فوتو: ۇكىمەتتىڭ ءباسپاسوز قىزمەتى
جۇمىس ساپارى بارىسىندا وڭىردەگى سۋ قويمالارىنىڭ جاي-كۇيى مەن سۋ تاسقىنىنا قارسى ءىس-شارالاردى ساپالى ءارى ۋاقتىلى جۇرگىزۋ جۇمىسىنا ەرەكشە نازار اۋدارىلدى. سولتۇستىك قازاقستان وبلىسى سۋ تاسقىنى قاۋپى بار ايماققا كىرەدى. وبلىستىڭ نەگىزگى سۋ كوزى – ەسىل وزەنى ءۇش سۋ قويماسى: استانا, سەرگەەۆ جانە پەتروپاۆل سۋ توراپتارىمەن رەتتەلەدى.
ۇكىمەت باسشىسى پەتروپاۆل سۋ تورابىنا بارىپ, سۋ قويماسىنىڭ جاعدايىن تەكسەردى. قازىرگى ۋاقىتتا ول قالىپتى جاعدايدا جانە شتاتتىق رەجيمدە جۇمىس ىستەپ تۇر. سۋ تاسقىنى كەزەڭىندە سۋ قويماسى الگوريتمگە سايكەس جۇمىستىڭ «ترانزيتتىك رەجيمىنە» اۋىستىرىلادى جانە تاسقىن سۋلاردىڭ وتۋىنە اسەر ەتپەيدى.
سونىمەن قاتار ولجاس بەكتەنوۆ وتكەن جىلدىڭ ءساۋىر ايىندا شامادان تىس تولىپ كەتكەن سەرگەەۆ سۋ قويماسىنىڭ جاعدايىنا نازار اۋداردى.
«سۋ قويمالارى بار سەرگەەۆ جانە پەتروپاۆل سۋ توراپتارى ؘ– رەسپۋبليكالىق مەنشىكتەگى سۋ شارۋاشىلىعى قۇرىلىستارى تىزبەسىنە ەنگىزىلگەن جانە ەرەكشە ستراتەگيالىق ماڭىزى بار. سەرگەەۆ سۋ قويماسىنداعى جينالعان سۋدىڭ كولەمى 82%-دى قۇرايدى. بۇل جەرلەردە ساياجاي ۋچاسكەلەرىن ەرەكشە نازاردا ۇستاۋدى تاپسىرامىن», دەپ اتاپ ءوتتى پرەمەر-مينيستر.
«قازسۋشار» رمك سقوف ديرەكتورى شۇعايىپ ءيباتۋلليننىڭ ايتۋىنشا, وسى كەزەڭدە سەرگەەۆ جانە پەتروپاۆل سۋ توراپتارى شتاتتىق رەجيمدە جۇمىس ىستەپ جاتىر. الايدا اۆتوجولداعى كوپىرلەردىڭ جەكەلەگەن كونسترۋكتسيالارى اپاتتى جاعدايدا تۇر. وسىعان بايلانىستى وزگە بالامالى جولدار ارقىلى كولىك اعىنىن قايتا باعىتتاۋ ماسەلەلەرى قاراستىرىلىپ وتىر. جالپى, وڭىردە سۋ تاسقىنىنا بەيىم 87 ەلدى مەكەن ەسەپكە الىنعان. 24 قاڭتاردان باستاپ وبلىس كۇشەيتىلگەن دايىندىق رەجيمىنە اۋىستىرىلدى, 26 ناۋرىزدان باستاپ جەدەل شتاب جۇمىلدىرىلدى.
پرەمەر-مينيستر سولتۇستىك قازاقستان وبلىسى اكىمدىگىنە جوسپارلانعان بارلىق الدىن الۋ ءىس-شارالارىن اياقتاۋدى, ال تجم-عا سۋ تاسقىنى جاعدايى ۋشىققان جاعدايدا كۇشتەر مەن تەحنيكانى جۇمىلدىرۋدى تاپسىردى.
«وزدەرىڭىز كورىپ وتىرعانداي, ەلىمىزدىڭ بىرقاتار وڭىرىندە سۋ دەڭگەيى كوتەرىلىپ, سۋ تاسقىنى بولدى. بارلىق كۇشتەر جۇمىلدىرىلدى. رەسپۋبليكالىق جانە وڭىرلىك جەدەل شتابتار تاۋلىك بويى جۇمىس ىستەپ تۇر. قازىرگى ۋاقىتتا توتەنشە جاعدايلار, ىشكى ىستەر, قورعانىس مينيسترلىكتەرى, ۇلتتىق قاۋىپسىزدىك كوميتەتىنىڭ ارناۋلى كۇشتەرى مەن قۇرالدارى — بارلىعى 4 مىڭعا جۋىق ادام, 1,3 مىڭنان استام تەحنيكا سۋ تاسقىنىنا قارسى جۇمىستارعا تارتىلدى. جول قاتىناسى قيىن جەرلەردە ادامدار تىكۇشاقتارمەن ەۆاكۋاتسيالانىپ جاتىر. جۇمىستار قاۋىپ تولىق سەيىلگەنشە جالعاساتىن بولادى. جاعداي قاتاڭ باقىلاۋدا تۇر. زارداپ شەككەندەرگە ۇكىمەت جانە اكىمدىك تاراپىنان قاجەتتى كومەك كورسەتىلەدى», دەپ اتاپ ءوتتى ولجاس بەكتەنوۆ.
سقو-عا جۇمىس ساپارى الدىندا ۇكىمەت باسشىسى وڭىرلەردىڭ اكىمدەرى مەن توتەنشە جاعدايلار ءمينيسترىنىڭ سۋ تاسقىنى جاعدايىن باقىلاۋ بويىنشا جۇرگىزىلىپ جاتقان جۇمىستار تۋرالى ەسەپتەرىن تىڭدادى.
