جاڭا مەديتسينالىق نىساندار ەكگ, ۋدز, دەفيبريللياتور, بيوحيميالىق تالداۋ اپپاراتتارىمەن جانە وزگە دە زاماناۋي قۇرىلعىلارمەن جابدىقتالادى. مۇنىڭ سىرتىندا اتالعان ەمدەۋ مەكەمەلەرىنە ناۋقاستى اۋداندىق اۋرۋحاناعا اپارماي-اق جەرگىلىكتى جەردە تالداۋ جۇرگىزۋگە مۇمكىندىك بەرەتىن زەرتحانالىق قۇرىلعىلار ورناتىلادى.
«مەديتسينالىق نىسانداردىڭ اشىلۋى – شالعايداعى ەلدى مەكەندەردىڭ تۇرعىندارى ءۇشىن قولجەتىمدى جانە ساپالى مەديتسينالىق كومەكتى قامتاماسىز ەتۋدەگى ماڭىزدى قادام. جاڭا امبۋلاتوريالار مەن فاپ-تار بىلىكتى كادرلارمەن عانا ەمەس, سونىمەن قاتار زاماناۋي مەديتسينالىق جابدىقتارمەن جابدىقتالعان. بۇل اۋىل تۇرعىندارىنىڭ ءومىر ءسۇرۋ ساپاسىن ەداۋىر ارتتىرۋعا جانە ازاماتتارىمىزدىڭ دەنساۋلىعىن جاقسارتۋعا مۇمكىندىك بەرەدى», دەدى ەرشوۆ اۋلىنداعى ەمدەۋ مەكەمەسىنىڭ اشىلۋ راسىمىنە قاتىسقان وبلىس اكىمى قۇمار اقساقالوۆ.
جاڭا مەديتسينالىق نىساندار العاشقى دارىگەرلىك-سانيتارلىق كومەك كورسەتۋگە قاجەتتىنىڭ بارىمەن جابدىقتالعان. اۋىلدىق جەردە دەنساۋلىق ساقتاۋ ينفراقۇرىلىمىنىڭ ايتارلىقتاي جاقسارۋى شالعاي ەلدى مەكەندەردەگى تۇرعىندارعا دەر كەزىندە مەديتسينالىق كومەك كورسەتۋ مۇمكىندىگىنە جول اشىپ وتىر. ەمحانالىق كومەك كورسەتۋ جۇيەسىن جەتىلدىرۋ اياسىندا بيىل ءساۋىر ايىنان باستاپ سالالىق مامانداردىڭ قابىلداۋىنا تىركەلۋ جولدارى دا وڭتايلاندىرىلادى. ناۋقاستار قاجەت بولعان جاعدايدا سالالىق ماماننىڭ قابىلداۋىنا جالپى پراكتيكا دارىگەرىنىڭ جولداماسىنسىز-اق جازىلا بەرەدى.
وبلىستىق دەنساۋلىق ساقتاۋ باسقارماسىنىڭ مالىمەتىنشە, بيىل وڭىردە دارىگەر-ماماندار مەن ورتا مەديتسينالىق قىزمەتكەرلەردىڭ سانى ارتقان. سونداي-اق اۋىلدىق ەمدەۋ مەكەمەلەرىندەگى كادر ماسەلەسى دە بىرتىندەپ ءوز شەشىمىن تابا باستاعان. ماماندار وڭىردە ءولىم-ءجىتىمنىڭ دە جالپى كورسەتكىشى تومەندەگەنىن ايتىپ وتىر. مىسالى, قان اينالىمى جۇيەسى اۋرۋلارىنان, قاتەرلى ىسىكتەردەن, تۋبەركۋلەزدەن, جازاتايىم وقيعالاردان, ۋلانۋدان جانە جاراقاتتانۋدان بولاتىن ءولىم-ءجىتىم ازايدى.
بيىل «اۋىلدىڭ دەنساۋلىق ساقتاۋ سالاسىن جاڭعىرتۋ» ۇلتتىق جوباسى اياسىندا وبلىس ورتالىعىنان شالعاي جاتقان ەلدى مەكەندەردە 25 مەديتسينالىق مەكەمە سالۋ جوسپارلانىپ وتىر.
قوستاناي وبلىسى
