مامانداردىڭ ايتۋىنشا, ورال قالاسى تۇسىنداعى شاعان جانە دەركول وزەندەرى قاۋىپتى دەڭگەيدەن اسىپ كەتتى, دەركول وزەنىنىڭ گيدروبەكەتىندە قاۋىپتى دەڭگەي 600-650 سم بولسا, قازىر سۋدىڭ دەڭگەيى 708 سانتيمەترگە جەتتى. ال شاعان وزەنىنىڭ گيدروبەكەتىندە 1 264 سم بولدى. جايىق وزەنىنىڭ دەڭگەيى دە ءسات ساناپ جوعارىلاپ, قازىر 583 سم-ءدى كورسەتىپ تۇر.
ادەتتە شاعان مەن دەركول وزەنى وبلىس ورتالىعى ماڭىندا ءبىر-بىرىنە قوسىلىپ, سوڭىنان جايىققا قۇياتىن. قازىر اتالعان ءۇش وزەننىڭ دە ارناسى قاتار تولىپ, توعىسىپ كەتتى. ءسويتىپ سۋ ارنامەن اعىپ ۇلگەرمەي, جان-جاعىنا جايىلا باستادى. وسىنىڭ سالدارىنان ورال قالاسىنداعى سامال شاعىن اۋدانىنا سۋ جايىلدى.
«قازىرگى ۋاقىتتا سامال شاعىن اۋدانىنىڭ تۇرعىندارىن قاۋىپسىز جەرلەرگە, ەۆاكۋاتسيالىق پۋنكتتەرگە كوشىرىپ جاتىر. بۇعان توتەنشە جاعدايلار مەن كوممۋنالدىق قىزمەت ماماندارى جۇمىلدىرىلعان», دەپ حابارلادى توتەنشە جاعدايلار دەپارتامەنتى.
وبلىس اكىمى ناريمان تورەعاليەۆ ءتۇن ىشىندە سامال شاعىن اۋدانىنا بارىپ, جاعدايدى ءوز كوزىمەن كورىپ قايتتى. قۇتقارۋشىلار ءتۇنى بويى «سامال 3» شاعىن اۋدانىندا اۋلالاردى قاراپ, داۋىس كۇشەيتكىشپەن قاۋىپتى ەسكەرتىپ, قالىپ قويعان ادامداردى الىپ شىقتى. تۇرعىنداردىڭ كەيبىرى ەۆاكۋاتسيادان باس تارتقان. نەگىزىنەن حالىقتىڭ باسىم بولىگى تۋىستارىنا الدىن الا كەتكەن.
«قازىر جارىق بار, تۇيىقتالۋدان قامتاماسىز ەتىلدى. ەۆاكۋاتسيالاۋعا بقو تجد جەكە قۇرامى, اپاتتار مەديتسيناسى ورتالىعى, №28237 اسكەري ءبولىمى, ۇلتتىق ۇلان №5517 اسكەري ءبولىمى, اۋماقتىق قورعانىس ارنايى تەحنيكالارمەن ءجۇر. وقيعا ورنىندا تجد باستىعى, وبلىستىڭ, قالانىڭ اكىمى جانە ونىڭ ورىنباسارى بار. توتەنشە جاعدايلار, پوليتسيا دەپارتامەنتتەرىمەن كەزەكشىلىك ۇيىمداستىرىلعان», دەپ حابارلادى قۇتقارۋشىلار.
دەركول وزەنى بويىنداعى وبلىستىق كارديولوگيالىق ورتالىق جانە ءبىلىم يننوۆاتسيالىق ليتسەيى بۇدان بۇرىن قاۋىپسىز جەرگە كوشىرىلگەن ەدى. سونىڭ ىشىندە كارديوورتالىقتا ەم الىپ جاتقان پاتسيەنتتەر – بارلىعى 77 ادام, تولىعىمەن قالالىق كوپبەيىندى اۋرۋحانا بازاسىنا جەتكىزىلدى.
وتكەن تۇندە ۇزىنكول اۋلىنىڭ جوعارى جاعىنداعى سۋ قويماسى تولىپ, بوگەت بۇزىلۋ قاۋپى تونگەندىكتەن اۋىلدان بارلىعى 705 ادام, ونىڭ ىشىندە 230 بالا قاۋىپسىز جەرگە كوشىرىلدى. بۇل حالىقتىڭ كوبى قالاداعى تۋىستارىنا تاراپ كەتسە, 5 ادام پودستەپنىي كەنتىندەگى مەكتەپ-ينتەرناتقا, 15 ادام ورال قالاسىنداعى №15 مەكتەپكە ورنالاستىرىلعان. ونىڭ جەتەۋى – بالا. كوشىرۋ جۇمىستارىنا بقو تجد جەكە قۇرامى جانە بقو پد كۇش-قۇرالدارى تارتىلعان.
