جارتىلاي فينالعا قاتىسۋعا بارلىعى 100 ستارتاپ ىرىكتەلدى. گراند فينالعا 12 قاتىسۋشى جولداما الىپ, سونىڭ التاۋى اقشالاي سىيلىقپەن ماراپاتتالدى. CerebraAI – ءينسۋلتتى دەر كەزىندە انىقتاۋعا ارنالعان وتاندىق جاساندى ينتەللەكت. كوماندانىڭ يننوۆاتسيالىق ازىرلەمەسى – دارىگەرلەرگە زاماناۋي تەحنولوگيالاردى پايدالانا وتىرىپ, مۇمكىندىگىنشە جىلدام جانە ايقىن دياگنوز قويۋعا كومەكتەسەدى. بۇگىندە ينسۋلت – الەمدەگى ءولىم-ءجىتىمنىڭ باستى سەبەپتەرىنىڭ ءبىرى. سول سەبەپتى بۇل جوبا مي اۋرۋلارىن دياگنوستيكالاۋ بويىنشا عالامنىڭ ۇزدىك بەس ستارتابىنىڭ قاتارىنا ەندى. ستارتاپ بۇعان دەيىن دە «Global Startup Awards» حالىقارالىق بايقاۋىندا ۇزدىك اتانىپ, «Intel» ستارتاپ قاۋىمداستىعىنىڭ مۇشەسى اتانعان ەدى.
جوبانىڭ باستى ەرەكشەلىگى – دارىگەرلەرگە بارىنشا جىلدام ءارى ناقتى ءينسۋلتتى دياگنوستيكالاۋعا كومەكتەسەدى. جاساندى ينتەللەكت 4 مينۋتتىڭ ىشىندە ءينسۋلتتى انىقتاپ, ميدىڭ ناقتى كارتيناسىن ۇسىنادى. ادەتتە تاجىريبەدە بۇعان دارىگەرلەردىڭ بىرنەشە ساعاتى كەتەدى. ال CerebraAI قولدانباسى ءبىرىنشى تۇسىرىلىمنەن-اق ءينسۋلتتىڭ بەلگىلەرىن انىق كورۋگە مۇمكىندىك بەرەدى. ونىڭ ءموبيلدى ءارى ۆەب-قولدانبا بولۋى دا مەديتسينا سالاسىنا ۇلكەن جەڭىلدىك. دارىگەر قولىنداعى كەز كەلگەن گادجەتپەن ناۋقاستىڭ دياگنوستيكاسىن كورىپ, وپەراتسيا قاجەت بولسا, جىلدام كىرىسىپ كەتەدى. بۇرىن بۇل ۇدەرىس وتە ۇزاق جۇرەتىن. دياگنوستيكا سۋرەتتەرىن ءتۇسىرىپ, ءبىر-بىرىنە مەسسەندجەر ارقىلى جىبەرەدى نەمەسە ونى قاراۋعا كومپيۋتەر قاجەت ەدى. ال قازىر قولداعى گادجەتكە CerebraAI قولدانباسىن كوشىرىپ السا, جەتكىلىكتى. بۇل جۇمىستى ەداۋىر جەڭىلدەتەدى ءارى جىلدامداتادى.
جوبا يەلەرى قولدانبانى اۋەلى تەك ەكى اۋرۋحاناعا ورناتقان. ولار – الماتى قالالىق 7-اۋرۋحاناسى مەن الماتى قالالىق مەديتسينالىق جەدەل جاردەم اۋرۋحاناسى. اتالعان اۋرۋحانالاردا جاڭا تەحنولوگياعا تەز بەيىمدەلە الاتىن نەيروحيرۋرگتەر مەن نەۆرولوگتەر بار. CerebraAI اۆتورلارىنىڭ ايتۋىنشا, ەلىمىزدە ءينسۋلتتى ەمدەيتىن ماماندار وتە ساۋاتتى. سەبەبى شەتەلدەرگە ءجيى شىعىپ, بىلىكتىلىگىن ارتتىرىپ, شەت تىلدەرىن جەتىك مەڭگەرگەن, عىلىمي ماقالا جازادى. دارىگەرلەر جاساندى ينتەللەكتىنى قولدانىپ, تسيفرلىق سالاعا قىزىعۋشىلىق تانىتىپ وتىر. ولار دەنساۋلىق ساقتاۋ سالاسىندا جاساندى ينتەللەكتىنى ەنگىزۋ قاجەت ەكەنىن, ونى قولدانۋدى زاڭداستىرۋدى سۇراپ مينيسترلىككە دە, اكىمدىكتەرگە دە تالاي رەت حات جازعان. بىراق ودان ەش وزگەرىس بولماعان.
