جاس كاسىپكەر بىلتىر «بيزنەس باستاۋ» كۋرسىنان ءوتىپ, 1 ملن 380 مىڭ تەڭگە قايتارىمسىز گرانت ۇتىپ الىپتى. ول قاراجاتقا اعاش شەبەرحاناسىنا ارنالعان قۇرال-جابدىقتار الدىرىپ, ءداستۇرلى جينالمالى دوڭگەلەك ۇستەلدەر, ورىندىقتار, ەسىكتەر جانە ت.ب. ونىمدەر جاساۋعا كىرىسىپ كەتكەن.
– رەسەيدەن اعاش كەسەتىن, جوناتىن, سۇرگىلەيتىن, ورنەك سالاتىن 5 ستانوكتى تاپسىرىسپەن الدىردىم. بۇل كاسىپتى باستاعاندا اۋەل باستا قورقىنىش بولعان. دەيتۇرعانمەن بۇعان دەيىن استانا قالاسىندا اعاش شەبەرحاناسىنداعى ەڭبەك تاجىريبەم ماعان ۇلكەن كومەك بولدى. ستانوكتار مەن قۇرال-سايمانداردى يگەرگەنىمنىڭ ناتيجەسىن ەندى كورىپ جاتىرمىن. بالا كەزىمدە ءۇي قوياندارى مەن كوگەرشىندەر وسىرەتىنبىز. ولارعا ارناپ تورلار, ۇيشىكتەر جاسادىق. اعاشتان بۇيىم جاساۋ ونەرى سول كەزدەن قالىپتاسىپ قالعان سىندى. قازىر اعاشتان جانە فانەر كەسىكتەرىنەن ءتۇرلى بۇيىم جاساپ جاتىرمىن. ەڭ اۋەلى جينالمالى دوڭگەلەك ۇستەلدىڭ جەڭىل ءتۇرىن شىعارعىم كەلەدى. كوپ نۇسقانى جاساپ كوردىم, ازىرشە ءتيىستى ناتيجەگە جەتكەن جوقپىن. ۇستەل الىپ جۇرۋگە قولايلى, ساپالى ءارى جىلدام قۇرىلاتىن بولۋى كەرەك, – دەپ ءوز كاسىبى جايىندا اڭگىمەلەدى تاسقايرات جەڭىسوۆ.
ول ءوز كاسىبىن قاراپايىم عانا گاراج قويماسىندا باستاعان. قاراجاتقا قول جەتكىزگەن سوڭ گاراجدىڭ توبەسىن جوندەپ, ەدەنىنە بەتون قۇيعان. ەلەكتر جەلىسى مەن جىلۋ تارتىپ, قابىرعالارىن جىلۋ ۇستاعىش ماتەريالدارمەن قاپتاپتى. ەندى ءوز تىرلىگىنە الاڭسىز كىرىسىپ جاتىر.
ازىرشە شەبەرحانادا جالعىز ءوزى جۇمىس ىستەيدى. ايتۋىنشا, ساپالى شيكىزاتتى تابۋ قيىن. جەرگىلىكتى جەردە اعاش وڭدەيتىن تسەحتار جوقتىڭ قاسى, ال سىرتتان كەلەتىن بۇيىمنىڭ ساپاسىن تاپ باسۋ قيىن. ەلەكتر قۇرالدارى مەن ۇساق فۋرنيتۋرالاردى كوبىنە پاۆلودار قالاسىنا بارىپ اكەلىپ ءجۇر.
«ەڭ اۋەلى اۋىل ادامدارىن كۇندەلىكتى ومىرىنە قاجەت بۇيىمدارمەن قامتاماسىز ەتۋدى ۇيعارىپ وتىرمىن. قازىر تۇرعىنداردان دالا دارەتحانالارى, دوڭگەلەك ۇستەلدەر, جۇمساق ورىندىقتارعا تاپسىرىستار ءتۇسىپ جاتىر. كوپتەن جوسپارلاپ جۇرگەن جۇمىستارىمنىڭ العاشقى كەزەڭىن ەڭسەردىم, ەندى كەلەشەكتە بۇيىمدارىمنىڭ اسسورتيمەنتىن كوبەيتۋ كەرەك», دەپ وي ءبولىستى.
تاسقايرات ءسوز سوڭىندا قايتارىمسىز گرانت اۋىلداعى ءوزى سياقتى جاستار ءۇشىن كاسىپ اشۋدا ۇلكەن كومەك بولىپ وتىرعانىن جەتكىزدى. شەبەرحانا يەسى الداعى ۋاقىتتا قولىنان ءىس كەلەتىن ازاماتتاردى جۇمىسقا قابىلداپ, كاسىبىنىڭ اۋقىمىن كەڭەيتۋدى جوسپارلاپ وتىر.
پاۆلودار وبلىسى,
باياناۋىل اۋدانى