وقيعا ورنىندا پارلامەنت سەناتى مەن ءماجىلىسى دەپۋتاتتارى ارمان وتەعۇلوۆ پەن ابزال قۇسپان دا ءجۇر. «رەسەيدەن كەلەتىن وزەندەردىڭ دەڭگەيى كۇرت كوتەرىلگەندىكتەن, قازىر ەلىمىزدە ەڭ كۇردەلى جاعدايدىڭ ءبىرى باتىس قازاقستان وبلىسىندا بولىپ تۇر», دەپ مالىمدەدى ا.قۇسپان.
قازىر ورال قالاسىندا 8 ەۆاكۋاتسيا بەكەتى بار. ول جەردە دارىگەرلەر, سانەپيدستانسا ماماندارى, پوليتسيا قىزمەتكەرلەرى تاۋلىك بويى كەزەكشىلىكتە ءجۇر.
«ماحامبەت اۋلىنىڭ شەت جاعىن سۋ باسىپ كەتۋىنە بايلانىستى تۇرعىندار مەكتەپ, كلۋبقا كوشىرىلىپ جاتىر. مەكتەپكە قازىرگى ۋاقىتتا ەكى وتباسى اكەلىندى. مەكتەپ قاشىقتان وقىتۋعا كوشتى», دەپ حابارلادى ءبىلىم باسقارماسىنىڭ ءباسپاسوز حاتشىسى.
وسى كۇندەرى وزگە دە ورگاندارمەن بىرگە پوليتسيا قىزمەتكەرلەرى دە ءتىلسىز جاۋمەن كۇرەستە كۇنى-ءتۇنى ارپالىسىپ ءجۇر. جالپى, وبلىس بويىنشا سۋ تاسقىنىنا قارسى جۇمىستارعا بارلىعى 703 پوليتسيا قىزمەتكەرى مەن 97 قىزمەتتىك تەحنيكا جۇمىلدىرىلعان. اسىرەسە سۋ باسىپ كەتكەن ەلدى مەكەندەردە پوليتسيا كۇشەيتىلگەن رەجىمدە قىزمەت اتقارىپ, ەۆاكۋاتسيالانعان ازاماتتاردىڭ مۇلكىن قورعاپ ءجۇر.
كەيىنگى دەرەكتەرگە قاراعاندا, وبلىس اۋماعىندا 5 مىڭعا تاياۋ تۇرعىن قاۋىپسىز جەرگە كوشىرىلگەن, ونىڭ تەڭ جارتىسى – بالالار. «قازىر ەۆاكۋاتسيالىق بەكەتتەردە 1 مىڭنىڭ ۇستىندە ادام جاتىر, قالعان 3 853 ادام تۋىستارىن ۋاقىتشا پانالادى», دەلىنگەن توتەنشەلىكتەر تاراتقان اقپاراتتا.
قۇتقارۋشىلار ادام عانا ەمەس, ءتورت ت ۇلىك مالدىڭ دا جاعدايىن ويلاستىرىپ, قازىر 3 مىڭنان اسا حايۋانات قاۋىپسىز جەرگە شىعارىلعان.
قازىرگى ۋاقىتتا ءوڭىردىڭ 10 ەلدى مەكەنىمەن قارىم-قاتىناس ۇزىلگەن. بىراق ول اۋىلداردىڭ تۇرعىندارى ازىق-ت ۇلىكتەن تاپشىلىق كورمەپتى. سەبەبى الدىن الا كەرەك-جاراق زاتتاردى جەتكىزۋ ۇيىمداستىرىلعان. ۇلتتىق ۇلانعا قاراستى مي-171 تىكۇشاعى ارقىلى قاراتوبە اۋدانىنىڭ قورجىن جانە ءۇشانا اۋىلدارىنا 2 توننا ازىق-ت ۇلىك جەتكىزىلگەن.
قۇتقارۋ جۇمىستارىندا ءتۇرلى مەكەمە-ۇيىمداردان 2 مىڭداي ادام ءجۇر, 365 تەحنيكا, 76 موتوسورعى قولدانىستا. بۇگىنگە دەيىن 804 773 تەكشە مەتر سۋ سورىلىپ, 170 749 قاپشىق قۇم توسەلىپتى.
وڭىردە ءتۇرلى دەڭگەيدەگى جولداردىڭ 26 جەرىنەن سۋ باسىپ وتسە, 51 جەردى سۋ شايىپ, ب ۇلىنگەن. جول مەكەمەلەرى ولاردىڭ كەيبىرىن قالپىنا كەلتىرۋگە كىرىسىپ تە كەتتى.
باتىس قازاقستان وبلىسى
