇشىن بيلىك وكىلدەرىنە, وتانداستارىمىزعا وتە ريزامىن. ەلىمىز امان, جۇرتىمىز تىنىش بولعاي! – دەپ جانسۇلۋ تورەشوۆا ەسىمدى انا العىسىن ءبىلدىردى.
باتىس قازاقستان وبلىستىق ءبىلىم باسقارماسىنىڭ ءبولىم باسشىسى ءحاجاربيبى يسكاندەروۆا بەرگەن مالىمەتكە قاراعاندا, دەمالىس ورنىنا جولدانعان بالالاردىڭ العاشقى لەگى جولعا شىققان. ءبىرىنشى لەكپەن اتتانعان 70 بالا 10-24 ءساۋىر ارالىعىندا الماتى وبلىسىنداعى «تاۋ جاناشار» ساۋىقتىرۋ لاگەرىندە دەمالادى. ال 13 بالا 10-30 ءساۋىر ارالىعىندا الماتى قالاسىنداعى «بوبەك» ساۋىقتىرۋ ورتالىعىندا بولادى. بۇعان قوسا 102 بالا قىزىلوردا وبلىسى قازالى قالاسىنداعى «قامباش» ساۋىقتىرۋ ورتالىعىنا جولداندى. ول جاقتا وقۋشىلار 10 كۇن دەمالادى.
– ءبىزدىڭ ۇيگە سۋ كىرەتىن بولعان سوڭ ءبارىمىزدى اۆتوبۋسپەن سپورت زالعا جەتكىزدى. ال بۇگىن الماتىعا لاگەرگە جىبەرىپ جاتىر. قاسىمدا ەۆاكۋاتسيالىق بەكەتتە تانىسقان دوستارىم دا بار. مەن بۇرىن الماتىنى كورمەپ ەدىم. ول جاقتاعى دەمالىسىمىز جاقسى وتەدى دەپ ويلايمىن. ءبىزدى الماتى قالاسىنا جىبەرگەن اعا-اپالارعا, اتا-اناما ريزامىن, – دەيدى قۋانىشىن جاسىرا الماعان جاھانشا دوسمۇحامەد ۇلى اتىنداعى مەكتەپ وقۋشىسى ورازبەك سىرىمبەك.
باتىس قازاقستان وبلىسى
