تەلەجۇرگىزۋشى قىز چەدجۋدو ارالىنىڭ ساياساتى مەن تىنىس-تىرشىلىگى تۋرالى اقپاراتتى وقىپ بەرەدى. ونىڭ ءماتىنىن دە دايىنداپ بەرەتىن – جاساندى ينتەللەكت. جالاقى سۇرامايتىن, اۋىرىپ قالمايتىن, داۋىسى, مانەرى بۇزىلمايتىن, بويانبايتىن جۇرگىزۋشى قاي جاعىنان الىپ قاراساڭىز دا ءتيىمدى دەيدى ماماندار. باعدارلاماعا ايىنا 600 000 ۆون جۇمسالادى ەكەن. بۇل – شىن جۇرگىزۋشىلەر مەن رەداكتورلار كومانداسىن جالداعاننان الدەقايدا ارزان.
بۇگىنگى تاڭدا ەلىمىزدە دە تەلەستۋديالىق حابارلاردى جاساندى ينتەللەكت جۇرگىزەتىن جۇيەلەر ىسكە قوسىلدى. اتاپ ايتساق, «تۇركىستان» تەلەارناسىندا كۇنشۋاق تابيعاتقىزى ەسىمدى روبوت قىز كۇن رايىنان حاباردار ەتەدى. تاپ سولاي «قىزىلوردا» تەلەارناسىنداعى اۋا رايىن ايجان سىرقىزى ەسىمدى جاساندى جۇرگىزۋشى بايانداپ وتىرادى.
وي كۇشىمەن وينادى
يلون ماسكتىڭ «Neuralink» كومپانياسى ميىنا يمپلانت ورناتىلعان پاتسيەنتتىڭ شاحمات ويناعانىن جاريا ەتتى.
جازاتايىم وقيعانىڭ سەبەبىنەن نولان اربو ەسىمدى جىگىت دەنەسىنىڭ يىعىنان تومەن جاعىن مۇلدە سەزبەيدى. بىراق ميىنا ورناتىلعان يمپلانت وي كۇشى ارقىلى ءتىنتۋىردى قوزعالتىپ, كومپيۋتەردى يگەرە الاتىن جاعدايعا جەتتى. ويىن بارىسى تىكەلەي ترانسلياتسيا ارقىلى 20 ناۋرىزدا «Neuralink»-تە كورسەتىلدى.
اربونىڭ ايتۋىنشا, سال اۋرۋىنىڭ كەسىرىنەن سۇيىكتى كومپيۋتەر ويىندارىنان باس تارتقانىنا كوپ بولىپتى. ال جاڭا قوندىرعى جاڭا مۇمكىندىكتەرگە جول اشىپ وتىر. «بۇل مەنىڭ ءومىرىمدى تۇبەگەيلى وزگەرتتى. وپەراتسيا وتە جەڭىل ءوتتى», دەيدى ول.
«Neuralink» – كومپيۋتەرگە قوسىلاتىن مي چيپتەرىمەن جۇمىس ىستەيتىن الەمدەگى جالعىز كومپانيا. وي كۇشى ارقىلى ىقپال ەتەتىن تاجىريبە جۇمىستارى ىلگەرىدە جاسالعان ەكەن. بۇل – زەرتتتەۋ ينستيتۋتتارىنىڭ كونسورتسيۋمى مەن Brain Gate ەمحاناسىنىڭ بىرلەسكەن جوباسى.
الەۋمەتتىك جەلىگە تىيىم سالدى
الەۋمەتتىك جەلىگە شەكتەۋ قويىلادى. جو-جوق, ءبىزدىڭ ەلدە ەمەس. اقش-تىڭ فلوريدا شتاتىنىڭ گۋبەرناتورى رون دە سانتيس ەنگىزگەن زاڭ – بۇل.
فلوريدا شتاتىنىڭ گۋبەرناتورى رون دە سانتيس 2024 جىلدىڭ 25 ناۋرىزىندا 14 جاسقا تولماعان بالالاردىڭ الەۋمەتتىك جەلىدەگى پاراقشالارىنا تىيىم سالىناتىنى تۋرالى زاڭعا قول قويدى. تارقاتىپ ايتساق, زاڭ 2025 جىلدىڭ ءبىرىنشى قاڭتارىنان باستاپ كۇشىنە ەنەدى. ەگەر 14 جاسقا دەيىنگى بالالاردىڭ الەۋمەتتىك جەلىدە پاراقشالارى بار بولىپ شىقسا, وندا ونىڭ اتا-اناسى 50 مىڭ دوللار ايىپپۇل ارقالاماق. بۇنىڭ ءبارى نە ءۇشىن دەيسىز عوي؟ سەبەپ بىرەۋ-اق. شتات گۋبەرناتورى ءوز مالىمدەمەسىندە الەۋمەتتىك مەديا بالالارعا زيان تيگىزەتىنىن, جاڭا زاڭ اتا-انالارعا بالالارىن جوسىقسىز اقپاراتتان قورعاۋعا كوبىرەك مۇمكىندىك بەرەتىنىن اتاپ ءوتتى.
دايىنداعان –
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى
