ادەبيەت سىنشىلارى, جالپى وقىرمان قاۋىم تاراپىنان جازۋشىنىڭ «قىران قالعىمايدى» اتتى پوۆەستەر جيناعى, «تاۋ جولى», «ەكىنشى ءومىر» اتتى روماندارى اسقان شابىتپەن جازىلعان باعالى ەڭبەك رەتىندە جىلى قابىلدانسا, ءومىردىڭ وزەكتى ماسەلەلەرىن كوتەرگەن «جەر تاعدىرى», «سەكسەن بەستىڭ كوكتەمى», «اداسپاڭدار, ادامدار», «سىڭسىپ ۇشقان سىڭار اققۋ» اتتى شىعارمالارى دا سۋرەتكەردى كوركەم ءسوزدىڭ شەبەرى رەتىندە تانىتتى. قالامگەردىڭ «جيىرماسىنشا عاسىر», «ۇيىق», «تۇيىق» روماندارى ادەبي قاۋىم تاراپىنان ءتۇرلى دەڭگەيدە لايىقتى باعاسىن الدى. ال رەسپۋبليكالىق جانە وبلىستىق تەاترلار ساحناسىندا قويىلعان «داۋىل», «ەرتەڭ بيۋرو», «توزاق شەڭبەرى» سپەكتاكلدەرى قوعامنىڭ وزەكتى ماسەلەلەرىن قوزعاعان قۇندى قويىلىم رەتىندە كورەرمەن جۇرەگىنەن ورىن الدى. وسى ورايدا ء«سابيت دوسانوۆتىڭ رومانى وتە قىزىق, وتكىر, تالانتتى. وتكىر بولىپ, دارىنسىز بولسا – بۇل ۇگىت. ەگەر تالانتتى, ادەبي الەۋەتى مىقتى بولسا, بۇل – ادەبيەت!» دەپ جازۋشىنىڭ قالام قۋاتىن ءدوپ باسقان رەسەي مەملەكەتتىك سىيلىعىنىڭ لاۋرەاتى, اقىن ولەگ شەستينسكيدىڭ بەرگەن باعاسى – شىن باعا.
قالامگەر اتقارۋشى بيلىكپەن, ىسكەر ازاماتتارمەن تىعىز بايلانىس ورناتىپ, ولاردى شىعارماشىلىق الەمىنە تارتىپ جۇرەتىن. ءبىر ايتا كەتەرلىگى, جازۋشى ماسكەۋ مەن تمد قالامگەرلەرىمەن دە قويان-قولتىق قارىم-قاتىناستا بولدى.
جازۋشى ءسابيت دوسانوۆتىڭ سومداعان كوركەم بەينەلەرى, ىسكەرلىگى قازىرگى ادەبيەتتىڭ تالعام تارازىسىندا بايىپتالىپ, جۇرتشىلىقپەن بىرگە جاساي بەرەدى دەپ سانايمىز.
