ستەرەوتيپتەردى سىرت اينالاتىن بولساق, يدەولوگيا – تەك ريتوريكا ەمەس, سونىمەن قاتار قوعامدىق ءومىردىڭ ءارتۇرلى سالالارىنداعى ناقتى وزگەرىستەر جيىنتىعى. ءۇشىنشى ۇلتتىق قۇرىلتايدىڭ ء«بىلىم جانە عىلىم» سەكتسياسىندا ءبىز ادامي كاپيتالدى دامىتۋ تاقىرىبىنا ەرەكشە ءمان بەردىك. جالپى, سەكتسيا بارىسىندا ەلىمىزدىڭ دامۋىنا ارنالعان 20-عا جۋىق باستاما توڭىرەگىندە اڭگىمە ءوربىدى.
وسى ورايدا ماڭىزدى سالالاردىڭ بىرىنە توقتالعىم كەلەدى. ونىڭ تىكەلەي تاجىريبەلىك ماڭىزى بار. پرەزيدەنت قاسىم-جومارت توقاەۆ جولداۋىندا ءىجو كولەمىن ەكى ەسەگە ارتتىرۋدى ماقسات ەتىپ قويعان بولاتىن. بۇل رەتتە ونەركاسىپتى دامىتۋعا جانە نەگىزگى ينفراقۇرىلىمدى قالىپتاستىرۋعا نەمەسە جاڭارتۋعا ەرەكشە باسىمدىق بەرۋ كەرەك. كەيىنگى جىلدارداعى ترەندتەردى, سونىڭ ىشىندە گەوساياسي ترەندتەردى ەسكەرەتىن بولساق, بۇل ماڭىزدى باعىت ەكەنىنە كوز جەتكىزەمىز. وسىلايشا, كەز كەلگەن قيىندىققا جەتكىزبەي, ەكونوميكانىڭ تۇراقتىلىعىن قامتاماسىز ەتەمىز.
ارينە, بۇل مىندەت پەن مەجە قۇرىلىمدىق ەكونوميكالىق رەفورمالاردىڭ كۇشىمەن شەشىلەدى. بىراق مۇندا يدەولوگيالىق ساياساتتىڭ مەيلىنشە پراگماتيكالىق تۇرىنە دە ورىن تابىلادى. ءبىز تابىسقا قول جەتكىزە الاتىن جانە بەلگىلى ءبىر نارىقتىق ورتالاردا ءوز ورنىن تاباتىن كاسىپورىندار قۇرا الامىز. بىراق بۇل باعىتتا كوپ جۇمىس قولعا الىنۋى كەرەك.
2022 جىلى الماتىدا وتكەن جاس عالىمدارمەن كەزدەسۋدە مەملەكەت باسشىسى: ء«بىز ينجەنەرلەر, كونسترۋكتورلار, جوبالاۋشىلار, اگرونومدار, باعدارلاماشىلار ەلى بولۋىمىز كەرەك», دەپ اتاپ ءوتتى. بىراق قازىر ءبىز تەحنيكالىق ماماندىقتاردىڭ بەدەلىنىڭ تومەندەۋىنە بايلانىستى كادر تاپشىلىعىنا تاپ بولىپ وتىرمىز. بۇل تىعىرىقتان شىعىپ, ولقىلىقتىڭ ورنىن تولتىراتىن قادامداردىڭ ءبىرى رەتىندە پرەزيدەنت قاۋىپتى كاسىپ قىزمەتكەرلەرىنىڭ, ونىڭ ىشىندە كەنشىلەردىڭ زەينەتكەرلىك جاسىن تومەندەتۋ جونىندە تاپسىرما بەرگەن ەدى.
ءماجىلىس قابىرعاسىندا كادر تاپشىلىعى ماسەلەسى ۇنەمى كوتەرىلىپ وتىرادى. «Amanat» پارتياسى فراكتسياسىنداعى دەپۋتات ارىپتەستەرىم دابىل قاعارلىق فاكتىلەردى كەلتىردى. ماسەلەن, ينجەنەر, مەتاللۋرگ جانە باسقا دا تەحنيكالىق مامانداردىڭ ورتاشا جاسى شامامەن 50 جاستى قۇرايدى ەكەن. گرانتتاردىڭ ءبولىنىپ جاتقانىنا قاراماستان, تۇلەكتەر بۇل ماماندىقتارعا جولاي قويمايدى. وسىلايشا, كاسىپورىندارعا قاجەتتى جاڭا كادرلاردىڭ بۋىنى توقتاپ قالدى.
بۇل تۇيتكىل كەزەڭ-كەزەڭىمەن, كىرىستىڭ وسۋىمەن شەشىلەدى, بىراق ونىڭ دا شەگى بار. سونىمەن قاتار تومەنگى جۇمىس كۇشى, قاراپايىم ەڭبەك ادامدارىنىڭ جۇمىسى ۇنەمى كوز قىزىعاتىنداي بولىپ كورىنە بەرمەيدى. كوبىنەسە بۇل اۋىر, ءبىرسارىندى, تاۋەكەلگە تولى بولىپ كەلەدى. ونىڭ ۇستىنە نارىقتىق ەكونوميكادا از كۇش جۇمساپ, كوپ تابىس تابۋعا بولاتىن ەڭبەك كوزدەرى, وڭاي جولدارى كوپ. سوندىقتان ىنتالاندىرۋدىڭ بارىنشا تۇتاس كەشەنىن جاساي وتىرىپ, جاعدايدى تۇزەتە الامىز. وسىنداي كاسىپتەردىڭ ماڭىزدىلىعىن قوعام بولىپ مويىنداۋ, قولداۋ قاشاندا ءوز جەمىسىن بەرەدى.
نيكيتا شاتالوۆ,
ءماجىلىس دەپۋتاتى
