"قازاقستان حالىق پارتياسى" فراكتسياسىنىڭ بەس مۇشەسى ۇلتتىق ەكونوميكا ءمينيسترى نۇرلان بايبازاروۆقا دەپۋتاتتىق ساۋال جولدادى. ءماجىلىس دەپۋتاتتارى "ياندەكس.تاكسي" جانە قازاقستاندىق نارىقتا جۇمىس ىستەيتىن باسقا دا كومپانيالار ءۇشىن كوميسسيالىق مولشەرلەمەلەردى تومەندەتۋدى تالاپ ەتتى.
دەپۋتاتتار تاكسي سالاسىندا قىزمەت كورسەتەتىن كومپانيالاردىڭ قىزمەتى ءۇشىن كوميسسيانى تاپسىرىستىڭ 5-7% دەيىن تومەندەتۋدى نەمەسە ءبىر تاپسىرىس ءۇشىن 50 تەڭگەدەن 70 تەڭگەگە دەيىن بەلگىلەنگەن تولەم بەكىتۋدى ۇسىنىپ وتىر. دەپۋتاتتار تاكسي سالاسىندا پلاتفورمالىق جۇمىسقا ورنالاسۋدى ۇسىناتىن قازاقستاندىق كومپانيالاردىڭ دامۋىن قولداۋ تەتىكتەرىن ازىرلەۋدى ۇسىندى.
قازاقستان تاكسي قىزمەتىنىڭ قۇنى بويىنشا الەمدىك رەيتينگتە 73-ورىندا تۇر. 2024 جىلدىڭ ناۋرىز ايىنىڭ سوڭىندا تاكسي قۇنى ءبىر شاقىرىمعا 0,67 دوللاردى قۇراعان, بۇل بارلىق تمد ەلدەرىندەگى كورسەتكىشتەردەن اسىپ تۇسەدى.
دەپۋتاتتار ياندەكس.تاكسيدى “مونوپوليست" دەپ اتادى. ولاردىڭ ايتۋىنشا, كومپانيانىڭ قازاقستانداعى ءوسۋى نارىقتى باقىلاۋىنا جانە وعان اسەر ەتۋىنە مۇمكىندىك بەرەدى.
ياندەكس.تاكسيدە كوميسسيا تاريف پەن ايماققا بايلانىستى ءبىر ساپار ءۇشىن 11%-دان 17%-عا دەيىن وزگەرىپ وتىرادى. تاكسوپاركتاردىڭ تولەماقىسى 4% قۇرايدى. قازىر قازاقستاندا 200 000 ادام “ياندەكس.تاكسي” ارقىلى تابىس تاۋىپ وتىر, ونىڭ 50 000-ى ءۇشىن بۇل ولاردىڭ نەگىزگى تابىسى. دەپۋتاتتار ادام تاسىمالداۋ ارقىلى قوسىمشا تابىس تابۋ اقشانىڭ جوقتىعىمەن بايلانىستى ەكەنىن ايتتى.
- ءبىز ازاماتتاردىڭ تاكسي قىزمەتىنە جوعارى باعا تولەۋىن ادىلەتسىزدىك دەپ سانايمىز, ال جۇرگىزۋشىلەر بۇل سومانىڭ از عانا بولىگىن تازا تابىس تۇرىندە الادى, – دەلىنگەن دەپۋتاتتىق ساۋالدا.
قۇجاتقا قازاقستان حالىقتىق پارتياسىنىڭ دەپۋتاتتارى كەنجەعۇل سەيىتجان, يسلام سۇڭقار, يرينا سميرنوۆا, گاۋھار تاناشەۆا جانە مەگاررام مەگارراموۆ قول قويدى.
