فوتو: ult.kz
سۋ تاسقىنىنان زارداپ شەككەن ايماقتاردا قۇرىلعان جەدەل كومەك كورسەتۋ شتابتارىنىڭ قۇرامىندا اۋماقتىق كاسىپوداق بىرلەستىكتەرىنىڭ توراعالارى بار. ولار جەرگىلىكتى جانە سالالىق كاسىپوداقتاردىڭ باسىن بىرىكتىرىپ, بارىنشا كومەك كورسەتىپ جاتىر.
قازىرگى كەزدە اتىراۋ مەن ورالدا جاعداي قيىندادى. كەشە عانا باتىس قازاقستان وبلىستىق كاسىپوداق ورتالىعىنىڭ توراعاسى ايگۇل ەسەكەنوۆامەن حابارلاسىپ, وڭىردەگى احۋالدى بىلدىك. سۋ دەڭگەيى 9 مەتردەن اسىپ كەتۋى مۇمكىن دەگەن بولجام بار. سول سەبەپتى 7 مىڭعا جۋىق ادامدى قاۋىپسىز جەرگە كوشىرىپ, جاعالاۋ بيىكتەتىلدى. باستاپقىدا اپاتتان زارداپ شەككەندەردى «اقجايىق» شيپاجايىنا ورنالاستىرۋ جوسپارلانعان ەدى. ءساۋىر ايىنىڭ باسىندا شيپاجايدىڭ ىرگەسىنە قىردان ەرىگەن قار سۋى كەلگەن. جۇمىسشىلار ءتورت كۇن بويى سۋدى موتورمەن سورىپ, بۇل قاتەردەن قۇتىلدى. الايدا ەندىگى قاۋىپ جايىق وزەنى دەڭگەيىنىڭ كوتەرىلۋىنە بايلانىستى تۋىنداپ وتىر. قازىرگى كەزدە اۋىلدىڭ تومەنگى جاعىنان ور قازىپ, سۋدى توقتاتپاقپىز.
سونداي-اق اتىراۋ وبلىسىنداعى 10 مىڭعا جۋىق كاسىپوداق مۇشەلەرى جايىق, قيعاش, شارون وزەندەرىنىڭ جاعالاۋىن نىعايتۋعا اتسالىستى. اۋماقتىق كاسىپوداقتار بىرلەستىگىنىڭ توراعاسى الىبەك سەمعاليەۆ اپاتتى وڭىردە 5 تاۋلىك بويى تىنباي جۇمىس ىستەپ جاتىر. قازىرگى كەزدە كاسىپوداق مۇشەلەرى سوكولوۆ كانالىنىڭ بويىمەن 14 شاقىرىمدىق بوگەت سالۋ جۇمىسىنا بەلسەندى كومەكتەسىپ جاتىر.
سونىمەن قاتار رەسپۋبليكالىق ماڭىزى بار جولداردى سۋ شايۋىنا بايلانىستى جۇمىس ورنىنا جەتە الماعان كاسىپوداق مۇشەلەرىن تەمىرجولمەن تاسىمالداۋعا جاعداي تۋعىزدىق.
قوستانايداعى ارىپتەستەرىمىزبەن دە كۇندەلىكتى بايلانىستامىز. ەر ازاماتتار بىرنەشە تاۋلىك بويى قاپتارعا قۇم تولتىرىپ, بوگەت سالسا, ايەلدەر ءۇي-ءۇيدى ارالاپ, تۇرعىنداردى, مالدى ەۆاكۋاتسيالاۋ تۋرالى تۇسىنىكتەمە جۇمىستارىن جۇرگىزەدى. مۇعالىمدەر تاماق ءپىسىرىپ, پسيحولوگتەر كۇيزەلىسكە ۇشىراعاندارعا قولداۋ كورسەتىپ جاتىر. بۇگىنگى تاڭدا 135 ەۆاكۋاتسيالىق بەكەتتە كاسىپوداق بەلسەندىلەرى اپاتتان زارداپ شەككەندەردى جايعاستىرىپ, ازىق-ت ۇلىكپەن قامتاماسىز ەتىپ ءجۇر. قاجەت بولعان جاعدايدا مەديتسينالىق كومەك تە كورسەتەدى.
اقتوبە وبلىسىندا جاعداي بىرتە-بىرتە تۇزەلىپ كەلەدى. وسى ۋاقىتقا دەيىن بەلگىلى بولعان مالىمەتتەرگە سايكەس سۋ تاسقىنىنان زارداپ شەككەن كاسىپوداق مۇشەلەرىنىڭ ءتىزىمى جاسالدى. جالپى سانى 730-عا جۋىق ادامعا كومەك كەرەك ەكەنى انىقتالدى. ەڭ كوبى – ءبىلىم بەرۋ سالاسىنىڭ وكىلدەرى. 400-گە جۋىق مۇعالىم كومەككە ءزارۋ. شىعىن كولەمى انىقتالعاندا, ءاربىر ارىپتەسىمىز ەلەۋسىز قالمايدى.
وسى تۇستا اقتوبە قالاسىنداعى اۋە قورعانىس كۇشتەرى اسكەري ينستيتۋتىنىڭ جەكە قۇرامىنا العىسىمدى بىلدىرگىم كەلەدى. 200-گە جۋىق ادام قارعالى وزەنىنىڭ جاعالاۋىن بەكىتۋ جۇمىسىنا جۇمىلدىرىلدى. ۇشقىشتار تۇرعىنداردى قاۋىپسىز جەرگە كوشىردى. سالالىق كاسىپوداق مۇشەلەرى ەۆاكۋاتسيالىق بەكەتتەرگە قاجەتتى زاتتار جەتكىزىپ, گۋمانيتارلىق كومەك كورسەتىپ جاتىر.
كاسىپوداقتار فەدەراتسياسىنىڭ باستاماسىمەن اۋماقتىق كاسىپوداق بىرلەستىكتەرى, سالالىق ۇيىمدار بىرىگىپ, ءبىر كۇندىك ايلىق جالاقىمىزدى سۋ تاسقىنىنان زارداپ شەككەندەرگە اشىلعان ەسەپشوتقا اۋدارامىز دەپ ۇيعاردىق. سونىمەن قاتار فەدەراتسياعا قاراستى شيپاجايلارعا زارداپ شەككەن وتانداستارىمىزدى ورنالاستىرۋ تۋرالى تاپسىرما بەرىلدى. «ۇيىمداسقان ۇتادى» دەگەندەي, قيىن-قىستاۋ كەزەڭدە شيراق قيمىلداپ, بىلەك سىبانا كىرىسسەك, بۇل سىناققا دا توتەپ بەرەمىز.
ساتىبالدى داۋلەتالين,
كاسىپوداق فەدەراتسياسىنىڭ توراعاسى