– جوبامىزدى پرەزيدەنتتىڭ الدىندا ءۇش رەت تانىستىردىم. ءار كەزدەسۋدەن سوڭ مەملەكەت باسشىسى جاساندى ينتەللەكتىنىڭ مەديتسيناعا ەنۋى ماڭىزدى ەكەنىن ايتىپ, جاۋاپتى ورگانعا تاپسىرما بەرەدى. سودان سوڭ سەڭ قوزعالىپ, مينيسترلىكتە وسى ىسپەن اينالىساتىن جۇمىس توبى قۇرىلادى. بىراق ءبىر-ەكى كەزدەسۋ, تالقىلاۋدان ءارى جىلجىمايدى. ساۋد ارابياسىنىڭ وكىلدەرى ءبىزدىڭ ستارتاپ نەگىزىندە ءوز جوبالارىن جاساماقشى بولىپ, تەحنولوگياعا قاتتى قىزىقتى. بىراق سۇراق ء«وز ەلدەرىڭدە قانشا تابىس تاپتىڭدار؟» دەگەنگە جەتكەندە, تۇيىققا تىرەلەمىز. وسىدان كەيىن ولاردا ءتۇرلى سۇراق تۋىپ, كۇمانى كوبەيە تۇسەدى. ءبىز ەلىمىزدىڭ دەنساۋلىق ساقتاۋ جۇيەسىندە جاساندى ينتەللەكتىنى اقىلى قولدانۋ ءالى قالىپتاسپاعانىن ايتىپ, تۇسىندىرۋگە تىرىسامىز. مەنىڭشە, دەنساۋلىق ساقتاۋ سالاسىندا جاساندى ينتەللەكتىنى زاڭداستىرىپ, وعان باسىمدىق بەرەتىن ۋاقىت كەلدى, – دەيدى جوبا اۆتورى دوسجان ءجۇسىپوۆ.
2021 جىلدان بەرى CerebraAI ەلىمىزدىڭ بارلىق قالاسىنداعى 90-نان استام اۋرۋحاناعا تەگىن ورناتىلعان. سول ارقىلى 100 مىڭ ناۋقاس تەكسەرىلدى. 500-دەن استام دارىگەر جاساندى ينتەللەكت تەحنولوگياسىن پايدالاندى. ال 46 مەديتسينالىق مەكەمە ءالى كۇنگە دەيىن CerebraAI مۇمكىندىگىن تۇراقتى ءارى بەلسەندى تۇردە قولدانىپ كەلەدى. رەسمي دەرەك بويىنشا, ەلىمىزدە جىلىنا 40 مىڭنان استام ادام ينسۋلت العان. سوندىقتان جىل وتكەن سايىن بۇل جوبانىڭ قۇنى دا, قاجەتتىلىگى دە ارتا بەرمەك.
قازىرگى تاڭدا CerebraAI كومانداسى ءينسۋلتتى انىقتايتىن قولدانبادان بولەك تاعى باس سۇيەك, مي جاراقاتى, ميدىڭ قاتەرلى ىسىگى, ستەنوز, ومىرتقا جانە بۇيرەك اۋرۋلارى بويىنشا زەرتتەۋلەر جۇرگىزىپ جاتىر. اسىرەسە جاساندى سانا كومەگىمەن مي اۋرۋلارىن انىقتايتىن جوبا ناقتىلانعان. سونىمەن قاتار جوبا جەتەكشىسى الماتىدا مەديتسينا تەحنولوگياسىنا ارنالعان جاساندى ينتەللەكت زەرتحاناسىن اشۋ جوسپارلانىپ وتىرعانىن ايتتى.
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى
