«اباي» ستيپەندياسىنىڭ ماقساتى – اباي ۋنيۆەرسيتەتىنىڭ دارىندى ستۋدەنتتەرىن قولداۋ, ولاردىڭ ينتەللەكتۋالدىق, عىلىمي-زەرتتەۋ الەۋەتىن قالىپتاستىرۋ جانە وقۋ-تانىمدىق قىزمەتىن ىنتالاندىرۋ.
مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە وقيتىن 2-4 كۋرس ستۋدەنتتەرى ەندى جاڭا بىلىمگە, عىلىمي-زەرتتەۋ جۇمىستارىنا دەگەن ۇمتىلىستارىن كورسەتۋگە مۇمكىندىك الدى. اتاۋلى ستيپەنديانىڭ يەگەرى بولۋ ءۇشىن وتكەن وقۋ كەزەڭدەرىندە ستۋدەنتتىڭ وقۋ ۇلگەرىمى تەك «وتە جاقسى» (ا, ا -) بولۋى كەرەك. الايدا, بۇل ىرىكتەۋ تالاپتارىنداعى جالعىز كريتەري ەمەس. پرەزيدەنتتىك ستيپەنديا الاتىن ستۋدەنتتەر «اباي» ستيپەندياسىنا ۇمىتكەر بولا المايدى.
ۇمىتكەرلەردى انىقتاۋ ەكى كەزەڭنەن تۇرادى. ىرىكتەۋ ءۇردىسى ۇمىتكەرلەردەن تەك اكادەميالىق شەبەرلىكتى, اكادەميالىق ادالدىقتى عانا ەمەس, سونىمەن قاتار ولاردىڭ عىلىمي زەرتتەۋلەرىن كورسەتۋدى تالاپ ەتەدى. كونكۋرستىڭ ەكىنشى كەزەڭىندە قاتىسۋشىلار عىلىم دەكاداسى اياسىندا عىلىمي-زەرتتەۋ جۇمىستارى بويىنشا باياندامالار جاساۋى ءتيىس. بۇل ستۋدەنتتەرگە وزدەرىنىڭ عىلىمي قابىلەتتەرىن كورسەتۋگە جانە بەلسەندى عىلىمي قوعامداستىقتىڭ ءبىر بولىگى بولۋعا مۇمكىندىك بەرەدى.
ۇسىنىلعان جۇمىستاردى تالقىلاپ, باعالاعاننان كەيىن جەڭىمپازدار ءار ينستيتۋت/فاكۋلتەت ۇسىنعان كۆوتاعا سايكەس انىقتالادى. بۇل ءۇردىس ۇزدىكتەردى تاڭداۋدا ادىلدىك پەن اشىقتىققا كەپىلدىك بەرەدى. ەڭبەگى مەن تالانتى تانىلعان ستۋدەنتتەر ءۇشىن «اباي» ستيپەندياسى جاڭا مۇمكىندىكتەرگە جول اشادى. اي سايىنعى 100 000 تەڭگە ستۋدەنتتەردىڭ عىلىمي ىزدەنىستەرىن قولداۋعا باعىتتالعان.
ۋنيۆەرسيتەتتە «اباي» ستيپەندياسىنىڭ ەنگىزىلۋى – ءبىلىم سالاسىن دامىتۋداعى جاي عانا قادام ەمەس, جاس ۇرپاقتى عىلىمعا, بىلىمگە ىنتالاندىرۋ, وسى سالاداعى اكادەميالىق جاڭا بەلەستەردى تابىستى باعىندىرۋعا شاقىرۋ. ولاردى ءدال وسىلاي قولداۋ – كەلەشەكتەرىن ءساتتى قالىپتاستىرۋعا ىقپالىن تيگىزەرى انىق.
الماتى
