ءسوزىن بارشانى كورىسۋ كۇنىمەن قۇتتىقتاۋدان باستاعان پرەزيدەنت ەل اراسىندا بۇل كۇنى ەلىمىزدىڭ باتىس ايماعىنا ءتان مەرەكە دەگەن تۇسىنىك بار ەكەنىن, بىراق بۇل قازاقتىڭ كونەدەن كەلە جاتقان ءداستۇرى ەكەنىن ۇمىتپاۋىمىز كەرەكتىگىن ايتتى. تۇتاس ەل بولىپ, ناۋرىز مەيرامىن وسى كۇننەن, ياعني كورىسۋ كۇنىنەن باستاپ تويلاعانىمىز جاراسىمدى تىرلىك ەكەنىن ۇعىندىردى.
پرەزيدەنت: «العاشقى وتىرىس ۇلت ۇياسى ۇلىتاۋ جەرىندە وتسە, بىلتىر كيەلى تۇركىستاندا جينالدىق. بۇگىن تاعى ءبىر تاريحي ولكە – اتىراۋ وبلىسىنا كەلىپ وتىرمىز. ءۇشىنشى وتىرىستىڭ جايىق جاعاسىندا ءوتىپ جاتقانى تەگىن ەمەس. ايگىلى سارايشىق قالاسى وسى جەرگە ءتيىپ تۇر. بۇل شاھار ۇلىق ۇلىستىڭ, كەيىن قازاق حاندىعىنىڭ ماڭىزدى اكىمشىلىك جانە ساۋدا ورتالىعى بولعانى تاريحتان بەلگىلى», دەپ وتىرىستىڭ ءمان-ماعىناسىن ءتۇسىندىردى.
قۇرىلتايدا پارلامەنت جۇمىسى مەن قوعامىمىزدىڭ وزەكتى ماسەلەلەرىن شەشۋ بويىنشا قاجەتتى زاڭداردى قابىلداۋ تاجىريبەسى دە ءسوز بولدى. وسى ورايدا بالالار مەن جاستاردىڭ دەنساۋلىعىنا, ياعني تۇتاس ۇلتتىڭ بولاشاعىنا وراسان زور زيان كەلتىرىپ جاتقان ۆەيپتەردىڭ تارالۋىنا توسقاۋىل قويۋ ءۇشىن ناقتى مەحانيزمدەر ەنگىزىلىپ وتىرعان زاڭنىڭ قارالۋ بارىسى ءسوز بولدى. بۇل زاڭ سەناتتىڭ جالپى وتىرىسىندا بىرقاتار وزگەرىسپەن ماقۇلداندى.
مەملەكەت باسشىسى اتاپ وتكەن وزەكتى ماسەلەنىڭ ءبىرى – لۋدومانيا, ياعني قۇمارپازدىق. «لۋدومانيا – بەيبىت كۇندە ەلدىڭ شىرقىن بۇزىپ جاتقان قاتەر. سونىڭ كەسىرىنەن تالاي شاڭىراق شايقالدى. تالاي ازامات زاڭ بۇزىپ, قىلمىسقا ۇرىندى. قۇمار ويىن ءۇشىن قارىزعا باتىپ, وزىنە قول جۇمساعان جاندار تۋرالى حابارلار, وكىنىشكە قاراي, كۇن سايىن تاراپ جاتادى. بۇل دەرت جاس ۇرپاققا وتە ۇلكەن زيان كەلتىرەدى. ونلاين-ويىندار بالالاردىڭ كۇندەلىكتى ەرمەگىنە اينالىپ بارادى. قۇزىرلى ورگاندار بىلتىر ينتەرنەت-كازينونىڭ بەلگىسى بار 4 مىڭنان استام سايتتى بۇعاتتادى», دەپ اتاپ ءوتتى مەملەكەت باسشىسى.
تاعى ءبىر ماڭىزدى قۇندىلىق بۇل – زاڭ جانە ءتارتىپ. «زاڭ الدىندا – ءبارى بىردەي. بۇل – بارشاعا ورتاق مىزعىماس قاعيدا. مەملەكەت جۇگەنسىزدىككە, تارتىپسىزدىككە جانە بەيبەرەكەتتىككە ەشقاشان جول بەرمەيدى. مۇنى ءاربىر ازامات جەتە تۇسىنۋگە ءتيىس», دەي كەلە پرەزيدەنت بارشا ازاماتتى بارلىق جەردە, سونىڭ ىشىندە الەۋمەتتىك جەلىدە دە زاڭدى مۇلتىكسىز ساقتاۋعا شاقىردى.
اليشەر ساتىبالديەۆ,
سەنات دەپۋتاتى
