ءوزىنىڭ جۋرناليستىك جولىندا كوپتەگەن ەرلىك جاسادى. قازاقتىڭ كورچاگينى اتانىپ كەتكەن راحمەت وتەسىنوۆ اعامىز تۋرالى جەتپىسىنشى جىلدارى سوناۋ جاڭاوزەندە توپىراق جۇتىپ ءجۇرىپ دەرەكتى فيلم تۇسىرگەن تۋىندىگەردى ءومىر بويى باسشى بولىپ, كومفورت ىزدەگەن پەندە دەپ كىنالاي المايسىز.
جەلتوقسان كوتەرىلىسى كەزىندە مەملەكەتتىك تەلەراديو كوميتەتىنىڭ توراعاسى رەتىندە تازا قازاقشا ارنا اشۋ جونىندە ىسساپارمەن ماسكەۋدە جۇرگەنىندە ەلدەگى الاساپىراندى ەستي سالا وسىلاي قاراي قۇستاي ۇشقان ازاماتتىڭ وتانى ءۇشىن وتقا تۇسۋگە بار ەكەنىن باجايلاۋ قيىن ەمەس.
ەلۋ جىل بويى حالىقتى قاسىرەتكە ۇشىراتقان سەمەي پوليگونىن جابۋعا تىكەلەي اسەر ەتكەن ادامداردىڭ ءبىرى بولعان عادىلبەك ءمىناج ۇلىن «چەلوۆەك توتالنوگو دەيستۆيا» دەگەن اتقا يە بولعان ەرنەست حەمينگۋەيگە تەڭەگىڭ كەلەدى.
ايقىن دا ۇستامدى پوزيتسياسى بار عادىلبەك ءمىناج ۇلىنىڭ شەتەلدەن قاشىپ كەلگەن بەلگىلى عالىم, اقىن ءارى جۋرناليست ايتان ءنۇسىپحاندى ەشقانداي قۇجاتسىز ءوز قاراماعىنا قايمىقپاي جۇمىسقا قابىلداعانىن قانداستارىن قولداۋدىڭ كلاسسيكالىق ۇلگىسى دەپ ايتقان ابزال.
اقش-تىڭ ەكس-پرەزيدەنتى, بيىل ءجۇز جاسقا تولعالى وتىرعان دجيممي كارتەرمەن تالاي رەت تاباقتاس بولىپ, ادامزاتقا پايداسى بار بىرنەشە جوبانى بىرگە جۇزەگە اسىرۋعا قاتىسقان عادەكەڭە قىزىعا قارايتىنبىز.
الماعايىپ توقسانىنشى جىلداردىڭ بەل ورتاسىندا بۇۇ-نىڭ باس حاتشىسى بۋتروس گاليدەن سۇحبات العان جالعىز قازاقتىڭ شىعارماشىلىق ىزدەنىسى مەن شەبەرلىگىنە قايتا-قايتا قول سوققىڭ بار.
ەشكىممەن ارالاسپاي, بارىنەن بەزىپ, ۇيىنە تىعىلىپ جاتقان لەۆ نيكولاەۆيچ گۋميلەۆتىڭ ومىردەگى ەڭ سوڭعى سىرلاسى بولعان اعامىزدىڭ جۇرەگى كەڭ ادام ەدى.
ماقاش پراۆيتەل (مۇحامبەتجان بەكمۇحامبەتوۆ) تۋرالى جازعان «پياتىي سون» دەرەكتى پۋبليتسيستيكالىق كىتابى ىزدەنىس پەن دارىندىقتىڭ قوسپاسىنان تۋعان سۇبەلى ەڭبەك بولعان ەدى. ونىڭ مۇنداي ورەلى ىستەرىنىڭ ءبارىن ءتىزىپ شىعۋ مۇمكىن ەمەس.
الەمنىڭ ءار تۇكپىرىندەگى وركەنيەتتى ءبىر-بىرىنەن بولە-جارمايتىن, كەرىسىنشە ساباقتاستىرا تۇسىندىرەتىن ونىڭ ەرەكشە كوزقاراسى ءومىر جولىندا تۇيگەن تاجىريبەسى مەن كەمەل ءبىلىمنىڭ ارقاسىندا كەلگەنى تايعا تاڭبا باسقانداي انىق بىلىنەتىن. اتاسى شالاحمەت ءجۇز جاساعان كىسى ەدى. نەمەرەسى دە عاسىردى يەكتەپ قۇلاسا دەپ تىلەيتىنمىن. «ادامنىڭ دەگەنى ەمەس, اللانىڭ قالاۋى بولاتىنى» راس. باقۇل بول, اعا!
شارحان قازىعۇل,
پۋبليتسيست-جازۋشى
