سپيكەرلەر مادەنيەت جانە اقپارات مينيسترلىگىنىڭ اقپاراتتىق-تانىمدىق پلاتفورماسىن قۇرۋداعى باستى ماقساتى – ەلدىڭ مادەني مۇراسىن ناسيحاتتاۋ, ۇلتتىق برەندتى تانىتۋ ەكەنىن اتاپ ءوتتى. بۇل سايت قازاق مادەنيەتى مەن تاريحى تۋرالى تىڭ مالىمەت تاراتاتىن اقپارات كوزى بولاتىنىن ءسوز ەتتى.
ايتا كەتەيىك, سايتتىڭ قۇرىلۋى ەلىمىزدىڭ مادەني مۇراسى مەن الۋان تۇرلىلىگىنە الەمدىك قوعامداستىقتىڭ نازارىن اۋدارۋداعى ماڭىزدى قادام بولىپ وتىر. ەلىمىزدە, سونداي-اق جاقىن جانە الىس شەتەلدەردە مادەني قۇندىلىقتاردى ناسيحاتتاۋ – مەملەكەت باسشىسىنىڭ سالا الدىنا قويعان باسىم باعىتتارىنىڭ ءبىرى بولىپ قالا بەرەدى.
ەلىمىزدەگى مادەني مۇرانىڭ سان تۇرلىلىگىن كورسەتەتىن اۋقىمدى جوبا بۇۇ-نىڭ التى رەسمي تىلىندە جانە قازاق, تۇرىك تىلدەرىندە اقپارات تاراتادى. اقپاراتتىق پورتالدا ەلىمىزدىڭ بىرەگەي مۇراعات قورىنىڭ دەرەكتەرى ەرەكشە ورىن الادى. قۇجاتتار مەن مۇراعات ماتەريالدارىنىڭ باي تاريحي جيناعىنا قول جەتكىزۋدى قامتاماسىز ەتەتىن ءبولىم – زەرتتەۋشىلەر, تاريحشىلار ءۇشىن باعا جەتپەس رەسۋرس بولماق.
سايتتىڭ نەگىزگى ءبولىمى – ەلدەگى, الەمدەگى بارلىق مادەني جاڭالىقتاردان حاباردار ەتەتىن جاڭالىقتار بلوگى. بۇل بولىمدە قىزىقتى فەستيۆالدار, جارمەڭكەلەر, كونكۋرستار, سونداي-اق تەاتر قويىلىمدارى مەن وتاندىق كينوكارتينالاردىڭ پرەمەرالارى, تانىمال جانە جاس جازۋشىلار كىتاپتارىنىڭ تۇساۋكەسەرلەرى, كوركەم كورمەلەر, مەرەيتويلىق مەرەكەلەر, ءتۇرلى كولەمدەگى وڭىرلىك جوبالار جاريالاناتىن بولادى.
سونداي-اق پلاتفورمادا ەلىمىزدىڭ ونەرى مەن مادەنيەتىندەگى سوڭعى جاڭالىقتار قامتىلاتىن وتاندىق ءموبيلدى قوسىمشالار تۋرالى اقپارات بەرىلەدى. «قازاقستان مادەنيەتى جاساندى ينتەللەكت پريزماسى ارقىلى» ءبولىمى ۆيرتۋالدى شىندىق ارقىلى بارلىق ءوڭىر مەن ولاردىڭ كورىكتى جەرلەرىن زەرتتەۋگە مۇمكىندىك بەرەدى. پورتالدا اقپاراتتىق تەحنولوگيالارعا ەرەكشە ءمان بەرىلگەن. «Qazaq Culturە» ۆيرتۋالدى 3D-تۋرلارى ارقاسىندا ەلىمىزدىڭ ءتۇرلى وڭىرلەرىنە ساپار شەگىپ, ولاردىڭ كورىكتى جەرلەرىن كورۋگە بولادى. ال جاساندى ينتەللەكتتىڭ كومەگىمەن سايتقا كىرگەن ءار قوناق فوتوسۋرەتىن ەنگىزىپ, ءوزىن باتىر نەمەسە ۇلى دالا جاۋىنگەرى بەينەسىندە كورە الادى.
سايتتى دايىنداۋ بارىسىندا شەتەلدىك وزىق تاجىريبەلەر پايدالانىلدى. اتاپ ايتقاندا, تىركەلىپ, جازىلۋ ارقىلى تۋريستەر بەلگىلى ءبىر قالانىڭ نەمەسە جالپى ەلدىڭ كەز كەلگەن مۋزەيلەرىنە (تۇركيا تاجىريبەسى) بارا الاتىن بىرىڭعاي بيلەتتى ونلاين راسىمدەۋ قاراستىرىلعان.
سايتتىڭ باستى ەرەكشەلىگى – دەلدالدار قىزمەتى ءۇشىن ارتىق قارجى جۇمساماي, بارلىق مادەني نىساندارعا كىرەتىن بىرىڭعاي بيلەت جۇيەسى. بۇل قىزمەتتى قوسۋ ارقىلى «استانا حاب» ايتي اكسەلەراتورىنىڭ ستارتاپىن قولداۋ كوزدەلگەن. پورتال قولدانۋشىلارىنا ىڭعايلى بولۋ ءۇشىن بەلگىلى ءبىر مادەني ءىس-شارانىڭ بيلەتىن ساتىپ الۋعا سىلتەمە بەرىلەدى.
قىسقاشا ايتقاندا, «Qazaq Culture» – ەلىمىزدىڭ مول مادەني مۇراسى مەن تەرەڭ تاريحىنا قىزىعۋشىلىق تانىتاتىندارعا امبەباپ قۇرال بولماق.
