فوتو: اقوردا
پرەزيدەنتتىڭ پىكىرىنشە, بۇل ماقساتتارعا قول جەتكىزىپ, قازىرگى جاھاندىق سىن-قاتەرلەرگە توتەپ بەرۋ ءۇشىن كۇش بىرىكتىرگەن ءجون. وسى ورايدا مەملەكەت باسشىسى بىرقاتار وزەكتى مىندەتتى ايقىنداپ بەردى. ولاردى ىسكە اسىرۋ ءۇشىن بۇكىل الەمدىك قوعامداستىق كۇش جۇمىلدىرۋى قاجەت. قاسىم-جومارت توقاەۆتىڭ ايتۋىنشا, الەمگە ادىلدىك پەن اشىقتىق قاعيداتتارىنا نەگىزدەلگەن جاڭا ءارى كوپجاقتى ساۋدا جۇيەسى كەرەك.
«بۇگىندە ساۋدا كەدەرگىلەرىنىڭ كوبەيۋى, پروتەكتسيونيزم مەن كەلىسىمدەردىڭ بۇزىلۋى جاھاندىق ەكونوميكاعا ايتارلىقتاي قيىندىق تۋعىزىپ وتىر. بۇل تۇيتكىلدەردى شەشۋ ءۇشىن ادىلەتسىز ساۋدا كەدەرگىلەرىن جويىپ, تسيفرلاندىرۋ ارقىلى جەتكىزۋ تىزبەگىنىڭ اشىقتىعىن ارتتىرۋ قاجەت», دەدى مەملەكەت باسشىسى.
پرەزيدەنت الەمدىك قارجى جۇيەسىنە دە جاڭا تاسىلدەر قولدانۋ كەرەك دەپ سانايدى. مەملەكەت باسشىسى قارجى جۇيەسىندە تەك تاڭداۋلىلار عانا پايداعا كەنەلمەي, بارلىق ەلگە تەڭ مۇمكىندىك بەرىلۋگە ءتيىس ەكەنىن ايتتى. سونداي-اق حالىقارالىق قوعامداستىقتى ورنىقتى قارجىلاندىرۋ سالاسىندا بارىنشا پارمەندى شارالار قابىلداۋعا شاقىردى.
«نارىقتىق كاپيتاليزاتسياسى وراسان زور ازياداعى الىپ وبليگاتسيالار نارىعى كوپتەگەن دامۋ جوبالارىنا قولداۋ كورسەتەتىن الەۋەتكە يە. ەۋرازيالىق دامۋ بانكى جاڭا قارجىلىق ينۆەستيتسيالىق قۇرال رەتىندە پاندا-بوندتاردىڭ ءبىرىنشى لەگىن شىعارۋدى جوسپارلاپ وتىر. بۇل جاھاندىق ينفراقۇرىلىم جوبالارىن قارجىلاندىرۋ ءۇشىن اسا ماڭىزدى بولۋى مۇمكىن», دەدى قاسىم-جومارت توقاەۆ.
