پاريجدەگى دوداعا الەمنىڭ 205 ەلىنەن 10 مىڭنان اسا سپورتشى قاتىسادى دەپ جوسپارلانعان. بۇل بايراقتى باسەكەدە 32 سپورت تۇرىنەن 329 مەدال جيىنتىعى ساراپقا سالىنادى.
ەلىمىزدىڭ تۋريزم جانە سپورت مينيسترلىگىنىڭ حابارلاۋىنشا, قازاقستان ۇلتتىق قۇراماسى سپورتتىڭ 20 تۇرىنەن باق سىناماق. قازىرگى تاڭدا قازاقستان دەلەگاتسياسىنىڭ قورجىنىندا پاريج وليمپياداسىنىڭ 11 سپورت تۇرىنەن 31 ليتسەنزياسى بار. اتاپ ايتقاندا, مۇنىڭ التاۋى – بوكس (ەرلەر), بەسەۋى – نىسانا كوزدەۋ, تورتەۋى – ساداق اتۋ, تورتەۋى – سەمسەرلەسۋ, ۇشەۋى – تاسجولداعى ۆەلوسپورت, ەكەۋى – قازىرگى بەسسايىس, ەكەۋى – تاەكۆوندو, سونداي-اق ءبىر-بىردەن بوكس (ايەلدەر), گرەك-ريم كۇرەسى, ەركىن كۇرەس, سپورتتىق گيمناستيكا , باتۋتتاعى گيمناستيكا سياقتى سپورت تۇرلەرىنە تيەسىلى.
ليتسەنزيا سانىن وڭىرلەر ۇلەسىنە بولەر بولساق, الماتى, شىمكەنت قالالارى مەن جەتىسۋ وبلىسى ۇزدىك ناتيجەمەن كوش باستاپ تۇر. ۇشەۋىنىڭ دە ەنشىسىندە بەس جولدامادان بار. كەيىنگى ورىندارعا شقو (4), استانا قالاسى (3), جامبىل (2), سقو (2), اقمولا (1), قىزىلوردا (1), اباي (1), قاراعاندى (1) جانە تۇركىستان وبلىستارى (1) جايعاسقان. ال قالعان وڭىرلەردە وليمپيادانىڭ بىردە-ءبىر جولداماسى جوق.
ايتا كەتەيىك, وليمپيا ويىندارىنا دەيىن ءالى 50-دەن اسا ليتسەنزيالىق جارىس بار. ونىڭ ىشىندە سپورتشىلارىمىز الەم چەمپيوناتتارى, ازيا چەمپيوناتتارى جانە رەيتينگتىك تۋرنيرلەرگە قاتىسادى.
