فوتو: اقوردا ءباسپاسوز قىزمەتى
پرەزيدەنتكە ونەركاسىپتىك دامۋ, گەولوگيا, جەر قويناۋىن پايدالانۋ جانە قۇرىلىس سالالارىنداعى جۇمىستىڭ ناتيجەسى مەن الداعى كەزەڭگە ارنالعان جوسپارى جونىندە باياندالدى.
مينيستر بيىلعى قاڭتار-اقپان ايلارىندا قازاقستاننىڭ وڭدەۋ ونەركاسىبىندەگى ءوسىم 7,4 پايىزدى قۇراعانىن جەتكىزدى. ءوندىرىس كولەمىن ۇلعايتۋدا ماشينا جاساۋ, مەتاللۋرگيا, حيميا جانە جەڭىل ونەركاسىپ سياقتى سالالاردىڭ ۇلەسى زور. جالپى قۇنى 1,5 تريلليون تەڭگە بولاتىن 180 جوبانى جۇزەگە اسىرۋ جوسپارلانعان. سونىڭ ارقاسىندا 17,8 مىڭ جۇمىس ورنى اشىلماق.
مەملەكەت باسشىسىنا قۇرىلىس سالاسىنىڭ جاي-كۇيى تۋرالى مالىمەت بەرىلدى. بىلتىر 157 مىڭ تۇرعىن ءۇي سالىنعان. بيىل 172 مىڭ تۇرعىن ءۇي سالۋ كوزدەلىپ وتىر. سونداي-اق جالعا بەرىلەتىن 22 مىڭ تۇرعىن ءۇيدىڭ قۇرىلىسىنا مەملەكەتتەن 300 ميلليارد تەڭگەدەن استام قارجى بولىنگەن. «وتباسى بانكى» ارقىلى قارجىلاندىرۋ كولەمى 300 ميلليارد تەڭگەنى قۇرايتىن باعدارلاما ىسكە قوسىلادى. بۇل ەل ازاماتتارىنا 12 مىڭ يپوتەكالىق زايم بەرۋگە سەپتىگىن تيگىزەدى.
قاسىم-جومارت توقاەۆقا جەر قويناۋىن پايدالانۋ قۇقىعىن بەرۋگە قاتىستى اۋكتسيونداردى ەلەكتروندى فورماتتا وتكىزۋ ءۇشىن E-Qazyna.kz تسيفرلىق پلاتفورماسىنىڭ ىسكە قوسىلعانى جايىندا باياندالدى. بۇل باستاما پروتسەستىڭ اشىقتىعى مەن قولجەتىمدىلىگىن ەداۋىر ارتتىردى. اۋكتسيوندارعا Rio Tinto جانە Fortescue سياقتى الەمدىك ءىرى كومپانيالاردىڭ قاتىسۋى قازاقستاننىڭ رەسۋرستارعا باي كەن ورىندارىن زەرتتەۋگە مۇمكىندىك بەرەتىن باسەكەنىڭ ارتا تۇسكەنىن كورسەتەدى.
پرەزيدەنتكە مينيسترلىكتىڭ سۋ تاسقىنىنان زارداپ شەككەن تۇرعىندارعا كومەك كورسەتۋ جونىندەگى نەگىزگى جوسپارى تانىستىرىلدى. قازىرگى ۋاقىتتا سۋ باسقان وڭىرلەردە جاڭا تۇرعىن ءۇي سالۋ ءۇشىن جوبالىق-سمەتالىق قۇجاتتامانىڭ قۇنىن بەكىتۋ جۇمىستارى اياقتالىپ كەلەدى.
قاسىم-جومارت توقاەۆ اپاتتان قيراعان تۇرعىن ۇيلەردى تەز ارادا قالپىنا كەلتىرۋدى تاپسىردى.
