ايەلىنەن رەسمي تۇردە اجىراسقاندار بالاسىنىڭ قاجەتتىلىگىن قامتاماسىز ەتە الماۋىنا ءارتۇرلى سەبەپ ايتادى. كوپشىلىگىنىڭ تۇراقتى تابىسى جوق, كەيبىرى باسقا مەملەكەتكە قونىس اۋدارعان نەمەسە بىرقاتارىنىڭ تۇرعىلىقتى مەكەنجايىن انىقتاۋ مۇمكىن ەمەس. اراسىندا ءىز-ءتۇزسىز كەتكەندەر دە بار. اليمەنت تولەمەۋگە قىرىق ءتۇرلى سىلتاۋ تاپسا دا, «نەكە جانە وتباسى تۋرالى» كودەكسىنە سايكەس اجىراسقان اكە مەن شەشە بالانى 18 جاسقا دەيىن تاربيەلەپ, ومىرلىك باعدار بەرۋگە مىندەتتى. اجىراسۋ ولاردان نەگىزگى جاۋاپكەرشىلىكتى الىپ تاستامايدى, بالالارىنىڭ سانىنا قاراي اي سايىن اليمەنت تولەپ تۇرۋعا ءتيىس.
قازىرگى كەزدە اقتوبە وبلىسى سوت ورىنداۋشىلارىنىڭ قولىندا اليمەنت ءوندىرىپ الۋ تۋرالى 10 مىڭنان اسا اتقارۋشىلىق ءىس بار. ادىلەت مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ 2017 جىلى بەكىتىلگەن جۇمىسپەن قامتۋ ورگاندارى مەن سوت ورىنداۋشىلارىنىڭ ءوزارا ءىس-قيمىلى تۋرالى بىرلەسكەن بۇيرىعىنا سايكەس, بورىشكەرلەرگە بوس جۇمىس ورىندارى ۇسىنىلادى. ۋاكىلەتتى ورگانداردا ءارتۇرلى بوس جۇمىس ورىندارى تۋرالى بارلىق اقپارات بار جانە بورىشكەرلەردىڭ كاسىبي بىلىكتىلىگى مەن ماماندىعىنا سايكەس جۇمىس تۇرلەرى ۇسىنىلادى.
وكىنىشكە قاراي, كوپ جاعدايدا اجىراسۋدىڭ باستى سەبەپتەرى – ەر ادامداردىڭ ماسكۇنەمدىگى مەن ەسىرتكىگە تاۋەلدىلىگى, قارىزعا باتۋى. ايەلدەر وتباسىن ساقتاپ قالۋ مۇمكىن بولماعان كەزدە عانا اجىراسادى. اليمەنت تولەمەي جۇرگەن بورىشكەرلەردىڭ ءبىرسىپىراسى – بانكتەر مەن ميكروقارجى ۇيىمدارىنىڭ الدىندا قارىزعا باتۋ, لۋدومانياعا شالدىققاندار جانە قارجى پيراميداسىنا كىرىپ قارىزعا بەلشەسىنەن باتقاندار. ءبىر نازار اۋدارارلىق جايت, نەكەسى بۇزىلعاندار اراسىندا كەيىنگى كەزدە ويىنقۇمارلىققا شالدىققان ايەلدەر سانى كوبەيگەن.
اقتوبە وبلىسى
