– تورتكۇل دۇنيە نازارىن اۋدارىپ وتىرعان دۇنيەجۇزىلىك كوشپەلىلەر ويىندارىنا ازىرلىك قالاي؟ بالۋاندارىمىز ءتول ونەرىمىزدەن جەرگە قاراتپايدى دەپ ەل سەنىم ارتىپ وتىر.
– الەمنىڭ جۇزدەن اسا مەملەكەتىنەن سپورتشىلار كەلەدى دەپ جوسپارلانعان اۋقىمدى الامانعا ازىرلىك جۇيەلى تۇردە, ءوز اعىسىمەن اتقارىلىپ كەلەدى. ەكى جىل بۇرىن تۇركيانىڭ يزنيك قالاسىندا وتكەن IV دۇنيەجۇزىلىك كوشپەلىلەر ويىندارىنا قاتىسقان سپورتشىلار اراسىندا بالۋاندارىمىز قازاق كۇرەسىنەن ءتاۋىر ناتيجە كورسەتتى. التى سالماق دارەجەسىندە بەلدەسىپ, 2 التىن, 2 كۇمىس, 2 قولا مەدال يەلەندى. بىزگە جۇكتەلگەن مىندەت – وسى بيىگىمىزدەن تومەندەمەۋ.
كوشپەلىلەر ويىندارىندا كۇرەس تۇرلەرىنەن سىنعا تۇسەتىن بالۋانداردىڭ بەلدەسۋى جاقسىلىق ۇشكەمپىروۆ اتىنداعى جەكپە-جەك سارايىندا وتەدى. قازاق كۇرەسىنەن بولەك تۇرىكتىڭ اشىرتمالى ابا گۇرەشى, وزبەكتىڭ كۋراشى, وڭتۇستىك كورەيانىڭ سسيرىمى جانە قىرعىزدىڭ الىش ۇلتتىق ونەرى دە وسى كەشەندە ۇلىقتالادى. ءتول كۇرەسىمىزدەن ۇلتتىق قۇراما جاساقتالىپ, باپكەرلەر بالۋانداردىڭ بابىن كەلتىرىپ ازىرلىكتى باستاپ كەتتى. قوڭىر كۇزگە دەيىن 8 وقۋ-جاتتىعۋ جيىنىن وتكىزۋ جوسپارلانعان. ونىڭ ىشىندە گرۋزيا مەن تۇركياعا دا بارىپ دايىندىقتى پىسىقتايدى.
بيىل قاڭتار ايىندا ازەربايجاننىڭ باكۋ قالاسىندا وتكەن ەۋروپا چەمپيوناتىندا وسى قۇرلىقتا دا ءتول كۇرەسىمىزدىڭ ناسيحاتى جوعارى ەكەنى بايقالدى. بىرىككەن كۇرەس الەمىنە (UWW) قارايتىن ۇلتتىق كۇرەس تۇرلەرى ۇيىمىنىڭ باسشىسى, تۇركيا ازاماتى روديكا ماريا ياحىشتى ەۋروپا چەمپيوناتىن تاماشالاۋعا ارنايى شاقىرتتىق. قازاق كۇرەسىن دامىتۋدىڭ ستراتەگيالىق باعىتىن ايقىنداۋ ماقساتىندا ماريا ياحىشپەن ديدارلاستىق. قازاق كۇرەسى جازعى ازيا ويىندارى ودان كەيىن جازعى وليمپيادا باعدارلاماسىنا ەنۋى ءۇشىن قانداي قادام جاساپ, قارەكەت ەتكەن دۇرىس دەگەن ماسەلەنى كولدەنەڭ تارتتىق. بىرىككەن كۇرەس الەمى قازاق كۇرەسىن ۇسىنۋعا ىقىلاستى, بىراق شەشىمدى ازيا وليمپيادالىق كوميتەت پەن حالىقارالىق وليمپيادا كوميتەتى شىعارادى. ياعني سولاردىڭ ىقىلاسى قاشان اۋادى, سول كەزدە قازاق كۇرەسىنىڭ دە كۇنى تۋادى دەگەن ءۋاجدى ايتتى. بۇل جەردە تاعى مىناداي كىلتيپان بار. بۇعان دەيىن قازاق كۇرەسىنەن الەم كۋبوگى, دۇنيەجۇزى چەمپيوناتى, ازيا, ەۋروپا قۇرلىعىنىڭ بىرىنشىلىكتەرى نەگىزىنەن ەرەسەكتەر اراسىندا ءوتىپ ءجۇر. كەشەندى ويىندار باعدارلاماسىنا ەنەتىن سپورتتان دۇنيەجۇزىلىك دودالار جۇلگەسىن ۇزبەي ءداستۇرلى تۇردە جىل سايىن تەك ەرەسەكتەر ءۇشىن عانا ەمەس, جاسوسپىرىمدەر, جاستار اراسىندا دا ۇيىمداستىرىلۋى كەرەك. سوندا عانا بۇل سپورت ءتۇرىنىڭ كەلەشەگى كەمەل ەكەنىنە جوعارىدا ايتقان حالىقارالىق كوميتەتتىڭ كوزى انىق جەتۋگە ءتيىس.
