اقپاراتتىق جۇيە ينجەنەرى ماماندىعىن مەڭگەرىپ, ەڭبەك جولىن جەكە كومپيۋتەرلىك كلۋبتا باستاعان جانمۇرات الدوڭعاردىڭ دا تاعدىرى كەيىن «تەڭىزبەن» توقايلاسقان. بىلىكتى مامان كەن ورنىندا ماتەريالدارمەن قامتاماسىز ەتۋ جونىندەگى ۇيلەستىرۋشى بولىپ 10 جىلعا جۋىق جۇمىس ىستەدى. كوفە, شاي قۇياتىن قاعاز ستاكان جاسايتىن كاسىپ اشۋعا بەكىنگەنى دە سول كەز.
ارينە, قاي ءىستى باستاۋعا سەبەپشى بولاتىن جايت بار. كەنىش ورنىندا جۇمىس ىستەيتىندەرگە تۇسكە دەيىن, تۇسكى استان سوڭ شاي مەن كوفە ىشۋگە 15-20 مينۋت ءۇزىلىس بەرىلەتىن. سوندا سۋسىندار 200 ميلليگراممدىق قاعاز ستاكانمەن ۇسىنىلادى. بۇل – ءبىر رەت قولدانىلاتىن ىدىس. ونىڭ سىرتىندا «تۇركيادا شىعارىلعان» دەپ جازىلعان.
«وسىنداي ىدىستى وزىمىزدە شىعارۋعا بولماي ما؟», «بۇل ءىستى قولعا الىپ كورسەم قالاي بولار ەكەن؟» دەگەن ساۋالدار تۋىنداپ, ويىمنان شىقپاي قويدى. ءسويتىپ, بۇل ءوندىرىستىڭ ءتيىمدى تۇستارىن, شىعىنىن زەرتتەي باستادىم. كەيىن جەكە كاسىپ اشۋعا ءبىرجولا شەشىم قابىلدادىم. ارينە, ءبارى بىردەن وڭعارىلدى دەۋگە بولمايدى. الدىمەن الەۋەتتى قامتۋشىلارمەن كەلىسسوز جۇرگىزىپ, قىتايدان قاجەتتى جابدىقتار ساتىپ الدىم», دەيدى جانمۇرات الدوڭعار.
مۇقيات دايىندىقتىڭ ناتيجەسىندە, بەس جىل بۇرىن ءۇيىنىڭ اۋلاسىندا قاعاز ىدىس شىعاراتىن تسەح اشقان. باستاپقىدا تسەحقا ءبىر ستانوك ورناتىپتى. قازىر ءتورت ادامدى تۇراقتى جۇمىسپەن قامتىپ وتىر. ولار 8 ساعاتتىق ەكى اۋىسىممەن جۇمىس ىستەيدى. ال 2021 جىلى مەملەكەتتەن 4 ميلليون تەڭگەنىڭ قايتارىمسىز گرانتىن يەلەنىپ, تاعى ەكى ستانوك ساتىپ العان. ونىڭ ءبىرى 200, ەكىنشىسى 250 ميلليگرامدىق ستاكان شىعارۋعا ارنالعان.
«قاعاز ىدىس ەلىمىزدە شىعارىلسا, باعاسى ارزان بولادى. «تەڭىز» كەن ورنىنداعى مەردىگەر كومپانيالارعا ساپالى ءارى تىم قىمبات ەمەس ءونىم قاجەت. قازىر كەن ورنىنا مەردىگەرلىككە تارتىلعان ءتورت كومپانيا مەنەن قاعاز ىدىس الادى. تاعى ءبىر تاپسىرىس بەرۋشى – باتىس قازاقستان وبلىسىنداعى مۇناي كومپانياسى», دەيدى ج.الدوڭعار.
ايتۋىنشا, ءۇش ستانوكپەن ايىنا 4 ميلليونعا جۋىق قاعاز ىدىس شىعارىلادى. سونىڭ 1,5 ميلليون داناسى اي سايىن «تەڭىز» كەن ورنىنا جىبەرىلەدى.
«قاعاز ىدىس شىعارۋ ءۇشىن «قازاقستاندا جاسالعان» ليتسەنزياسىنا قول جەتكىزدىم. بۇل «تەڭىز» كەن ورنىنداعى بارلىق مەردىگەر كومپانياعا وتاندىق ءونىمدى ۇسىنۋعا سەپتىگىن تيگىزدى. بۇرىن «تەڭىز» كەن ورنىندا جۇمىس ىستەگەن قىزمەتكەر ەدىم. ەندى ءوزىم وسىنداعى كومپانيالارعا مەردىگەر بولىپ وتىرمىن. مەردىگەرلەر وتاندىق تاۋاردى ساتىپ الۋعا قولداۋ ءبىلدىردى. قازىر كەيبىرى 300 ميلليگرامدىق ستاكانعا تاپسىرىس بەردى. جاقىن ارادا 300, 350, 450 ميلليگرامم ستاكانداردى شىعاراتىن ستانوكتار ساتىپ الۋدى كوزدەپ وتىرمىن», دەيدى كاسىپكەر.
اتىراۋ وبلىسى
