فوتو: ا.بايجۇمانوۆ
كوميتەت توراعاسى ءالي بەكتاەۆ ەكولوگيالىق كودەكستىڭ 2021 جىلى قابىلدانعانىن اتاپ ءوتتى. بۇل باعىتتا بىرنەشە جىل بويى اتقارىلعان اۋقىمدى ىستەر ناتيجەسىندە قۇجاتتا ۇزدىك حالىقارالىق تاجىريبەگە نەگىزدەلگەن ستراتەگيالىق ەرەجەلەر توپتاماسى بەكىتىلگەن.
«ەكولوگيالىق كودەكستىڭ نەگىزگى ماقساتىنىڭ ءبىرى – قورشاعان ورتاعا تەرىس اسەردى ازايتۋ. ول ءۇشىن ونەركاسىپتىك كاسىپورىنداردى تەحنيكالىق جاعىنان جاڭعىرتۋ كوزدەلگەن. سولاردىڭ ءبىرى – ەڭ جاقسى قولجەتىمدى تەحنيكانى بىرتە-بىرتە ەنگىزۋ جانە جاسىل ينۆەستيتسيالاردى قولداۋ تاسىلدەرى قاراستىرىلعان. كودەكستە بۇل نورمالاردىڭ ىسكە اسىرىلۋى كەزەڭ-كەزەڭمەن بەكىتىلگەن», دەدى ءالي بەكتاەۆ.
ەكولوگيا جانە تابيعي رەسۋرستار ءمينيسترىنىڭ ورىنباسارى مانسۇر وشۋرباەۆ ءوز كەزەگىندە ەكولوگيالىق كودەكس قازىرگى زامانعى ەكولوگيالىق ساياسات باعىتىنداعى ماڭىزدى قادام ەكەنىن جانە قورشاعان ورتانىڭ جاي-كۇيىن جاقسارتۋ مەن ەكولوگيالىق تەپە-تەڭدىكتى ساقتاۋعا ۇمتىلىستىڭ اجىراماس بولىگى رەتىندە جاسىل تەحنولوگيانى ەنگىزۋ تەتىكتەرىن كوزدەيتىنىن اتاپ ءوتتى. قورشاعان ورتاعا تەرىس اسەردى ازايتۋ مەن ەكولوگيالىق جاعدايدى جاقسارتۋدىڭ ءتيىمدى قۇرالى – ەڭ جاقسى قولجەتىمدى تەحنولوگيانى ەنگىزۋ.
ءىس-شاراعا ەكولوگيا, ونەركاسىپ جانە قۇرىلىس, ۇلتتىق ەكونوميكا, ساۋدا جانە ينتەگراتسيا مينيسترلىكتەرىنىڭ, مەملەكەتتىك كىرىستەر كوميتەتىنىڭ باسشىلىعى, سونداي-اق قازاقستاننىڭ دامۋ بانكىنىڭ, عىلىمي-زەرتتەۋ ينستيتۋتتارىنىڭ وكىلدەرى جانە وسى سالانىڭ ساراپشىلارى قاتىستى.
