1926 جىلى الياسكا گۋبەرناتورى دجوردج پاركس جالاۋدىڭ نوبايىن بايقاۋ جاريالايدى. جارىس قورىتىندىسىندا 13 جاستاعى الياسكا تۇرعىنى بەنني بەنسون ۇزدىك تانىلىپ, 1 000 اقش دوللارى كولەمىندە وقۋ گرانتىن ۇتىپ الادى. ول سالعان تۋدا الياسكالىقتارعا تۇندە ۇنەمى جول كورسەتەتىن پوليار جۇلدىزى مەن كىشى ايۋ شوقجۇلدىزى بەينەلەنگەن. 1927 جىلى بەننيدىڭ ۇسىنعان جالاۋى رەسمي سيمۆول رەتىندە كوپشىلىككە تانىستىرىلدى. ال 1959 جىلى الياسكا رەسمي تۇردە شتاتتىق قۇرىلىمعا وزگەرگەنىمەن, كوك ءتۇستى جالاۋ ءرامىز رەتىندە قالا بەردى.
از قالدى...
الەمدەگى ايگىلى ۇزاقمەرزىمدى قۇرىلىس نىساندارىنىڭ ءبىرى – «Sagrada Familia» عيباداتحاناسى جاقىن كۇندەرى سالىنىپ بىتەدى.
يسپانيانىڭ بارسەلونا قالاسىندا ورنالاسقان بۇل عيماراتىڭ ىرگەتاسى 1882 جىلى قالانعان ەدى. ويلاڭىزشى, سودان بەرى 142 جىل ءوتتى. بىراق قۇرىلىس ءالى جالعاسىپ كەلەدى. ءبىر جاعى ونىڭ اتاعىن اسپانداتىپ تۇرعان دا وسى ۇزاق ۋاقىتقا سوزىلعان ەڭبەك كۇشى. الايدا ايگىلى عيماراتتىڭ قۇرىلىسىنا جاۋاپتى ەستەۆە كامپس مەجەگە جاقىن كۇندەرى جەتەتىنىن حابارلادى. ونىڭ ايتۋىنشا, قۇرىلىستى 2026 جىلعا دەيىن اياقتاۋ جوسپارلانعان. بۇل دەگەنىمىز – وسى عيماراتتىڭ ساۋلەتشىسى انتونيو گاۋديدىڭ قايتىس بولعانىنا ءجۇز جىل تولۋىنا وراي دەگەن ءسوز. ايتا كەتەيىك, ساۋلەتشىنىڭ تاعى ءبىر ەرەكشەلىگى – ول عيمارات جوباسىن تولىقتاي سىزىپ قويماعان. باسىنا كەلگەن يدەيالارىن اراعا ۋاقىت سالىپ وتىرىپ تۇسىرگەن ەكەن.
ەدەن جۋعىش «ەلگەزەك»
اقمولالىق وقۋشى ءابىلمانسۇر تولەپوۆ سمارتفون ارقىلى باسقارىلاتىن ەدەن تازارتقىش ماشينا ويلاپ تاپتى.
7-سىنىپتا وقيتىن ونەرتاپقىشتىڭ روبوتتەحنيكاعا قىزىعۋشىلىعى وتە جوعارى. ول – جاس زەرتتەۋشىلەرگە ارنالعان XIX «زەردە» رەسپۋبليكالىق زەرتتەۋ جوبالارىنىڭ «ينفورماتيكا, روبوتتەحنيكا, STEM ينجەنەريا» سەكتسياسى بويىنشا بايقاۋلارىنىڭ جەڭىمپازى. ءابىلمانسۇر: «ارمانىم – ادامنىڭ ءومىرىن جەڭىلدەتەتىن قۇرىلعىلاردى ويلاپ تابۋ. اسىرەسە اناما كومەكتەسكىم كەلەدى. ءوزىمنىڭ بولاشاق ماماندىعىمدى ءىت سالاسىمەن بايلانىستىرامىن», دەيدى. جاس عالىمنىڭ جەتەكشىسى, ينفورماتيكا ءپانى مۇعالىمى ءۇمىت ايتجانوۆانىڭ ايتۋىنشا, قازىر ەلەكترونيكامەن باعدارلامالىق قامتاماسىز ەتۋ سالاسىنداعى پروگرەسس ەداۋىر العا جىلجىعان. سونىمەن قاتار ول شاكىرتىنىڭ ەڭبەگى تازالاۋ ۇدەرىسىن ايتارلىقتاي جەڭىلدەتەتىنىن, جوعارى ساپا مەن تيىمدىلىكتى قامتاماسىز ەتەتىنىن اتاپ ءوتتى.
