كوزىقاراقتى جانكۇيەرلەر بۇل ەسىمدى جاقسى بىلەدى. حح عاسىردىڭ بەل ورتاسىندا اسا اۋىر سالماق دارەجەسىندە اتوي سالعان بالتىق جاعالاۋىنىڭ الىبى ەۋروپا چەمپيوناتىنىڭ ەكى جانە كسرو بىرىنشىلىگىنىڭ التى دۇركىن چەمپيونى اتاندى. كسرو حالىقتارى سپارتاكياداسىندا باس جۇلدەنى ولجالاپ, باسقا دا اسا ءىرى دودالاردا دارالاندى. سول كەزدەرى ونىڭ جولى قازاقتىڭ داڭقتى بوكسشىسى ءابدىسالان نۇرماحانوۆپەن بىرنەشە مارتە قيىستى. بىردە ول جەڭدى, بىردە ابەكەڭنىڭ اسىعى الشىسىنان ءتۇستى. بىلعارى قولعابىن شەگەگە ىلگەننەن كەيىن شوتسيكاس ليتۆا بوكسشىلارىن جاتتىقتىردى, وداق قۇراماسىنىڭ باس باپكەرىنىڭ كومەكشىسى بولدى. 2012 جىلدىڭ كۇزىندە الگيرداس شوتسيكاس 85 جاسقا قاراعان شاعىندا جارىق دۇنيەمەن قوش ايتىستى.
كاۋناستاعى تۋرنيردە قازاقستاننىڭ توعىز بىلعارى قولعاپ شەبەرى فينالعا شىعىپ, سولاردىڭ اراسىنان التاۋى التىن تۇعىرعا كوتەرىلدى. اقتىق سايىستا اسىلجان سەرىكباي (57 كگ) مەن فارۋح توقتاسىنوۆ (71 كگ) ۋكراينالىق دەنيس روزدولسكي مەن ماكسيموم مولوداندى, ەلنۇر ءسۇيىنباي (67 كگ) مەن ازامات بەكتاس (75 كگ) پولشالىق كيريلل گلوبەنكو مەن ميحال يارلينسكيدى جانە تۇرسىنباي قۇلاحمەت (80 كگ) ۇلىبريتانيالىق رامتين مۇسانى ۇتتى. جاندوس قىدىراليەۆتىڭ (63,5 كگ) قارسىلاسى يرلانديالىق دجون پول حەيل جەكپە-جەككە شىعۋدان باس تارتتى. ال نۇرسۇلتان التىنبەك (54 كگ), المات ءابدۋالي (60 كگ) جانە ابزال قۇتتىبەكوۆ (86 كگ) شەشۋشى تۇستا ءسۇرىنىپ, كۇمىس مەدالدى قاناعات تۇتسا, دانيال ءسابيت (48 كگ) پەن امانات سابىرعالي (+92 كگ) قولاعا قول سوزدى.
