قىستان شىققان اعايىن ناۋرىز ونكۇندىگىن ەرەكشە اتاپ ءوتىپ جاتىر. ءبىر جاعىنان ۇلىق مەرەكەنىڭ قاسيەتتى رامازان ايمەن سايكەس كەلۋى دە وسى مەرەكەنىڭ ءمانىن تەرەڭدەتتى. بيىلعى ناۋرىزدى ەلدەگى شارۋا باققان ازاماتتار مۇقتاج اۋىلداستارىنا قايىرىمدىلىق كومەك كورسەتۋدەن باستادى.
بايعانين اۋدانىنىڭ ورتالىعى قاراۋىلكەلدە اۋداندىق مەشىت الدىندا قايىرىمدىلىق كەرۋەنى باستاۋ الدى. اۋدان كاسىپكەرلەرى مەن مەشىت جاماعاتى جانە ەرىكتىلەردىڭ قاتىسۋىمەن وتكەن ءىس-شارادا ۇلىق مەرەكەنىڭ ۇلىلىعى تۋرالى جاقسى تىلەكتەر ايتىلىپ, اقساقالدار باتا بەردى. قايىرىمدىلىق كۇنى اۋداننىڭ شارۋا قوجالىقتارى مۇگەدەك بالا تاربيەلەپ وتىرعان, از قامتىلعان وتباسىلارعا قوي ەتىن جەتكىزىپ بەرسە, كاسىپكەرلەر, مەشىت جاماعاتى جانە تاجىك-اۋعان سوعىسى ارداگەرلەر قاۋىمداستىعى ازىق-ت ۇلىك پاكەتتەرى مەن قارجىلاي كومەك تاراتتى. بايعانين اۋدانىندا قايىرىمدىلىق كۇنى 50 وتباسىعا وسىنداي كومەك كورسەتىلدى.
قايىرىمدىلىق كۇنى شالقار اۋدانىنىڭ كاسىپكەرلەرى دە ايانىپ قالعان جوق. ايشۋاق اۋىلدىق وكرۋگىنىڭ «قۋان» شارۋا قوجالىعىنىڭ باسشىسى رۋسلان تاستايبەكوۆ اۋىلداعى از قامتىلعان وتباسىلارعا 100 مىڭ تەڭگە كولەمىندە كومەك بەرسە, ەسەت كوتىبار ۇلى اۋىلدىق وكرۋگىنىڭ تۇرعىنى, جەكە كاسىپكەر اسەمگۇل سالىقباەۆا مۇگەدەكتىگى بار بالا تاربيەلەپ وتىرعان, جۇمىسسىز اۋىلداسىنا ازىق-ت ۇلىك جەتكىزدى. شەتىرعىز اۋىلدىق وكرۋگىنىڭ مەكەمە ۇجىمى, شالقار اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى قىزمەتكەرلەرى, جەكە كاسىپكەرلەر ا.نوعاەۆ, ق.بولىسباەۆا, گ.نۇرمانوۆا از قامتىلعان وتباسىلارعا «ناۋرىز ءدامىن» تارتۋ ەتتى.
«قازاقستان حالقىنا قولداۋ قورى» توعىز ورتا مەكتەبىنىڭ جەتى وقۋشىسىنا, اقتوعاي, بەرشۇگىر, شالقار اۋىلدىق وكرۋگتەرى ازاماتتارى جەتى وقۋشىعا جازعى دەمالىسقا جولداما تابىستادى. شالقار اۋدانىنىڭ ءبىلىم ءبولىمى مەن ءبىلىم بەرۋ ۇيىمدارى مەكتەپتەردىڭ 9-11 سىنىپتار اراسىندا ناۋرىز تاعامدارىنا جارمەڭكە ۇيىمداستىرىپ, ودان تۇسكەن قارجى مۇگەدەكتىگى بار بالا تاربيەلەپ وتىرعان وتباسىعا بەرىلدى. بۇل كۇندەرى اۋدانداعى مۇقتاج وتباسىلارعا 780 مىڭ تەڭگە كولەمىندە قايىرىمدىلىق ءىس-شارالارى جاسالسا, 52 وتباسىنا الەۋمەتتىك پاكەتتەر تاراتىلدى.
اقتوبەلىك ازاماتتار قايىرىمدىلىق ءىس-شارالارىن ناۋرىز ايى اياقتالعانشا جالعاستىرا بەرمەك.
اقتوبە وبلىسى
