قازاقى ناقىشتاعى ۇلتتىق كيىم, بوزكىلەمدە بەلدەسكەن بالۋاندار, التىباقان تەپكەن جاستار مەن مەرەكەنىڭ ءارىن اشا ءتۇستى. ەلدەگى 100-دەن اسا ەتنوس وكىلى وسىلايشا «قوش كەلدىڭ, ءاز ناۋرىز!» دەپ دوستىق ءۇيى ماڭىن قازاق اۋلىنا اينالدىردى. جيىلعان جۇرتتىڭ قاراسى قالىڭ, ءبىرى كورىسىپ, ءبىرى دامنەن اۋىز ءتيىپ, ارقا-جارقا بولدى. مەرەكەنى ۇلىقتاعاندار اراسىندا جەتپىستى ەڭسەرگەن اجەي سافۋرا عابيدوللاقىزى دا بار.
«ناۋرىز – جىل باسى. تابيعاتتىڭ جاڭارىپ, تىرشىلىكتىڭ جاندانىپ, نيەتتىڭ تازارىپ, جاقسىلىقتىڭ, ىزگىلىكتىڭ وياناتىن شاعى. بۇل مەيرامدا ادامي قۇندىلىقتار دارىپتەلىپ, سالت-ءداستۇرىمىز جاڭعىرادى. بۇگىندە قازاق قوعامىندا ايتۋلى مەرەكە بارشا وتانداسىمىزعا ورتاق ازاماتتىق مەيرام سيپاتىن الىپ كەلەدى. اتا سالتىندا ناۋرىز مەيرامى بولماعان وزگە ەتنوس وكىلدەرى دە مەرەكەنى تويلاپ ءجۇر. دەمەك ەلدەگى ىنتىماق پەن بىرلىك بەكەم دەگەن ءسوز. كوز كورگەن دۇنيەنى بالا ساناسىندا ماڭگى ساقتايدى. مىنە, وسىنى جاستايىنان ۇعىنسىن دەپ, ۇيدەگى ەكى نەمەرەمدى ەرتە كەلدىم», دەدى قالا تۇرعىنى.
اسىر سالىپ اسىق اتقان بالالاردىڭ كۇلكىسى, ۇلكەندەردىڭ جۇزىندەگى مەيىرىم مەيرامنىڭ ماڭىزىن عانا ەمەس, ەلدەگى وزگە ەتنوس وكىلدەرىنىڭ مادەني بايلانىسىنىڭ تەرەڭدىگىن اڭعارتتى. كوپ ۇزاماي ۇلىق توي مەرەكەلىك كونتسەرتكە جالعاستى. ءدۇيىم جۇرتقا قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ جۇرەكجاردى تىلەگىن ءبىلدىردى.
«تاۋەلسىزدىك جىلدارىنان كۇنى بۇگىنگە دەيىن ناۋرىز مەيرامىنىڭ ءمان-ماڭىزى ارتىپ كەلەدى. بيىل مەملەكەت باسشىسى قاسىم-جومارت توقاەۆتىڭ تاپسىرماسىمەن ناۋرىزنامانىڭ ونكۇندىگى بەكىتىلدى. امال كۇنىنەن باستالعان مەيرام ەلىمىزدىڭ ءار وڭىرىندە جوعارى دەڭگەيدە اتالىپ ءوتىپ جاتىر. بۇل – بىرلىك پەن ىنتىماق, جاڭعىرۋ مەن جاڭارۋ, ءۇمىت پەن ۇمتىلىستىڭ مەرەكەسى. ۇلىس وڭ, اق مول بولسىن!» دەدى ول.
مەرەكە قارساڭىندا قايىرىمدىلىق جاساپ, ۇلەس قوسقان اسسامبلەيا مۇشەلەرى ماراپاتتالدى. ءىس-شاراعا ەلشىلەر, استانا قالاسى اكىمدىگىنىڭ, مەملەكەتتىك ورگانداردىڭ, قوعامدىق ۇيىمداردىڭ وكىلدەرى مەن قحا مۇشەلەرى, قوعام قايراتكەرلەرى, قالا تۇرعىندارى, قوناقتارى قاتىستى.
«باۋىرلاس حالىق ءۇشىن مەرەكە بەرەكە-بىرلىكتەن باستاۋ الادى. وزبەك حالقىنىڭ ناۋرىز مەرەكەسىن قارسى الۋ سالتى قازاق داستۇرىنە ۇقساس. ولار دا بۇل كۇندەرى ءبىر-بىرىنە قوناققا بارىپ, سان ءتۇرلى ۇلتتىق تاعام جاساپ, كۇرەس, بايگە, اسىق اتۋ سياقتى ۇلتتىق ويىندارىمىزعا قاتىسىپ, تاماشالايدى. تامىرى ساباقتاس مەرەكەدە ادامدار ءبىر-بىرىنە دەگەن وكپە-رەنىشتەرىن ۇمىتىپ, كەشىرىمدى بولىپ, جۇرەكتەرىن مەيىرىمدىلىككە تولتىرۋعا تىرىسادى», دەدى وزبەكستان رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى سايديكرام نيازحودجاەۆ.
