فوتو: qaz365.kz
كوميسسيا وتىرىسى جاڭارتىلعان قۇرامدا ءوتتى. كوميسسيانىڭ جاڭارتىلعان قۇرامىنا «قازاقستاننىڭ ازاماتتىق اليانسى» زتب پرەزيدەنتى بانۋ نۇرعازيەۆا مەن پارلامەنت ءماجىلىسىنىڭ دەپۋتاتى مارات ءباشىموۆ كىردى.
وتىرىس قورىتىندىسىنا سايكەس كوميسسيا كەلەسىدەي شەشىمدەر قابىلدادى. جالپى كولەمى 85 ملرد تەڭگەدەن اساتىن زاڭسىز يەمدەنىلگەن اكتيۆتەردى قايتارۋ تۋرالى بىرقاتار كەلىسىم ماقۇلداندى. مەملەكەتكە قايتارۋ جوسپارلانىپ وتىرعان اكتيۆتەردىڭ قاتارىندا قازاقستانداعى جانە شەتەلدەگى تۇرعىن ۇيلەر, اكىمشىلىك عيماراتتار, اقشالاي قاراجات, كومپانيالارداعى ۇلەستەر, قىمبات زەرگەرلىك بۇيىمدار, 10 مىڭ گەكتاردان استام جەر بار.
سونىمەن قاتار بۇرىن مەملەكەتتەن «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ (بۇدان ءارى – زاڭ) سۋبەكتىلەرىنىڭ ءبىرىنىڭ باقىلاۋىنا زاڭسىز وتكەن قۇنى 10 ملرد تەڭگەدەن اسا سوماعا باعالاناتىن پايدا بولۋى تۇسىنىكسىز كاسىپورىندى اكتيۆ رەتىندە مەملەكەت كىرىسىنە اينالدىرۋ تۋرالى سوتقا تالاپ-ارىز ەنگىزۋ ماقۇلداندى.
كوميسسيا شەشىمىمەن زاڭ سۋبەكتىلەرىنىڭ ءتىزىلىمى ەكى جاڭا تۇلعامەن تولىقتىرىلدى, ولارعا قاتىستى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتيىستى ءىس-شارالار قابىلدايدى.
«مەملەكەت باسشىسىنىڭ تاپسىرماسىمەن زاڭسىز يەمدەنىلگەن اكتيۆتەردى قايتارۋ جونىندەگى جۇمىستار كۇشەيتىلەدى. بۇل رەتتە بيزنەسكە قىسىم جاساۋعا جول بەرىلمەيدى. مەملەكەتكە قايتارىلعان بارلىق اكتيۆتەر الەۋمەتتىك پايدالى ماقساتتارعا باعىتتالادى», دەپ اتاپ ءوتتى و.بەكتەنوۆ.