– ىشكى بىرىنشىلىكتىڭ باسەكەسىنە قاتىسۋشى بالۋانداردىڭ كوپتىگى قازاق كۇرەسىنە قىزىعۋشى جاستاردىڭ قاتارى ارتىپ كەلە جاتقانىن اڭعارتقانداي. 2010 جىلدان بەرى تۇراقتى وتكىزىلەتىن «قازاقستان بارىسى» رەسپۋبليكالىق ءتۋرنيرى سەڭدى قوزعاپ, قالتارىستا قالعان ۇلتتىق سپورتىمىزعا سەرپىلىس اكەلگەنى دە راس.
– ءسوزىڭىزدىڭ جانى بار, جىلدان-جىلعا قازاق كۇرەسىمەن شۇعىلدانۋشى ادامداردىڭ قاتارى ارتۋىنا دۇنيەجۇزى چەمپيوناتى, الەم كۋبوگى, ازيا چەمپيوناتى, «قازاقستان بارىسى», «الەم بارىسى», «ەۋرازيا بارىسى» سىندى بايراقتى دودالاردىڭ ءوتۋى سەرپىن بەردى. ستاتيستيكالىق دەرەكتى سويلەتسەك, بۇگىندە ەلىمىزدە 150 مىڭعا جۋىق ادامدى قازاق كۇرەسىنە باۋليتىن 3 897 ۇيىرمە بار. ونىڭ ىشىندە 2 735 ۇيىرمە اۋىلدىق جەرلەردە اشىلىپ, جاستاردىڭ ءتول سپورتىمەن شۇعىلدانۋىنا مۇمكىندىك تۋدىرىپ وتىر. شالعايداعى ەلدى مەكەندەردە قازاق كۇرەسىن ۇيرەنىپ, ۇلتتىق ونەرىمىزدى دارىپتەپ جۇرگەندەردىڭ قاتارى 70 مىڭنان اسادى. بىلتىر بەس جاس ەرەكشەلىگى بويىنشا وتكەن قازاقستان چەمپيوناتىنا ىرىكتەۋ دوداسىنا 5 مىڭنان اسا بالۋان قاتىستى.
كوللاجدى جاساعان – زاۋرەش سماعۇل ,«EQ»
– 2017 جىلى تۇرىكمەنستاننىڭ استاناسى اشعابادتا وتكەن جابىق كەشەندەگى ازيا ويىندارىنىڭ باعدارلاماسىنا قازاق كۇرەسى ەندى دەپ قۋاندىق. ءۇش سالماقتا بالۋاندارىمىز بارىپ كۇرەستى. ەندىگى مەجە جازعى ازيا ويىندارىنىڭ باعدارلاماسىنا ەنگىزۋ تۋرالى تالاي رەت ايتىلىپ, جازىلىپ تا كەلەدى. قانداي قام-قارەكەت جاسالىپ جاتىر؟
– ءبىز قازاق كۇرەسىن جازعى ازيا ويىندارىنىڭ باعدارلاماسىنا ەنگىزسەك, ۇلتتىق سپورتىمىزدىڭ ۇلىق ونەر ەكەنىن دالەلدەي الار ەدىك. سول ماقساتقا جەتۋ ءۇشىن بىلەك ءتۇرىنىپ ەڭبەك ەتىپ كەلەمىز. «Qazaq كuresi» اسسوتسياتسياسىنا جۇكتەلگەن جاۋاپكەرشىلىكتىڭ دە اۋىر سالماعى وسى باعىتتا.
