15–16 ناۋرىز ارالىعىندا الماتىداعى №2 قالالىق بالالار كلينيكالىق اۋرۋحاناسىنىڭ بازاسىندا بەلگىلى رەسەيلىك حيرۋرگتەر ماكسيم ۆاۆيلوۆ پەن تيمۋر تورنو بىرىگىپ, «ميكروحيرۋرگيا ارقىلى اياق-قولدىڭ ءتۋابىتتى جانە جۇرە كەلە پايدا بولعان كىناراتتارىن جەدەل ەمدەۋ» تاقىرىبىندا شەبەرلىك ءدارىسىن وتكىزدى. مۇنداي مۇمكىندىكتى الماتى, تالدىقورعان جانە بىشكەك قالالارىنىڭ دارىگەرلەرى دە جىبەرمەي, تاجىريبە الماسۋعا كەلدى.
«شەبەرلىك ءدارىسىن «مەيىرىمدىلىك ءۇيى» قوعامدىق قورى باس سەرىكتەسىمىز «Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىنا سۇيەنە وتىرىپ, دەرتى اۋىر بالالارعا كومەك كورسەتۋ ءۇشىن ءارى اۋرۋحاناداعى مەديتسينالىق كومەكتىڭ ساپاسىن ارتتىرۋ ماقساتىندا ۇيىمداستىردى. باستاما اياسىندا 60 شاقتى بالا تەكسەرۋدەن ءوتىپ, ەم-دوم تاعايىندالدى, 8 بالاعا وپەراتسيا جاسالدى. كۇردەلى وپەراتسيانىڭ ەكەۋى – «سيمۋلتانتتى», ياعني ءبىر مەزەتتە ادامنىڭ بىرنەشە جەرىنە جاسالاتىن ارالاس وپەراتسيا», دەدى الماتى №2 قبكا ديرەكتورى مارات راباندياروۆ.
تاعى ءبىر توقتالا كەتەتىن وقيعا – قوناەۆ قالاسىنان جەتكىزىلگەن 9 جاستاعى اديناعا 2 دارىگەرلىك توپ – ميكروحيرۋرگتەر مەن ورتوپەديالىق تراۆماتولوگتەر ءبىر مەزەتتە كۇردەلى وپەراتسيالار جاسادى. ءبۇلدىرشىن ناركوزدا جاتقان كەزدە اياق-قولىمەن قوسا, بۇعاناسىنا ءۇش بىردەي وپەراتسيا جاسادى. ناۋقاسقا «وڭ جاق گەميپارەزى, تسەرەبرالدى سال اۋرۋى» دياگنوزى قويىلعان.
ايتقانداي, 2023 جىلى 13 قاڭتاردا اديناعا وسى №2 قالالىق بالالار كلينيكالىق اۋرۋحاناسىنىڭ بازاسىنداعى نەيروحيرۋرگيالىق شەبەرلىك ءدارىسى كەزىندە بەرليندەگى ايگىلى شاريتە كلينيكاسىنىڭ پروفەسسورى ۋلريح-ۆيلگەلم تومالەنىڭ تىكەلەي ارالاسۋىمەن ميدىڭ سول جاق بولىگىنە بىرەگەي وپەراتسيا جاسالىپ, وسىدان كەيىن ءبۇلدىرشىننىڭ جاعدايى جاقسارىپ, ءدىرىلى توقتاعان. الماتى مەن ياروسلاۆل دارىگەرلەرى جاساعان بۇل جولعى وپەراتسيا ادينانى ساۋىقتىرۋ جولىنداعى كەلەسى قادامعا اينالىپ وتىر.
«بالا اۋرۋحاناعا جوسپارلى تۇردە قابىلداندى, بىراق وپەراتسيادان ءتورت كۇن بۇرىن قىز وڭ يىعىمەن قۇلاعان. تۇرعىلىقتى جەرى بويىنشا تراۆماتيكالىق پۋنكتكە اپارعان كەزدە وعان «وڭ جاق بۇعاناسىنىڭ ورتاڭعى ۇشتەن ءبىر بولىگىنىڭ جابىق سىنۋى» دياگنوزى قويىلىپ, دەزو گيپسى سالىنعاندىقتان, وڭ قولعا دا وپەراتسيا جاساۋ ماسەلەسى تۋىندادى. تەكسەرۋدەن كەيىن دارىگەرلەردىڭ ەكى توبى ءبىر ۋاقىتتا اياققا, بۇعاناعا, جىلىنشىك پەن ساۋساققا بىرلەسكەن «سيمۋلتانتتى» وپەراتسيا جاساۋعا شەشىم قابىلدادى. وسىلايشا, ءبىر مەزەتتە اديناعا وڭ جاق بۇعانانىڭ جابىق وستەوسينتەزى, شىنتاقتاعى جىلىكتىك جۇيكەنىڭ قوزعالتقىش تالشىقتارىنىڭ سەلەكتيۆتى نەيروتومياسى, سىڭىرلەردىڭ ترانسپوزيتسياسى, وڭ جاق اسىقاستى بۋىنىنىڭ ارتروەرەزى دياگنوزدارىنا وپەراتسيا جاسالدى», دەدى الماتى №2 قبكا تراۆماتولوگ دارىگەرى ۇلجان سولتانبەكوۆا.
ال جوعارىدا اتالعان 8 بالا «بىرنەشە ارتروگريپپوز», «اياقتىڭ كاۆۋستىق دەفورماتسياسى», «شاركو – ماري اۋرۋى», ء«اتيپتى مايماقتىق», «رەتسيديۆ», «ونمك سالدارى», «سول جاق گەميپارەزى», «سول جاق اياقتىڭ ۆالگۋسى», «وڭ قولدىڭ دەفورماتسياسى» سياقتى كۇردەلى وپەراتسيالاردى وتكەردى.
شەبەرلىك ءدارىسى اياسىندا قولدانىلعان «بوس تەرى پلاستيكاسى» تەحنولوگياسىنا توقتالاتىن بولساق, ءداستۇرلى ادىستەر ءتيىمسىز بولعان جاعدايدا دارىگەرلەرگە كۇردەلى ميكروحيرۋرگيالىق ادىستەرگە جۇگىنۋگە تۋرا كەلەدى.
«ميكروحيرۋرگتەردىڭ مىندەتىنە كەلسەك, وعان بىردەن جۇگىنۋدىڭ قاجەتى جوق, بۇل باسقا ادىستەر كومەكتەسپەگەن كەزدە قولدانىلادى. جاراقات العاننان كەيىن ءتۇرلى جارا پايدا بولىپ, ورتوپەدتەر مەن تراۆماتولوگتەر ولاردىڭ بارلىعىن كەز كەلگەن تاسىلمەن جابۋعا تىرىسادى, جەرگىلىكتى تىندەردى تارتادى, بۇل «بوس تەرى پلاستيكاسى» نەمەسە «قايتالاما جازىلۋ» دەپ اتالادى. ەگەر بارلىق ءتاسىل كومەكتەسپەگەن جاعدايدا بوس تەرىنى جىلجىتىپ, قان-تامىر اينالاسىن تىگىپ, جارالاردى جابۋ كەرەك. مۇنداي وپەراتسيا بارىسىندا ەش جەردى جاراقاتتاماۋ, زاقىمداپ الماۋ سىندى اۋىر مىندەت تۇرادى», دەيدى حيرۋرگ تيمۋر تورنو.
ەڭ باستىسى, بالالارعا جاسالعان بارلىق وپەراتسيا, ەم-دوم تەگىن جۇرگىزىلدى.
الماتى
