فوتو: olympic.kz
ۇلتتىق قۇراما ساپىنان پاريج وليمپياداسىنا ليتسەنزيا جەڭىپ العانداردىڭ ءبىرى – بوكستان ايەلدەر قۇراماسى وكىلى كارينا يبراگيموۆا. ول بىلتىر قىتايدىڭ حانچجوۋ قالاسىندا وتكەن ازيا ويىندارىندا كۇمىس جۇلدە ەنشىلەپ, وليمپيادا ليتسەنزياسىنا يە بولدى.
تۋريزم جانە سپورت مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە كارينا يبراگيموۆا سپورتپەن 2012 جىلدان بەرى شۇعىلدانادى. ءوزىنىڭ ايتۋىنشا, ول سپورتقا كەزدەيسوق كەلگەن. اكەسى بوكستىڭ ۇلكەن جانكۇيەرى ەدى جانە يبراگيموۆتەر اۋلەتىنىڭ دوسى بوكستان جاتتىقتىرۋشى بولاتىن. ونى اكەسى مەن دوسى التى اي بويى بوكسپەن شۇعىلدانۋعا ۇگىتتەگەن. وسىلايشا, كارينانىڭ العاشقى جاتتىقتىرۋشىسى جانە تالىمگەرى اكەسىنىڭ دوسى بولدى.
«مەن بار بولعانى اكەمنىڭ كوڭىلى توق بولۋ ءۇشىن بوكسقا بارۋعا شەشىم قابىلدادىم. سول كەزدە اۋىلدا تۇراتىنبىز. باپكەرىم بوكس – وليمپيادالىق سپورت ەكەنىن ايتقان كەزدە «قايداعى وليمپيادا؟» دەپ ويلادىم. مەن جانە وليمپيا ويىنى – اسپان مەن جەر سياقتى كورىندى», دەيدى بوكسشى.
جەكە تالىمگەرى الەكساندر ۆىسوتسكيدىڭ ايتۋىنشا, كارينا وزگەلەردىڭ اراسىندا تارتىبىمەن, ەڭبەكقورلىعىمەن ەرەكشەلەنىپ تۇرادى. باپكەر قويعان بارلىق تاپسىرما مەن ماقساتتاردى بارىنشا ورىندايدى.
كارينا يبراگيموۆا – قازاقستاننىڭ ەڭبەك سىڭىرگەن سپورت شەبەرى, الەم چەمپيوناتتارىنىڭ ءۇش دۇركىن جۇلدەگەرى (2018, 2022, 2023), ازيا ويىندارىنىڭ كۇمىس جۇلدەگەرى (2023), ازيا چەمپيونى (2022), حالىقارالىق جانە ىشكى تۋرنيرلەردىڭ بىرنەشە دۇركىن جەڭىمپازى جانە جۇلدەگەرى.
جەكە جاتتىقتىرۋشىسىنىڭ ايتۋىنشا بوكسشى جارىسقا ناعىز بابىندا بارۋى ءۇشىن وليمپيا ويىندارىنا دەيىن كەمىندە 8 جەكپە-جەك وتكىزۋى قاجەت.
«پاريج وليمپياداسىنا دەيىن جارىس ءساتىن, اتموسفەراسىن سەزىنۋ ءۇشىن مىندەتتى تۇردە 1-2 تۋرنيرگە قاتىسۋدى جوسپارلاپ وتىرمىز. ويتكەنى جاتتىعۋدىڭ, سپاررينگ جاساۋدىڭ, جارىسقا قاتىسۋدىڭ ءجونى بولەك», دەيدى كارينا يبراگيموۆا.