قازاق كۇرەسىن جازعى ازيا ويىندارىنىڭ باعدارلاماسىنا ەنگىزۋ بويىنشا جەكە سپورتتىق ۇيىم سانالاتىن حالىقارالىق جانە ازيا وليمپيادالىق كوميتەتتەرى ءار سپورت ءتۇرىنىڭ دامۋىنا كەشەندى زەرتتەۋ جۇرگىزىپ, سپورت ءتۇرىنىڭ وركەندەۋ جولىنا جانە بۇگىنگە دەيىن اتقارىلعان جۇمىستارىنا وزىندىك باعاسىن بەرەدى. قازاق كۇرەسىنەن وقۋ-ادىستەمەلىك قۇرالداردى ازىرلەۋ مەن سپورتتىق كەرەك-جاراقپەن قامتۋ دا ماڭىزدى. بىرىككەن كۇرەس الەمى تاراپىنان ماروككودا ورنالاسقان UWW-ءدىڭ كۇرەس ورتالىعىندا حالىقارالىق كوماندالاردىڭ, جاتتىقتىرۋشىلاردىڭ جانە تورەشىلەردىڭ قاتىسۋىمەن قازاق كۇرەسىنەن وقۋ-ادىستەمەلىك جاتتىعۋ جيىندارىن وتكىزۋ ۇسىنىلدى.
قازاق كۇرەسى دۇنيەجۇزىلىك كوشپەلىلەر ويىندارىنىڭ باعدارلاماسىندا بار. بالۋاندارىمىز بۇل ويىندارعا ءۇشىنشى رەت قاتىسقالى وتىر. بۇدان بولەك, بيىل ساحا رەسپۋبليكاسىندا «ازيا بالالارى» اتتى حالىقارالىق سپورتتىق ويىندار بولادى. سونداي-اق 2025 جىلى ازەربايجاندا «تمد ەلدەرىنىڭ ءىىى ويىندارى» جارىسى جالاۋىن جەلبىرەتەدى. قازىرگى ۋاقىتتا قازاق كۇرەسىن وسى كەشەندى ويىنداردىڭ باعدارلاماسىن قوسۋ جونىندە كەلىسسوز جۇرگىزىلىپ جاتىر.
ءتول كۇرەسىمىزدى الەمدىك ارەنادا ناسيحاتتاپ, باعىن جاندىرۋ وڭاي ەمەس ەكەنى بەلگىلى. 1938 جىلى قازاق كسر اۋىل شارۋاشىلىعى ايماقتارى اراسىنداعى سپارتاكيادا اياسىندا قازاق كۇرەسىنەن دودا ۇيىمداستىرىلدى. سودان بەرى ءداستۇرلى تۇردە ەلىمىزدىڭ ءار وڭىرىندە ءتۇرلى دەڭگەيدەگى تۋرنيرلەر وتكىزىلىپ ءجۇر. 1991 جىلدان باستاپ قازاقستان چەمپيوناتى تۇراقتى ۇيىمداستىرىلادى. 2016 جىلى يۋنەسكو ماتەريالدىق ەمەس مادەني مۇرا تىزىمىنە قازاق كۇرەسىن دە قوستى. ۇلتتىق كۇرەسىمىزدەن 10 رەت الەم چەمپيوناتى وتكىزىلدى. ازيا بىرىنشىلىگى 12 مارتە ۇيىمداستىرىلدى. الەم كۋبوگى مەن ەۋروپا چەمپيوناتى 6 رەت ءوتتى. بۇل جۇمىستىڭ بارلىعى دا تاۋەلسىزدىكتىڭ ەنشىسىندە اتقارىلعان قاداۋ-قاداۋ شارۋا سانالادى. الەمدىك دودالار تەك ەلىمىزدە عانا ەمەس, ءار قۇرلىقتا وتكىزىلدى.
