مەرەكەلىك ءىس-شاراعا كەلۋشىلەرگە شەكتەۋ جوق. قالا قوناقتارى مەن تۇرعىندارى كوڭىلدى مەرەكەنىڭ قاق ورتاسىندا بولىپ, ۇلتتىق داستۇرلەرىمىز ۇلىقتالعان مارافوندى تىكەلەي ەفيردە دە تاماشالاي الدى. قوناقتاردىڭ قۇرمەتىنە اننەن شاشۋ شاشىلىپ, ۇلتتىق ويىندار ويناتىلدى. سونداي-اق ۇلتتىق سپورت كۇنىمەن تۇسپا-تۇس كەلگەن ءىس-شارادا قىراندى قولعا ۇيرەتىپ, تازى باپتاعان اڭشى-ساياتشىلار دا اتادان ميراس بولىپ كەلە جاتقان ۇلتتىق ونەرىمىز تۋرالى بىلگەنىمەن ءبولىستى.
ءىس-شاراعا سەنات جانە ءماجىلىس دەپۋتاتتارى, مەملەكەت جانە قوعام قايراتكەرلەرى, زيالى قاۋىم, ونەر, مادەنيەت, ۇلتتىق سپورت وكىلدەرى جانە ەرەكشە ءىسى مەن ەرلىگىمەن كوزگە ءتۇسىپ جۇرگەن وتانداستارىمىز قاتىستى. ارنايى قۇرىلعان ەتنواۋماق, ءتۇرلى تاقىرىپتاعى تالقىلاۋلار وتكىزىلەتىن ديسكۋسسيا الاڭى, سۇحبات جانە ۇلتتىق ويىندار الاڭى ۇيىمداستىرىلدى. ماسەلەن, ديسكۋسسيا الاڭىندا ءتۇرلى سالا وكىلدەرى, وتاندىق ەتنوگراف عالىمدار «ناۋرىزناما», «ۇلتتىق سەزىم», «جاڭا زاماننىڭ ادامى» تاقىرىپتارىندا وي-پىكىرىمەن ءبولىسىپ, تالقىلاۋعا قاتىستى.
سونىمەن بىرگە مارافونعا ەرلىك ىسىمەن ەلدىڭ ەسىندە قالعان ادامدار كەلدى. ماسەلەن, الماتى وبلىسىنىڭ ىلە اۋدانىندا اۆتوبۋس اپاتى كەزىندە جولاۋشىلاردى امان الىپ قالعان 8-سىنىپ وقۋشىسى اقجول گەروي, بوراندا جولدا قالعان جۇكتى ايەلگە جاردەم بەرگەن ەرەيمەنتاۋ اۋداندىق توتەنشە جاعدايلاردى جويۋ ءبولىمىنىڭ قىزمەتكەرى امانگەلدى دوسكەنوۆ, مۇز ويىلىپ, سۋعا ءتۇسىپ كەتكەن 17 جاستاعى ەلوردا تۇرعىنىن قۇتقارىپ قالعان مەرەكە ەدرەسوۆ, 1 500-گە جۋىق مۋزىكالىق اسپاپتى جيناپ, ساقتاپ جۇرگەن قولونەر شەبەرى, مۋزىكاتانۋشى ازامات باقيا, بۇركىتشى, «Qazaqstan» تەلەارناسىنان شىعاتىن جاڭا «بۇركىتشى قىز» تەلەحيكاياسىنىڭ كەيىپكەرى ايشولپان نۇرعايىپ, الىپ كۇش يەسى, گيننەس كىتابىنىڭ رەكوردشىسى سەرگەي تسىرۋلنيكوۆ پەن الماتىداعى جەر سىلكىنىسى كەزىندە وپەراتسيا جاساۋىن توقتاتپاعان كارديولوگيا جانە ىشكى اۋرۋلار عىلىمي زەرتتەۋ ينستيتۋتىنىڭ حيرۋرگى احىت باعدات تىكەلەي ەفيرگە شىقتى. مارافون قاتىسۋشىلارى بۇدان بولەك, قىزىلوردا وبلىسىنداعى وننان استام ەتنوس وكىلى تۇراتىن ينتەرناتسيونال-3 اۋىلىنداعى ناۋرىز تويىنا كۋا بولدى.
ۇرپاق ساباقتاستىعىن جاڭعىرتىپ, ۇلتتىق ونەردى ۇلىقتاۋعا ارنالعان مارافوننىڭ ماڭىزى – ۇلتتىق ويىندار سايىسى, ايتىس, كۇي تارتىسى مەن ۇلتتىق كيىمدەردىڭ ءسان ۇلگىسىن كورسەتكەن كونتسەرتتىك باعدارلاما ارقىلى قازاق حالقىنا ءتان ۇلتتىق ەرەكشەلىكتەردى پاش ەتىپ, بولمىسىمىزدى تانىتۋعا سەپتىگىن تيگىزۋ.
