«ناۋقانشىلىققا سالىنىپ, اسىرا سىلتەۋگە مۇلدە بولمايدى. ەگەر مۇنداي وقيعالار انىقتالسا, ارنايى تەكسەرۋ جۇرگىزىلەدى. ءتيىستى باعا بەرىلەدى. 2019 جىلى ءوز جولداۋىمدا بيزنەسكە زاڭسىز كەدەرگى كەلتىرۋ مەملەكەت مۇددەسىنە قارسى باعىتتالعان قىلمىس رەتىندە قاراستىرىلاتىنىن ايتتىم», دەدى پرەزيدەنت.
وسىعان وراي بۇگىندە ادىلەتتى قازاقستان قۇرۋ جولىنداعى نەگىزگى مىندەتتەردىڭ ءبىرى – بيزنەستى قورعاۋ, كاسىپكەرلەرگە بارىنشا قولداۋ كورسەتۋ. پرەزيدەنت اتاپ وتكەندەي, الاياقتاردىڭ تايراڭداۋىنا جول بەرىلمەۋگە ءتيىس, الايدا قۇقىق قورعاۋ ورگاندارىنىڭ جانە ءتيىستى قاداعالاۋشى مەكەمەلەردىڭ ارەكەتتەرىنەن بيزنەس سۋبەكتىلەرى دە جاپا شەكپەۋى كەرەك.
سونىڭ ءبىر مىسالى – جۋىردا جوعارعى سوتتا كاسساتسيالىق شاعىم بويىنشا ازاماتتىق ءىس قارالىپ, بيزنەس وكىلىنىڭ قۇقىعى قورعالدى. بىزگە بەرىلگەن مالىمەتكە قاراعاندا, الماتىدا قالا قۇرىلىسىن باقىلاۋ باسقارماسى «اليانس-گاز» جشس اۆتوگاز قۇيۋ ستانساسىن ءوز بەتىنشە رۇقساتسىز سالىپ العان جانە جاۋاپكەر ءوز قاراجاتى ەسەبىنەن ونى بۇزۋعا ءتيىس دەپ سوتقا جۇگىنەدى.
ءبىرىنشى ساتىداعى سوت نىساندى رۇقساتسىز سالىنعان قۇرىلىس دەپ تانۋ تالاپتارى بويىنشا ءىس جۇرگىزۋدى توقتاتقان, ويتكەنى زاڭدا مۇنداي مازمۇنداعى تالاپتى قاراۋ كوزدەلمەگەن. بىراق جاۋاپكەردىڭ ءوز قاراجاتى ەسەبىنەن نىساندى بۇزۋعا ءتيىس دەگەن تالاپتى قاناعاتتاندىرعان. ويتكەنى سەرىكتەستىك ازاماتتىق كودەكستىڭ 244-بابى 1-تارماعىنا سايكەس رۇقسات ەتىلمەگەن قۇرىلىسقا قاتىستى عيمارات قۇرىلىسىنىڭ زاڭدىلىعىن راستايتىن دالەلدەمەلەردى ۇسىنباعانىن نەگىزگە العان. سونىمەن قاتار سوت تالاپ قويۋشىعا جانە قالالىق جوسپارلاۋ جانە ۋربانيستيكا باسقارماسىنا قاتىستى مەملەكەتتىك ساۋلەت-قۇرىلىس باقىلاۋ سالاسىندا وزدەرىنە جۇكتەلگەن فۋنكتسيالاردى تيىسىنشە ورىنداماۋىنا بايلانىستى جەكە ۇيعارىم شىعارعان.
اپەللياتسيالىق ساتىداعى سوت بۇل قورىتىندىلارمەن جانە قابىلدانعان سوت شەشىمدەرىمەن كەلىسكەن. الايدا جوعارعى سوت اتالعان شەشىمدەردىڭ كۇشىن جويىپ, جاڭا شەشىم شىعاردى. وسىلايشا «اليانس-گاز» جشس-نىڭ ءوتىنىشحاتى قاناعاتتاندىرىلدى.
كەڭىرەك ايتا كەتسەك, كاسساتسيالىق ساتىداعى سوت مىنا جايتتاردى نازارعا الدى. بۇل جشس 2016 جىلعى 9 جەلتوقسانداعى ساتىپ الۋ-ساتۋ شارتى نەگىزىندە جانارماي قۇيۋ ستانساسىنىڭ يەسى بولىپ سانالادى. قالا قۇرىلىسىن باقىلاۋ باسقارماسى تاراپىنان 2019 جىلدىڭ قىركۇيەگىندە جۇرگىزىلگەن تەكسەرۋ بارىسىندا جشس قولدانىستاعى جانار-جاعارماي قۇيۋ ستانساسىنىڭ عيماراتىندا قايتا جوندەۋ جۇمىستارىن جۇرگىزگەنى انىقتالعان. الايدا باقىلاۋشى ورگان رۇقسات ەتىلمەگەن قۇرىلىس رەتىندە عيماراتتى تۇگەلدەي سوت ارقىلى بۇزۋدى تالاپ ەتكەن. بىراق ءۇي-جايلار بۇلاي بۇزۋعا جاتپايدى, سەبەبى جشس-تا قۇقىق بەلگىلەيتىن قۇجاتتار بار.
سەرىكتەستىككە 600 مىڭ تەڭگەدەن استام ايىپپۇل تۇرىندەگى اكىمشىلىك جاۋاپكەرشىلىك بەلگىلەندى. ويتكەنى بىرىنشىدەن, اۆتوگاز ءۇشىن تسيستەرنانى رەكونسترۋكتسيالاۋ ءۇشىن قۇرىلىس-مونتاجداۋ جۇمىستارىنىڭ (قمج) باستالعانى تۋرالى حابارلاماسىز جانە شارۋاشىلىق جۇرگىزۋ قۇقىعىمەن جوبالىق-سمەتالىق قۇجاتتاماسىز جانار-جاعارماي قۇيۋ ستانساسىنىڭ تۇرعىن ەمەس ءۇي-جايلارىندا قمج جۇرگىزگەن. ەكىنشىدەن, بۇزۋشىلىقتاردى جويۋ تۋرالى ۇيعارىمدى ۋاقىتىلى ورىنداماعان.
وسى ءىستى قاراۋ كەزىندە توراعالىق ەتۋشى ن.ءشارىپوۆ بۇل سەرىكتەستىك اتالعان جەر تەلىمىنىڭ يەسى ەكەنىن اتاپ ءوتتى. 1999 جىلدان بەرى جۇمىس ىستەپ تۇرعان جانار-جاعارماي قۇيۋ بەكەتى ءوز شەگىنەن شىقپاعان. مەنشىك يەسىنىڭ قۇقىعىن ەشكىم جويماعان.
