بايقاعانىمىز, پرەزيدەنتپەن كەزدەسۋدەن كەيىن اۋىل تۇرعىندارىنىڭ كوڭىلىندەگى الاڭ سەيىلىپ, قۋانىشتى كۇيدە ءجۇر ەكەن. «حال-جاعدايلارىڭىزدى ءبىلۋ ءۇشىن ارنايى كەلىپ وتىرمىن. بۇل – بۇرىن-سوڭدى بولماعان ۇلكەن تابيعي اپات. سوندىقتان ءبارىمىز ءبىر ەل, ءبىر حالىق بولىپ ارەكەت ەتۋىمىز كەرەك. مەملەكەت, ۇكىمەت بارشاڭىزعا قولۇشىن بەرەدى. ماتەريالدىق, قارجىلىق كومەك كورسەتەدى. وعان ەش الاڭداماڭىزدار. ءبارى دۇرىس بولادى», دەگەن ەدى مەملەكەت باسشىسى.
– قادىرلى اعايىن, ەل باسىنا تۋعان وسىناۋ قيىن كۇندەرى بۇكىل حالقىمىز ءبىر جاعادان باس, ءبىر جەڭنەن قول شىعارىپ, جۇمىلا ارەكەت جاساپ جاتىر. مەن بۇگىن سىزدەرگە الماتى جانە تاراز قالالارىندا تۇراتىن مالىك ماسانوۆ, حارسان حيماموۆ, ايشا ليۋشيرقىزى, نۇرجان وتەپوۆ, رۇستەم ماشانلو سىندى كاسىپكەرلەر جىبەرگەن قايىرىمدىلىق كومەكتى تابىس ەتكەلى تۇرمىن. وسىنىڭ ءوزى ءبىزدىڭ بىرلىگىمىزدى ايقىنداپ, اۋىزبىرلىگىمىزدى كورسەتىپ تۇر. بۇل كورگەن قيىندىق تا ۇمىتىلادى. مەملەكەت باسشىسىنىڭ ءوزى كەلىپ, بارلىق كومەك كورسەتىلەتىنىن ايتتى. ءبىزدىڭ قازىرگى مىندەتىمىز – تاس-ءتۇيىن جۇمىلىپ, پرەزيدەنتتىڭ جانىنان تابىلۋ, قيىندىقتى بىرگە ەڭسەرۋ, – دەدى ا.قۇسپان.
ءبىر قىزىعى, وسى گۋمانيتارلىق كومەك اۋەلى اقتوبە قالاسىنا اكەلىنگەن ەكەن. جۇكتىڭ ءبىر بولىگىن اقتوبەدەن قاراتوبەگە جەتكىزۋ قاجەت بولعان كەزدە اقتوبەلىك گازەلشىلەردىڭ ۋاتساپ توبىنا حابارلاندىرۋ جاريالانعان.
– «قاراتوبەگە دەيىن ءۇش كولىك جۇك جەتكىزۋ كەرەك, اقىسى تولەنەدى», دەگەن حابار كەلدى. سۇراستىرساق, تاسقىننان زارداپ شەككەندەرگە گۋمانيتارلىق كومەك ەكەن. بىردەن اقىسىز-پۇلسىز ءوزىمىز جەتكىزىپ بەرەمىز دەگەن شەشىمگە كەلدىك. ءسويتىپ, ارىپتەستەرىم ساتبەك رومان ۇلى, ازامات تەمىرالين ۇشەۋمىز ءوز كولىگىمىزبەن, جانارمايىن ءوزىمىز قۇيىپ, الىپ كەلىپ وتىرمىز, – دەيدى ارالبەك سەيپىل ۇلى.
ارالبەك ءوزى وسى قاراتوبە اۋدانىنىڭ ءۇشانا اۋلىندا تۋىپ-وسكەن, 2002 جىلدان بەرى اقتوبەدە تۇرادى ەكەن.
– پرەزيدەنت ءدال ءبىزدىڭ اۋىلعا كەلىپ, بىزبەن جولىققانىنا ەرەكشە قۋاندىق. مەملەكەت باسشىسى بارلىق ۋايىمىمىزدى سەيىلتىپ, جۇباتىپ كەتتى. سونىمەن قاتار وسى كۇندەرى قاراتوبە اۋدانى باسشىلارى, جەرلەستەرىمىز عانا ەمەس, ەلىمىزدىڭ تۇكپىر-تۇكپىرىنەن كوپ كومەك جەتىپ جاتىر. سونىڭ بارىنە العىسىمىز شەكسىز. رامازان ايىندا جاساعان جاقسىلىقتارىڭىزعا اللا مىڭ ساۋاپ جازسىن, حالىق اتىنان ريزاشىلىعىمىزدى بىلدىرەمىز, – دەيدى اققوزىلىق ايدانا سادريدينوۆا.
