قاۋىلجىر وزەنى شالقار كولىن تولتىرىپ, تەمىرجول بويىنداعى ۇلپان, 67-رازەزدەگى ۇيلەرگە كىردى. تەمىر اۋدانىنىڭ شۇبارقۇدىق, ساركول, شۇبارشي, ەڭبەك, قۇمساي اۋىلدارىنا, مۇعالجار اۋدانىنىڭ ەمبى, بىرلىك, جاعابۇلاق اۋىلدارىنا سۋ كىرىپ, تاسجولداردى شايىپ, كوپىرلەردى بۇزدى, ەلەكتر باعانالارىن قۇلاتتى. قوبدا اۋىلىنا, ويىلدىڭ ءتورت اۋىلىنا كىردى. تجد مەن پوليتسيانىڭ قۇتقارۋ جاساقتارى تۇرعىنداردى ويىل اۋدانىنىڭ ورتالىعىنداعى مەكتەپ پەن كوللەدج عيماراتىنا ەۆاكۋاتسيالادى. ويىل اۋدانىنىڭ ەكپەتالى مەن قاراتال اۋىلدارى سۋ استىندا قالدى. ءۇي-جايى مەن مالىن تاستاپ كەتە الماعان كوپشىلىك ادام بويىمەن بىردەي كوتەرىلگەن سۋدان قاشىپ, ءبىر ءتۇن مەكتەپتىڭ شاتىرىنا شىعىپ, كومەك كۇتتى. ت.بيگەلدينوۆ اتىنداعى اسكەري اۋە كۇشتەرى ينستيتۋتىنىڭ ۇشقىشتارى قاراتال اۋىلىنىڭ – 27, كوگالى اۋىلىنىڭ 68 تۇرعىنىن ەۆاكۋاتسيالادى. ويىلمەن ارادا كولىك بايلانىسى ءۇزىلدى. ىرعىز وزەنىنىڭ سۋى قارابۇتاق, قاراساي اۋىلدارىنىڭ ۇيلەرىنە كىردى. ايتەكە بي اۋدانىندا بىلتىر سالىنعان ششەرباكوۆ بوگەتىن تاسقىن بۇزىپ, تەمىربەك جۇرگەنوۆ اۋىلىنا سۋ كىردى. ىرعىز اۋدانى قۇرىلىس اۋىلى ماڭىندا, سامارا-شىمكەنت تاسجولىنىڭ بويىنداعى كوپىردى اعىزىپ كەتتى. ۇلكەن سازدى وزەنىمەن جالعاسقان كىشى سازدىنىڭ ۇيدەي-ۇيدەي سەڭدەرى اقتوبە قالاسىنىڭ ورتاسىنا دەيىن بارىپ, ازەر توقتادى. ور وزەنى حرومتاۋ اۋدانىنداعى قوپا جانە تامدى اۋىلدارىنىڭ اراسىنداعى جولدى تالقاندادى.
28 ناۋرىزدا اقتوبە قالاسى مەن قوبدا, مۇعالجار, تەمىر اۋداندارىندا توتەنشە جاعداي جاريالاندى. سول كۇنى التى اۋداندا ەلەكتر جارىعى ءسونىپ, 200-گە جۋىق ءۇي سۋ استىندا قالدى, 2 870 ادام ەۆاكۋاتسيالاندى. ەلەك وزەنىنەن اقتوبە قويماسىنا ءبىر تاۋلىكتە 150 ملن تەكشە مەتر سۋ قۇيىلىپ, پلوتينانىڭ جارىلۋ قاۋپى تونگەن سوڭ سەكۋندىنا 1 مىڭ تەكشە مەتردەن سۋ جىبەرىلە باستادى. جايىلعان سۋ ەلەك وزەنى جاعالاۋى مەن قارعالى وزەنىنىڭ كىرپىشتى كوپىرىنە جاقىن جەردەگى تۇرعىن ءۇي الاپتارىنا جەتتى. قۇتقارۋشىلار مەن پوليتسيا جاساعى وسى جەردىڭ تۇرعىندارىن شۇعىل تۇردە ەۆاكۋاتسيالادى. وبلىس ورتالىعىنداعى 53 مەكتەپ ۋاقىتشا ەۆاكۋاتسيالاۋ ورتالىعىنا اينالدى. اقتوبەگە پرەمەر-ءمينيستردىڭ ءبىرىنشى ورىنباسارى رومان سكليار كەلىپ, جاعدايدى ءوز كوزىمەن كوردى. قازىر اقتوبە قالاسىندا – 32, ويىل اۋدانىندا – 17, تەمىر اۋدانىندا – 5, قوبدا اۋدانىندا – 6, حرومتاۋ اۋدانىندا – 1, ىرعىز اۋدانىندا 1 مەكتەپتى 3 108 ادام پانالاپ ءجۇر, ولاردىڭ 1 518-ءى – بالالار. وسى مەكتەپتەردىڭ وقۋشىلارى 5 ساۋىرگە دەيىن قاشىقتان وقيدى.
كۇتپەگەن جەردەن تاسقىن سۋدىڭ استىندا قالعان اقتوبەلىكتەر ۇيىمشىلدىقپەن ارەكەت ەتتى. وبلىس اكىمى اسحات شاحاروۆ پەن قالا اكىمى ازامات بەكەت سۋ تاسىعان مەزەتتەن باستاپ, تۇرعىنداردىڭ جانىنان تابىلدى. جەرگىلىكتى اتقارۋشى ورگاندار, توتەنشە جاعداي, پوليتسيا قىزمەتكەرلەرى, ۆولونتەرلەر, دەپۋتاتتار, قاراپايىم تۇرعىندار, كاسىپكەرلەر زارداپ شەككەندەرگە كومەك قولىن سوزدى. قارا سۋدى بەلدەن كەشىپ, ساياجايدا قالىپ قويعان ادامداردى, جان-جانۋاردى الىپ شىققان قۇتقارۋشىلاردىڭ ەڭبەگى زور. بۇل كۇندەرى سۋ باسقان جەرلەردەن تۇرعىنداردى كوشىرۋگە 1,5 مىڭ ادام, 320-دان اسا تەحنيكا مەن 70 موتوپومپا جۇمىلدىرىلدى. كوڭىلگە مەدەۋ بولاتىنى – ادامدار امان. وكىنىشتىسى, كوپتەگەن ءۇي تۇرۋعا جارامسىز بولىپ قالدى, مال شىعىنى كوپ, جولدار, ەلەكتر باعانالارى, گاز جەلىلەرى بۇزىلدى.
اقتوبە وبلىسى
