بۇدان بۇرىن حابارلاعانىمىزداي, باتىس قازاقستان وبلىسىندا تولاسسىز جاۋعان جاڭبىر جانە قاردىڭ كۇرت ەرۋىنەن بىرنەشە ەلدى مەكەنگە سۋ باسۋ قاۋپى تونگەن بولاتىن. قاۋىپتىڭ الدىن الۋ, تاسقىن سۋدىڭ بەتىن قايتارۋ ىسىنە ۇلتتىق ۇلاننىڭ «باتىس» وڭىرلىك قولباسشىلىعىنا قاراستى 5517 اسكەري ءبولىمى ەرەكشە كومەكتەسىپ جاتىر. ۇلاندىقتار قازىر سۋ باسۋ قاۋپى جوعارى جەرلەردە ارنايى بوگەتتەر قۇرىپ, كوشەلەر مەن اۋلالاردا جينالىپ قالعان قاردى شىعارىپ, سۋدىڭ ءوز ارناسىمەن ءجۇرۋى ءۇشىن ارىقتاردى تازالاپ ءجۇر.
– بۇل ىسكە اتسالىسۋ ءبىزدىڭ مىندەتىمىز دەگىم كەلەدى. ۇلتتىق ۇلان جاۋىنگەرلەرى ارقاشان حالىققا كومەكتەسىپ, كەز كەلگەن قيىندىقتىڭ الدىن الۋعا كۇش-جىگەرىن سالادى, – دەيدى اسكەري ءبولىمنىڭ باتالون كومانديرى مايور جاسۇلان كورپەشوۆ.
ايتا كەتەيىك, قازىر ورال قالاسىندا ۇلتتىق ۇلان ساپىنان 100-گە جۋىق ادام ءتىلسىز جاۋمەن كۇرەستە ءجۇر. كەشەگىدەي ەمەس, كوپ ايماقتا سۋ باسۋ قاۋپى تومەندەگەن.
وبلىستىق توتەنشە جاعدايلار دەپارتامەنتىنىڭ حابارلاۋىنشا, 26 ناۋرىز كۇنى جاۋىن-شاشىننىڭ ءبىر ايلىق كولەمى تۇسكەن. جالپى سۋ تاسقىنىنىڭ الدىن الۋ ىسىنە بارلىعى 990 ادام جۇمىلعان, ونىڭ ىشىندە № 5517 جانە № 99250 اسكەري ءبولىم جاۋىنگەرلەرى بار.
27 ناۋرىز كۇنگى 11:00 ساعات بويىنشا زارداپ شەككەندەر جوق, ەلدى مەكەندەرگە دە قاۋىپ جوق. بارلىق قاۋىپتى ايماقتا كەزەكشىلىك ۇيىمداستىرىلعان.
باتىس قازاقستان وبلىسى
