بۇل – ساعات تۇنگى ون بىردە جابىلاتىن الەمدەگى جالعىز اۋەجاي. 23.00-دە جابىلىپ, 06.00-دە اشىلادى. سەبەبى تاسىمال قىزمەتى سول جەردە تۇراتىن وتباسىنىڭ مازاسىن الماۋى كەرەك. مەملەكەت وسى اۋماققا جاڭا اۋەجاي سالامىز دەگەندە, تاڭدالعان جەردىڭ جارتىسى قاراپايىم شارۋالاردىكى بولىپ شىعادى. جەرگىلىكتى بيلىك قوماقتى اقشا تولەپ, جەردى ساتىپ الماق بولادى. شارۋالاردى كوشۋگە كوندىرىپ, جەردى بوساتادى. تەك ءبىر ءۇي عانا اقشادان باس تارتىپ, جەرىن ساتپايدى. قازىردىڭ وزىندە ولاردىڭ بالالارى تۋربينالاردىڭ گۇرىلدەۋىنە جانە بيلىكتىڭ ءجيى ايتاتىن ء«دارىسىن» تىڭداۋعا ابدەن كوندىككەن. وزدەرى جايقالتقان كوكونىس باقتارىندا ءومىر ءسۇرىپ جاتىر. سوڭىندا شىداماعان ۇكىمەت 2 ملن دوللار ۇسىنادى, شارۋا سوندا دا جەرىن ساتۋدان باس تارتادى. مىنە, دەموكراتيا!
ءچيپى بار ادام
يلون ماسكتىڭ كومپانياسى Neuralink ءچيپى سالىنعان العاشقى ادامنىڭ ناتيجەلەرىن كورسەتتى.
چيپ سالىنعان جىگىت – نولاند اربو, جاسى – 29-دا. اۋىر اپاتتىڭ كەسىرىنەن ول موينىنان تومەن سال بولىپ قالعان. قاڭتاردا وعان Neuralink ءچيپى ەنگىزىلدى, قالپىنا كەلۋى ءۇشىن ءبىر ايعا جۋىق ۋاقىت كەتتى. ال قازىر اربو كومپيۋتەردەگى كەيبىر تاپسىرمالاردى ورىنداي الاتىن جاعدايعا جەتتى. مىسالى, براۋزەرگە كىرە الادى, ويىن وينايدى. ءتىپتى شاحماتتا قىزۋ باسەكەگە تۇسۋگە قاۋقارى بار. جىگىت چيپ سالىنعاننان بەرى ءوزىن «سال ەمەس, قاراپايىم, ساۋ ادام سەزىنەتىنىن» دە ايتقان.
بۇيرەك ترانسپلانتاتسياسى
تالپاق تاناۋدىڭ بۇيرەگى العاش رەت ءتىرى ادامعا ءساتتى ترانسپلانتاتسيالاندى. بۇل تۋرالى وپەراتسيا جاسالعان اۋرۋحانانىڭ سايتى حابارلادى.
16 ناۋرىزدا بوستونداعى «Massachusetts General» اۋرۋحاناسىندا ءتورت ساعاتتىق وپەراتسيا جاسالدى. وندا 62 جاستاعى ريك سلەيمانعا گەنەتيكالىق تۇرلەندىرىلگەن شوشقانىڭ بۇيرەگى سالىندى. قازىر ول وپەراتسيادان كەيىن قالپىنا كەلىپ جاتىر. جاقىن ارادا اۋرۋحانادان شىعادى. امەريكالىق حيرۋرگتەر مۇنداي جاڭا وپەراتسيا كەلىسىم بەرگەن ەر ادامدى ناعىز باتىرعا بالاپ, العىسىن ايتتى.
عالىمدار وزگەرتىلگەن مۇشەلەردى ادامدارعا سالۋ دونورلىق ورگانداردىڭ سوزىلمالى تاپشىلىعىن جەڭىلدەتەدى دەپ ۇمىتتەنەدى. سەبەبى دۇنيەجۇزىندە دونور جەتىسپەۋ ماسەلەسى – ۋشىعىپ تۇر. مىسالى, اقش-تا كۇن سايىن ترانسپلانتاتسيانى كۇتكەن 17 ادام قايتىس بولادى. بۇل جاعدايدا ەڭ جەتىسپەيتىن اعزا – بۇيرەك. سول سەبەپتى دە عالىمدار, امال جوق وسىنداي ادىسكە كوشكەن.