بۇگىنگى تاڭدا ءتول كۇرەسىمىزدى وركەندەتۋ جولىندا حالىقارالىق ارەناداعى جۇمىستاردى جۇيەلى جۇرگىزۋ – «Qazaq kuresi» قاۋىمداستىعىنىڭ باستى مىندەتى. قاۋىمداستىقتىڭ ماقساتى – قازاق كۇرەسىن ەل ىشىندە عانا ەمەس, الەمدىك دەڭگەيدە دامىتۋ, ونى وليمپيادالىق سپورت تۇرلەرى باعدارلاماسىنا ەنگىزۋ ءۇشىن ءتيىستى قادامدار جاساۋ جانە كەشەندى شارالاردى ۇيىمداستىرۋ. قازىرگى ۋاقىتتا ەلىمىزدىڭ بارلىق وبلىسى مەن رەسپۋبليكالىق ماڭىزعا يە قالالاردا «Qazaq kuresi» قاۋىمداستىعىنىڭ تىكەلەي جەتەكشىلىگىمەن جۇمىس ىستەيتىن وڭىرلىك فەدەراتسيالار قۇرىلدى. بۇعان قوسا حالىقارالىق ارەناداعى بەدەلىمىزدىڭ دە جوعارى ەكەنىن ماقتانىشپەن ايتا الامىز: الەمنىڭ 40-تان اسا ەلىندە قازاق كۇرەسىنىڭ فەدەراتسيالارى اشىلىپ, جۇمىس جاندانىپ كەلەدى. فەدەراتسيالاردىڭ اشىلۋى بار دا, ونى جەتەككە الۋ دا وڭاي ەمەس. مىسالى, الەم چەمپيوناتى, ەۋروپا, ازيا بىرىنشىلىكتەرى, الەم كۋبوگى سىندى سايىستارعا شەت مەملەكەتتەن كەلەتىن كوماندا مۇشەلەرىنىڭ جول شىعىنى, جاتىن ورنى, سپورتتىق جاراقپەن قامتاماسىز ەتۋ – ءبىزدىڭ مىندەتىمىزدە. ەگەر ءتول كۇرەسىمىز كەشەندى ويىندار باعدارلاماسىنا ەنسە, كەز كەلگەن ەل دامىتۋعا وزدىگىنەن قۇمبىل بولاتىن ەدى. سول مەجەگە جەتۋ جولىندا كوپ جۇمىس اتقارۋ كەرەك.
جۋىردا تۇركيانىڭ انتاليا قالاسىندا ەتنوسپورت كونفەدەراتسياسىنىڭ جيىنى ءوتتى. 60-قا تارتا ۇلتتىق سپورت تۇرلەرى فەدەراتسيالارىنىڭ وكىلدەرى قاتىسقان اۋقىمدا ءىس-شارادا قازاق كۇرەسىنەن اتقارىلعان جۇمىستاردى تىزبەلەپ ايتقاندا تاڭ-تاماشا بولدى. باسقا ەلدەر ەتنوسپورتتان الەم چەمپيوناتىن قالاي ۇيىمداستىرامىز دەپ باس قاتىرىپ ءجۇر, ال ءبىز ءتول كۇرەسىمىزدەن دۇنيەجۇزىلىك دودانى 10 رەت ۇيىمداستىردىق. راسىندا, تاڭعالاتىن كورسەتكىش.
– قازاقتىڭ وڭ جامباسىنا كەلەتىن ءتول كۇرەسىنىڭ بۇقارالىق سيپات الۋىنا مۇمكىندىك بار ما؟
– «اسكەر بارىسى» جىل سايىن وتكىزىلىپ كەلەدى. قازاق كۇرەسى – بابالارىمىزدىڭ جاۋىنگەرلىك ونەرگە باۋليتىن ءورىسىنىڭ ءبىر سالاسى عوي جالپى. ساداق اتۋ, تەڭگە ءىلۋ, اۋدارىسپاق سەكىلدى جاستاردىڭ رۋحىن جانيتىن ونەر. كەيىنگى كەزدەرى ونەر سالاسىنداعى شىعارماشىلىق ورتا قاتىساتىن «ونەر بارىسى» وتكىزىلىپ ءجۇر. مۇنىڭ بارلىعى دا ءتول كۇرەسىمىز جالپىحالىقتىق سيپات الۋىنا سەرپىن بەرەدى. بىلتىر ۇقك قىزمەتكەرلەرى اراسىندا قازاق كۇرەسىنەن تۋرنير ءوتتى. مەديتسينا ماماندارى, ءبىلىم سالاسىنداعى پەداگوگتەر اراسىندا قازاق كۇرەسىنەن تۋرنير وتكىزۋگە ىقىلاستى جاندار بار. وسىلاي ءار سالادا سايىستار ۇيىمداستىرىلسا, بۇقارالىق سپورت ءتۇرى دەپ تانىلۋىنا وراي تۋماي ما؟ دەرەكتەردى بەزبەندەسەك, قازاق كۇرەسىنە قىزىعۋشى جاستاردىڭ قاتارى وليمپيادالىق سپورت تۇرلەرىنە قاتىسقىسى كەلەتىن زامانداستارىنان الدەقايدا كوپ. وسى باعىتىمىزدان تايماساق, قازاق كۇرەسىمەن ەل بولىپ شۇعىلداناتىن كۇنگە دە جەتەمىز دەپ ويلايمىن.
