شىن مانىندە قيىندىقتا قول ۇشىن بەرىپ, ادام ءومىرىن ساقتاپ قالۋعا جاردەمدەسۋ – ءاربىر پەندەگە ورتاق. ولاي بولسا كۇندەگى قىزمەتى قاۋىپپەن بەتپە-بەت كەلەتىن پوليتسەيلەردىڭ ءار كۇنى قاجىرلى ەڭبەك, كوزسىز ەرلىك جاساۋدان تۇرادى. استانا قالاسى پوليتسيا دەپارتامەنتىنىڭ قىزمەتكەرى نۇرلان باۋىرجان ۇلى بۇل سالاعا كەزدەيسوق كەلمەگەن. ونىڭ ايتۋىنشا, ەكى اعاسى دا قۇقىق قورعاۋ سالاسىندا ەڭبەك ەتىپ, زەينەتكە شىققان. سوندىقتان دا شىعار, ءۇيدىڭ ۇلكەندەرى سالىپ كەتكەن سارا جولدى تاڭداۋعا ەشتەڭە كەدەرگى بولماعان. كەرىسىنشە ارمانىنا اسىق, ماقساتىنا بەرىكتىگى دە ءوزى قالاعان سالاعا اداستىرماي جول تابۋعا كومەكتەسكەنىن ايتقان ول: «شىعىس قازاقستان وبلىسىندا دۇنيەگە كەلدىم. تۋعان جەرىمدە شىعىس قازاقستان وبلىسى مەملەكەتتىك ۋنيۆەرسيتەتىن 2006 جىلى ءبىتىرىپ, سول جىلى ىشكى اسكەردە وتان الدىنداعى بورىشىمدى اتقارۋعا كەتتىم. ال 2014 جىلدان باستاپ قۇقىق قورعاۋ سالاسىندا قىزمەت ەتىپ, ءوزىم تاڭداعان جولدا تەر توگىپ كەلەمىن», دەپ اعىنان جارىلدى.
بۇگىندە كۇندەلىكتى پاترۋلدە ءارتۇرلى وقيعالارمەن بەتپە-بەت كەلەتىن پوليتسەيدىڭ ادامداردى ءتىلسىز جاۋدان قورعاپ قالاتىن ساتتەرى دە ءجيى بولادى ەكەن. الايدا «بۇل – ەرلىك ەمەس, مەنىڭ مىندەتىم», دەيدى نۇرلان. قىزمەت بارىسىندا ادامداردىڭ قاتەلىككە جول بەرۋىنەن اراشالاپ, ءومىرىن ساقتاپ قالسا, كەيدە ءوز ومىرىنە قاۋىپ تۋدىراتىن قاسكويلەر دە كەزدەسپەي قالمايدى. ەسىرتكىگە ەلىگىپ, ىشىمدىككە سالىنعان تۇرعىنداردى دا تارتىپكە شاقىرىپ, ەلدىڭ تىنىشتىعىن ساقتاۋ جولىندا ەڭبەك ەتىپ جاتقان قىزمەتكەردىڭ ەپتىلىگى مەن ەرلىگى ارىپتەستەرىنە ۇلگى ەتىپ ايتارلىق.
وقيعا بىلتىر 28 جەلتوقسان كۇنى كۇندىزگى ۋاقىتتا بولعان. ادەتتەگىدەي قىزمەت بارىسىندا قالا كوشەلەرىن ارالاپ جۇرگەن پاترۋلدىك پوليتسەيلەر جولدىڭ شەتىندە قۇلاپ جاتقان ادامدى كورىپ قالادى. قىم-قۋىت قالا تىرشىلىگىندەگى قالىڭ ءنوپىردىڭ اراسىنداعى ءاربىر ادامنىڭ ءجۇرىس-تۇرىسىن ءجىتى قاداعالاپ جۇرەتىن قىزمەتكەرلەر بۇل جولى دا قاراپ تۇرا المادى. جۇرەگى ۇستاپ جەرگە قۇلاپ قالعان ادامعا بىردەن دارىگەر شاقىرتىپ, اق حالاتتىلار جەتكەنشە العاشقى مەديتسينالىق كومەك كورسەتەدى. دارىگەرلەر كەلگەنگە دەيىن پوليتسيا قىزمەتكەرى كومەك كورسەتۋدى جالعاستىرىپ, ەر ادامنىڭ تىنىس الۋ جولدارىنا اۋانىڭ ەركىن جەتۋىن قامتاماسىز ەتەدى. مەديتسينالىق تاجىريبەسى بولماسا دا بار بىلگەنىن جاساپ, قولدان كەلگەن كومەگىن كورسەتكەن پاترۋلدىك پوليتسيا پولكىنىڭ ينسپەكتورلارى ادام ءومىرىن اراشالاپ قالعانىن باتىرلىق دەپ سانامايدى. سول كۇنى دە جۇرەگى سىر بەرگەن ادامدى العاشقى مەديتسينالىق جاردەم كولىگىنە شىعارىپ سالىپ, ارتىنشا وزدەرىنە بەكىتىلگەن مارشرۋت بويىنشا قىزمەت اتقارۋدى جالعاستىرۋعا باعىت الادى.
بۇل وقيعاعا دا وزگەلەر «پوليتسيا قىزمەتكەرىنىڭ ءبىر كۇندىك جۇمىسىنداعى وقيعا» دەپ باعا بەرەرى ءسوزسىز. ءيا, ولاردىڭ جۇمىسى سولاي. تۇرعىنداردىڭ تىنىشتىعىن كۇزەتىپ, ادامداردى قاۋىپ-قاتەردەن امان الىپ قالۋ. بىراق ادامنىڭ ومىرىنە اراشا بولۋ ءۇشىن دە جۇرەكتە باتىلدىق, جۇمىسقا دەگەن جوعارى جاۋاپكەرشىلىك قاجەت-اق. وسى تۇرعىدا پوليتسيا قىزمەتكەرى نۇرلان باۋىرجان ۇلىنىڭ مول تاجىريبەسى مەن ءوز قىزمەتىنە ادالدىعىن ەرەكشە اتاپ وتۋگە بولادى.
