قازىر باتىس قازاقستان وبلىسىندا سۋ تاسقىنىنا بايلانىستى جاعداي كۇردەلى. وبلىستا كىشى وزەندەردىڭ سۋ دەڭگەيى تۇسكەنىمەن, وبلىس ورتالىعى ارقىلى وتەتىن ءۇش وزەن – جايىق, شاعان جانە دەركولدە سۋ كوتەرىلىپ, تۇرعىندارعا قاۋىپ ءتوندىرىپ تۇر.
«الداعى بولجام بويىنشا جايىق وزەنىنىڭ دەڭگەيى ءساۋىردىڭ ەكىنشى جارتىسىندا رەسەيدەن كەلەتىن سۋدىڭ ەسەبىنەن 850 سم-گە جەتەدى دەپ وتىرمىز. بۇل – قاۋىپتى دەڭگەي. ورال قالاسىنىڭ ماڭىندا جايىق سۋى 650 سم-گە جەتكەن كەزدە اڭعارىنان اسىپ, اينالاسىنداعى ساي-سالاعا جايىلادى. بۇل – ساياجاي اۋماقتارىندا تۇراتىن حالىققا قاۋىپ تونەدى دەگەن ءسوز. ياعني پودستەپنوي اۋىلىنا دەيىنگى №1, 2, 3 ساياجاي اۋماعى, ەت كومبيناتى شاعىن اۋدانىنداعى باۋ-باقشا سەرىكتەستىگى, جالپى وزەن بويىنداعى ساياجايدىڭ بارىنە قاۋىپ بار», دەدى ت.شاپانوۆ.
ورال قالاسىنىڭ ماڭىنداعى ساياجاي اۋماعىندا 5 مىڭ ءۇي-جاي, 20 مىڭ ادام تۇراقتى تۇرىپ جاتقانى بەلگىلى. بۇگىندە سۋ باسۋى مۇمكىن ەلدى مەكەندەر مەن ساياجاي اۋماعىنان 6 مىڭنان اسا ادام ەۆاكۋاتسيالاندى. ولاردىڭ 3 مىڭنان استامى – بالالار. ەۆاكۋاتسيالىق بەكەتتەردە 1 مىڭنان اسا ادام ورنالاسقان, قالعانى تۋعان-تۋىستارىن پانالاعان.
بۇگىنگى تاڭدا سۋ تاسقىنىن جويۋ جانە اپاتتان قۇتقارۋ جۇمىسى ۇزدىكسىز ءجۇرىپ جاتىر. توتەنشەلىكتەر اۆتوجولداردىڭ 48 تۇسىن سۋ شايىپ كەتكەنىن, 23 جەردە جول ۇستىنەن وتكەنىن حابارلادى. ول جەرلەرگە كەزەكشىلىك قويىلعان.
بۇعان دەيىن حابارلاعانىمىزداي, كولىك قاتىناسى جوق 10 ەلدى مەكەنگە ازىق-ت ۇلىك قورىن جەتكىزۋ ۇيىمداستىرىلعان. سوڭعى دەرەكتەرگە قاراعاندا, 3 مىڭنان اسا ءۇي جانۋارى قاۋىپسىز جەرگە ايدالعان. ال ازىرگە سۋ تاسقىنى سالدارىنان 139 ءىرى قارا, 39 جىلقى, 1 413 قوي-ەشكى – بارلىعى 1 591 مال, 112 ءۇي قۇسى شىعىنعا ۇشىراعانى حابارلاندى. تولىق شىعىندى ارنايى كوميسسيا ەسەپتەيدى.
قازىر ورال قالاسى ماڭىندا قاۋىپتى جاعداي قالىپتاسىپ وتىر. وتكەن تاۋلىك ىشىندە 1 500-دەن اسا ادام كوشىرىلدى. مۇنىڭ 700-دەن استامى – بالا. سونداي-اق ۇزىنكول سۋ قويماسىنداعى قاۋىپتى جاعدايعا بايلانىستى تومەندە ورنالاسقان ۇزىنكول, بارباستاۋ, شاعان, كەمەر جانە يۋبيلەينوە اۋىلى تۇرعىندارى قاۋىپسىز جەرگە كوشىرىلىپ جاتىر.
قازىرگى ۋاقىتتا جاعداي تۇراقتى كۇردەلى جانە باقىلاۋدا تۇر. وڭىرگە وسىعان دەيىن اقتوبە وبلىسى اۋماعىندا بولعان ماڭعىستاۋلىق قۇتقارۋشىلار توبى كەلدى. ولار ورالدىق ارىپتەستەرىمەن بىرگە ورال قالاسىنداعى ء«بىرىنشى ساياجاي» جانە «ەكىنشى ساياجاي» تۇرعىندارىنا سۋ باسۋ قاۋپى جونىندە تۇسىندىرمە جۇمىسىن جۇرگىزىپ جاتىر.
باتىس قازاقستانداعى قيىن جاعدايعا ەلىمىزدىڭ تۇكپىر-تۇكپىرىنەن الاڭداۋشىلىق ءبىلدىرىپ جاتقان جاندار كوپ. ءساۋىردىڭ 4-ءى كۇنى «Amanat» پارتياسى شىمكەنت قالالىق فيليالى اتىنان 20 توننا گۋمانيتارلىق كومەك ورال قالاسىنا جەتتى.
«ورال قالاسىندا ءۇشىنشى ەۆاكۋاتسيالىق بەكەتى تولۋى جاقىن. تاعى 2 بەكەت بار, ولار دا تولسا, رەزەرۆتەگى 3 بەكەت دەرەۋ جاساقتالادى», دەپ حابارلادى توتەنشە جاعدايلار دەپارتامەنتىنىڭ ءباسپاسوز قىزمەتى.
تاسقىن سۋدان زارداپ شەككەن حالىققا مەديتسينالىق, پسيحولوگيالىق كومەك دەر كەزىندە جاسالىپ جاتىر. تجم اپاتتار مەديتسيناسى ورتالىعى قىزمەتكەرلەرى جانە بقو توتەنشە جاعدايلار دەپارتامەنتىنىڭ پسيحولوگى وليمپيادالىق رەزەرۆ ينتەرنات-مەكتەبىندەگى ەۆاكۋاتسيالىق بەكەتتە ورنالاسقان تۇرعىندارعا كومەك كورسەتتى.
وڭىردەگى قۇتقارۋ جۇمىستارىنا ارناۋلى قىزمەت وكىلدەرىنەن بولەك, «جايىق تازا قالا» جشس, №5517 اسكەري ءبولىم ساربازدارى, «تاۋلى قاراباق ۇرىس قيمىلدارى ارداگەرلەرى» قوعامى, «زەنيت» زاۋىتى قىزمەتكەرلەرى, ت.ب. كوپتەگەن مەكەمە-ۇيىم اتسالىسىپ جاتىر.
باتىس قازاقستان وبلىسى
