ءداستۇرلى تەكسەرۋ اياسىندا 41433 اسكەري بولىمشەسىنىڭ ساربازدارى نورماتيۆتەر كەشەنىن تاپسىردى. الدىمەن اسكەري بولىمدەر جاۋىنگەرلىك ازىرلىككە كەلتىرىلىپ, مىندەتتەردى ورىنداۋ اۋدانىندا مارش جاسادى. مىنەز بەن كۇش-جىگەرى شىڭدالعان الاڭدا جاساق قازىرگى زامانعى ۇرىستىڭ تالاپتارى مەن شارتتارىنا ساي كۇندىز جانە تۇندە ارميالىق تاكتيكالىق وق اتۋ جاتتىعۋلارىن ورىندادى.
– «التىن جەبە-2024» كەشەندى تەكسەرۋ كەزىندە «قارابان» پوليگونىنداعى 41433 اسكەري بولىمشەسى كورسەتىلگەن مەرزىمگە 15 شاقىرىم تولىق ەسەپپەن شەرۋ وتكىزدى. بۇل تەكسەرۋلەردە توپتاردىڭ قۇرامى ولارعا جۇكتەلگەن مىندەتتەرگە بايلانىستى قالىپتاسادى. وسىعان بايلانىستى ولار بىرلەسىپ شەرۋ وتكىزىپ, قورعانىس ادىستەرىن پىسىقتاپ, باسقا دا ءىس-ارەكەتتەردى شىڭدادى. مۇنداي جاتتىعۋلار دالالىق داعدىلاردى جەتىلدىرۋگە, جاۋىنگەرلىك جاعدايعا جاقىن جاعدايدا جۇمىس ىستەيتىن بولىمشەلەردىڭ ۇيلەسىمدىلىگىنە ىقپال ەتەدى. ءدال وسىنداي جاعدايلاردا تاكتيكالىق ءبىر-ءبىرىنىڭ ارەكەتتەرىن سەزىپ جانە ءوز قابىلەتتەرىنە دەگەن سەنىمدىلىك پايدا بولادى. بارلىق قويىلعان مىندەت پەن ءنورماتيۆتى اسكەري قىزمەتشىلەر «وتە جاقسى» پىسىقتادى, – دەدى 41433 اسكەري بولىمشەسىنىڭ كومانديرى پودپولكوۆنيك جالعاس راحىمعاليەۆ.
بولىمشەلەردى تەكسەرۋ باعدارلاماسى جىل سايىن تولىقتىرىلىپ, كۇردەلەنىپ وتىرادى. جالپى ءىس-قيمىلدار دالا ايماعىندا جوسپارلانادى. بۇل ماسكيروۆكا جاساۋدا جانە شارتتى جاۋمەن كۇرەسۋدە ۇرىستى قيىنداتۋعا سەپ بولادى. تەكسەرۋ كەزىندە ساربازداردىڭ بارلاۋ-ىزدەۋ ارەكەتتەرى دە سىنالدى. سونداي-اق ولار اسكەري توپوگرافيا, ديۆەرسيالىق ءىس, رادياتسيالىق, حيميالىق جانە بيولوگيالىق قورعاۋ, مەديتسينالىق دايىندىق بويىنشا ارنايى نورماتيۆتەردى تاپسىردى.