ءدال سول كۇنى اققوزى اۋلى تۇرعىندارىنا قايىرىمدىلىق كومەك كورسەتكەن تاعى ءبىر توپ ازاماتتاردىڭ يگى ىسىنە كۋا بولدىق. «تۋعان اۋلىمىز سۋعا كەتتى», دەگەن سۋىق حاباردى ەستىگەن كەزدە, اققوزى اۋلىندا تۋىپ-وسكەن, بىراق تاعدىردىڭ جازۋىمەن ءار تاراپتا جۇرگەن اۋىلداستار ۋاتساپ جەلىسىندە باس قوسىپ, ورتاق ەسەپشوت اشقان ەكەن. وسىلايشا, ءبىر اپتانىڭ ىشىندە مىڭنان اسا ادامنان 22 ملن تەڭگە قاراجات جينالعان.
– ءبىز اۋىلداستارىمىزبەن كۇندە حابارلاسىپ, كۇندەلىكتى كەرەك-جاراعىن ورالدان جەتكىزىپ وتىردىق. بۇگىن اۋىل اقساقالدارىمەن اقىلداسىپ, وسى تابيعات اپاتىنان ەڭ كوپ زارداپ شەككەن 70 وتباسىنا 310 مىڭ تەڭگەدەن تابىس ەتتىك, – دەيدى وسى اكتسيانى ۇيىمداستىرۋشى, ورالدىق كاسىپكەر جاندوس ايتاليەۆ.
قاراتوبە اۋداندىق ىشكى ساياسات ءبولىمىنىڭ باسشىسى نۇرتاس ءسافۋلليننىڭ ايتۋىنشا, اۋدان ورتالىعىنداعى ەۆاكۋاتسيالىق بەكەتتە جاتقان اققوزىلىقتارعا ارنالعان گۋمانيتارلىق كومەك ەلىمىزدىڭ ءار تۇكپىرىنەن دە كەلىپ جاتىر ەكەن. تۇركىستان وبلىستىق جاستار رەسۋرستىق ورتالىعىنىڭ مامانى اقتورە مەيىرجان ۇلى باستاعان ەرىكتىلەر ارنايى كەلىپ, ءتىپتى اۋىل تۇرعىندارىنا ارناپ ەكى قازان پالاۋ باسىپ بەرىپتى.
ايتا كەتەيىك, تاسقىن سۋدان قازىر باتىس قازاقستان وبلىسىنىڭ 6 اۋدانى قاتتى زارداپ شەگىپ جاتىر. ولاردىڭ بارىنە دە جوعارىداعىداي كومەك كورسەتىلدى. وبلىستىق ورتالىق مەشىت جانىنان «قايىرىمدىلىق كەرۋەنى» ۇيىمداستىرىلدى. مەشىت جاماعاتىنان جينالعان قارجىعا اۋداندارعا ازىق-ت ۇلىك, كيىم-كەشەك جىبەرىلىپ جاتىر. ال ەتنومادەني بىرلەستىكتەردىڭ كۇشىمەن سۋ باسقان اۋىلدارعا 29 ملن تەڭگەنىڭ جاردەمى جونەلتىلگەن. «Biz birgemiz Qazaqstan» قايىرىمدىلىق قورى جانە «ۇلتتىق ۆولونتەرلىك جەلى ۇيىمىنىڭ» قولداۋىمەن «بقو جاستارمەن جۇمىس جونىندەگى رەسۋرستىق ورتالىعىنىڭ» جاستارى جانە ەرىكتىلەر سۋدان زارداپ شەككەن اقجايىق اۋدانىنا دا گۋمانيتارلىق كومەك جولدادى.
– ءبىزدىڭ جاستاردىڭ, ەرىكتىلەردىڭ كۇشىمەن وسى كەزگە دەيىن 250 توننادان اسا قايىرىمدىلىق كومەك جينالىپ, زارداپ شەككەندەرگە جونەلتىلدى. ەرىكتىلەر كەلگەن زاتتاردى ىرىكتەپ, قوراپتاۋ ىسىنە دە اتسالىسىپ جاتىر. «Biz birgemiz» قورىنان 100 قايىق, 50 موتوسورعى جەتتى. جەرگىلىكتى كاسىپكەرلەر دە بارىنشا كومەكتەسىپ, ەڭ الدىمەن نە كەرەك ەكەنىن سۇراپ, قولداۋ كورسەتىپ جاتىر. قازىر ورال قالاسىندا حالىقتان قايىرىمدىلىق كومەك قابىلدايتىن 4 بەكەت اشىلدى, – دەيدى باتىس قازاقستان وبلىستىق ازاماتتىق اليانسىنىڭ پرەزيدەنتى اسلان تاپيشەۆ.
باتىس قازاقستان وبلىسى