قازاق كۇرەسىنىڭ ءورىسى كەڭەيىپ كەلە جاتقانى قۋانتادى. استانا قالاسىنداعى نازارباەۆ زياتكەرلىك مەكتەپتەرىمەن binom مەكتەپتەرىنىڭ جەلىسىمەن مەموراندۋم جاساستىق. ودان سىرت ەلوردانىڭ 40-قا جۋىق مەكتەبىندە قازاق كۇرەسىنەن ۇيىرمە اشىلىپ, بالالاردى ءتول ونەرىمىزگە تەلىپ ءجۇرمىز. ۇيىرمە اشۋ اۋقىمدى شارۋا بولسا, قازاق كۇرەسىنە باۋليتىن باپكەر ءۇشىن وقۋ-ادىستەمەلىك قۇرال ازىرلەۋ, باسقا دا قاجەتتىلىكتى وتەۋ ودان دا ماڭىزدى. استانادا اشىلعان دەنە شىنىقتىرۋ جانە بۇقارالىق سپورت اكادەمياسىنىڭ ماماندارىمەن تىزە قوسىپ وسى وقۋ-ادىستەمەلىك وقۋلىقتى ازىرلەۋدى قولعا الدىق. قازاق كۇرەسىمەن شۇعىلدانۋ ەڭ الدىمەن قارسىلاستىڭ قولدانعان ادىسىنەن وڭتايلى قۇلاۋدى ۇيرەنۋدەن باستالادى. وقۋ-ادىستەمەلىك قۇرالدا مۇنىڭ بارلىعى دا قامتىلىپ تاڭعا تاڭبا باسقانداي جازىلادى.
– اڭگىمەڭىزگە راحمەت.
اتقارار شارۋا ءالى كوپ
– قازاق كۇرەسى دۇنيەجۇزىلىك كوشپەلىلەر ويىندارىنىڭ باعدارلاماسىندا بار. 2017 جىلى تۇرىكمەنستاندا وتكەن جابىق كەشەندەگى جازعى ازيا ويىندارىنىڭ باعدارلاماسىنا دا ەندى. ەندىگى مەجە – جازعى ازيا ويىندارى. وزبەكستان ءوزىنىڭ ۇلتتىق كۇرەسىن 2017 جىلى جازعى ازيا ويىندارىنىڭ باعدارلاماسىنا قوستى. 2018 جىلى يندونەزيادا, بىلتىر قىتايدا وتكەن جازعى ازيا ويىندارىندا وزبەكتىڭ كۋراشىنان ەرلەر مەن ايەلدەر 14 سالماق دارەجەسىندە بەلدەسۋگە ءتۇستى. قاراپ وتىرىپ قىزىعاسىڭ ءارى قىزعاناسىڭ. ءبىزدىڭ ءتول ونەرىمىزدى دە سونداي بيىكتەن كورگىمىز كەلەتىنى انىق. وسى كۇنگە دەيىن ءتول كۇرەسىمىزدى وركەندەتۋ جولىندا قىرۋار جۇمىس جۇزەگە استى. الەمدىك دودالار ۇيىمداستىرىلىپ كەلەدى. ءالى اتقارار شارۋا قانشاما. قازاق كۇرەسىنەن الەم چەمپيوناتىن, «الەم بارىسىن», دۇنيەجۇزىلىك كوشپەلىلەر ويىندارىندا جەڭىسكە جەتتىم. ەندىگى ارمانىم –ۇلتتىق سپورتىمىز جازعى ازيا ويىندارىنىڭ باعدارلاماسىنا قوسىلسا, جاستارىمىز بارىن سالىپ بەلدەسسە دەگەن تىلەك.
