فوتو: ن.بايبۋلين
سەنات سپيكەرى ءوز سوزىندە كونستانتينوس كومبوستى جانە بارشا كيپر حالقىن وسى ەلدىڭ ۇلتتىق كۇنىمەن قۇتتىقتادى. سونداي-اق ول كيپر قازاقستاننىڭ ەۋروپاداعى ماڭىزدى ساياسي جانە ەكونوميكالىق سەرىكتەستەرىنىڭ ءبىرى ەكەنىن تىلگە تيەك ەتىپ, اتالعان مەملەكەتتىڭ جوعارى قارقىنمەن دامىپ كەلە جاتقانىنا نازار اۋداردى.
ماۋلەن اشىمباەۆ وتكەن جىلدار ىشىندە قازاقستان مەن كيپر اراسىندا قۇرمەت پەن سەنىمگە نەگىزدەلگەن ءوزارا ءىس-قيمىلدىڭ بەرىك نەگىزى قالىپتاسقانىن دا اتاپ ءوتتى. كەزدەسۋ كەزىندە ەكى ەلدىڭ پارلامەنتارالىق قارىم-قاتىناسىن ودان ءارى جانداندىرۋ ماڭىزدى ەكەنىنە دە باسا ءمان بەرىلدى.
ء«وزارا سەنىمگە نەگىزدەلگەن جوعارى دەڭگەيدەگى ديالوگ بارلىق باعىتتاعى بايلانىسىمىزدىڭ ارتۋىنا زور ىقپالىن تيگىزدى. ءبىز استانادا كيپر ەلشىلىگىن اشۋ تۋرالى شەشىمدى قۇپتايمىز. مۇنداي قادام ەكىجاقتى بايلانىستاردى نىعايتا وتىرىپ, قارىم-قاتىناسىمىزدى جاڭا دەڭگەيگە شىعارادى دەپ ەسەپتەيمىز. قازاقستان پارلامەنتى كيپرمەن پارلامەنتارالىق ىنتىماقتاستىقتى دا دامىتۋعا مۇددەلى. ءبىزدىڭ پارلامەنتتىڭ ەكى پالاتاسىندا دا كيپردىڭ زاڭ شىعارۋشى ورگانىمەن دوستىق توپتارى جۇمىس ىستەيدى. سول توپتاردىڭ الەۋەتىن ءتيىمدى پايدالانۋ ماڭىزدى», دەدى ماۋلەن اشىمباەۆ.
سونىمەن قاتار سەنات سپيكەرى قازاقستاندا مەملەكەت باسشىسى قاسىم-جومارت توقاەۆتىڭ باستاماسىمەن جۇرگىزىلىپ جاتقان اۋقىمدى ساياسي جانە الەۋمەتتىك-ەكونوميكالىق جاڭعىرۋلاردىڭ ناتيجەلەرىنە توقتالىپ ءوتتى. سونداي-اق كونستانتينوس كومبوسقا جاڭا ەكونوميكالىق ۇلگىگە كوشۋ جولىندا قولعا الىنعان شارالار تۋرالى دا ايتىپ بەردى.
ءوز كەزەگىندە كيپردىڭ سىرتقى ىستەر ءمينيسترى قازاقستاندا ىسكە اسىرىلعان قوعامدىق-ساياسي وزگەرىستەردى جوعارى باعالادى جانە ەكى ەل اراسىنداعى, ونىڭ ىشىندە پارلامەنتارالىق ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.
ودان بولەك, كەزدەسۋدە تاراپتار ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق باعىتتاعى بايلانىستاردى دا ارتتىرۋ ماسەلەلەرىن تالقىلادى.