بەيبىت ىستىباەۆ,
«قازاقستان بارىسىنىڭ» ءۇش دۇركىن جەڭىمپازى, قازاق كۇرەسىنەن الەم چەمپيونى
قالتارىستا قالعان ۇلتتىق سپورتىمىز ەدى
ءبىز قازاق كۇرەسىنەن ۇيىرمە اشقان 1976 جىلى نە كۇرەس زالى, كىلەم, ءتىپتى بالۋان بالالاردىڭ كيەتىن سپورتتىق كۇرتەشەسى دە بولعان جوق. جوقتى جونا ءجۇرىپ, ەمەن ەسىكتىڭ ارعى جاعىنداعى اق جاعالىلاردىڭ كوڭىلى سامبوعا قۇلاعان شاقتا ءبىز ۇلتتىق ونەرىمىز قازاق كۇرەسىنىڭ قازىعىن قاعىپ, وتىرار اۋدانىنىڭ قوعام اۋىلىندا ۇيىرمە اشتىق. قانشاما قازاق بالاسى ۇلتتىق سپورتپەن شۇعىلداندى. بەكزادا ونەر سانالاتىن قازاق كۇرەسىن ۇيرەنە ءجۇرىپ, سامبو, دزيۋدو كۇرەسىنەن دە ايتۋلى دودالاردا ولجا سالدى. الەم چەمپيوناتىنىڭ جۇلدەگەرى, ازيا چەمپيوندارى شىقتى. بالالاردى جاتتىعۋعا جيناۋ ءۇشىن ەسىگىنىڭ الدىندا كۇتىپ, اتا-اناسىنان قيىلىپ سۇراپ, ەرتىپ الۋشى ەدىك. قازىر ءتول كۇرەسىمىزگە ەرەكشە قامقورلىق جاسالىپ, ءتۇرلى ءدۇبىرلى دودالار وتكىزىلىپ جاتىر. قازاق كۇرەسىنەن الەم چەمپيوناتى, قۇرلىق بىرىنشىلىگى, «قازاقستان بارىسى», «الەم بارىسى» سىندى ايتۋلى دودالاردى وتكىزۋ ەرتەرەكتە ارمان بولدى. سول ارمان اقيقاتقا اينالدى. ۇلتتىق سپورتىمىزدى الەمنىڭ تورىنەن كورەمىز دەسەك, مەملەكەت بولىپ مەرەيىن اسىرۋعا كۇش سالعان ابزال. الپىس جىل بۇرىن (1964 جىلى) وزدەرىندە جازعى وليمپيادا الامانىن وتكىزىپ, دزيۋدو كۇرەسىن كەشەندى ويىندار باعدارلاماسىنا ەنگىزگەن جاپونيا بىزگە ۇلگى بولۋى كەرەك. ءتول كۇرەسىن الەمنىڭ ءار قيىرىندا ورىستەتۋ ءۇشىن ديۋانانىڭ كۇيىن كەشە ءجۇرىپ, دزيۋدونى ناسيحاتتادى. ناتيجەسى قانداي, بۇگىندە التى قۇرلىقتىڭ 198 ەلىندە دزيۋدو سپورتى ءوز دارگەيىندە دارىپتەلىپ, قارقىندى دامىپ كەلەدى.
قازاق كۇرەسىنەن بۇعان دەيىن بىرنەشە مارتە الەم چەمپيوناتىن وتكىزۋ, قۇرلىقتىق دودالاردى ۇيىمداستىرۋ ءىسىن جانداندىرۋ قاجەت. قارسىلاسى تىزەرلەسە, بەلدەسۋ توقتاتىلاتىن بەكزادا كۇرەسىمىزدىڭ ەستەتيكالىق قۇندىلىعىن كوپ ەل سەزىنىپ, ىقىلاسپەن ۇيرەنۋىنە كۇش قوسۋىمىز كەرەك. سوندا عانا ۇلتتىق ونەرىمىزدى كەشەندى ويىندار باعدارلاماسىنان كورەمىز.
وڭالبەك اۋەلبەكوۆ,
وتىرار اۋدانىنىڭ قۇرمەتتى ازاماتى, زەينەتكەر
اڭگىمەلەسكەن –
قۋانىش نۇردانبەك ۇلى,
«Egemen Qazaqstan»
